ກອງປະຊຸມທົບທວນຄືນການຈັດຕັ້ງປະຕິບັດວຽກງານ ຕ້ານເອດ ຂອງຄະນະກຳມະການແຫ່ງຊາດຕ້ານເອດ ຮ່ວມກັບ ຄະນະກຳມະການຕ້ານເອດ ແຂວງວຽງຈັນ ໄດ້ຈັດຂຶ້ນທີ່ຫ້ອງປະຊຸມ ຣີສອດນາປ່າກວາງ ທ່າລາດ, ແຂວງວຽງຈັນ, ໃນວັນທີ 17 ທັນວາ 2024 ໂດຍການເປັນປະທານ ແລະ ກ່າວເປີດກອງປະຊຸມຂອງ ທ່ານ ສຈ. ປອ. ດຣ. ບຸນແຝງ ພູມມະໄລສິດ ລັດຖະມົນຕີກະຊວງສາທາລະນະສຸກ, ປະທານຄະນະກຳມະການແຫ່ງຊາດຕ້ານເອດ ເຊິ່ງທ່ານກ່າວວ່າ: ກອງປະຊຸມຄັ້ງນີ້ ຖືວ່າເປັນກອງປະຊຸມທີ່ມີຄວາມໝາຍຄວາມສຳຄັນຢ່າງຍິ່ງ ເພາະຈະໄດ້ພ້ອມກັນທົບທວນຄືນພາລະບົດບາດ ແລະ ການເຄື່ອນໄຫວຂອງຄະນະກຳມະການແຫ່ງຊາດຕ້ານເອດ, ພ້ອມທັງຮັບຟັງການລາຍງານຄວາມຄືບໜ້າໃນການຈັດຕັ້ງປະຕິບັດວຽກງານຕ້ານເອດມາຮອດປະຈຸບັນ ເພື່ອເປັນການຕິດຕາມ ເປົ້າໝາຍແບບເລັ່ງລັດ (Fast-Tract) ຂອງອົງການສະຫະປະຊາຊາດຕໍ່ວຽກງານຕ້ານເອດພາຍໃນປີ 2025 ໃຫ້ບັນລຸໄດ້ 95-95-95 ແລະ ຢຸດຕິການແຜ່ລະບາດຂອງເຊື້ອເຮສໄອວີໃຫ້ໄດ້ພາຍໃນປີ 2030, ພ້ອມທັງທົບທວນຄືນຂໍ້ສະດວກ, ຂໍ້ຍຸ້ງຍາກ, ສິ່ງທ້າທາຍ ແລະ ສິ່ງໃດທີ່ເປັນສິ່ງເອື້ອອຳນວຍຄວາມສະດວກ ໃນການເຄື່ອນໄຫວວຽກງານຕ້ານເອດ ໃນໜຶ່ງປີຜ່ານມາ.
ທ່ານກ່າວຕື່ມອີກວ່າ: ມາເຖິງປະຈຸບັນ ສະພາບການແຜ່ລະບາດຂອງເຊື້ອເຮສໄອວີພະຍາດເອດ ແມ່ນມີທ່າອ່ຽງເພີ່ມຂຶ້ນໃນແຕ່ລະປີ ສຳລັບປີ 2023 ພົບຜູ້ຕິດເຊື້ອເພີ້ມ 23% ທຽບໃສ່ປີ2022 ໃນນັ້ນ 81% ແມ່ນກຸ່ມປະຊາກອນສ່ຽງ ອາຍຸ 15-24 ປີ, ໂດຍລວມແລ້ວ ມາເຖິງປະຈຸບັນພວກເຮົາກໍ່ຍັງສາມາດຮັກສາອັດຕາການຕິດເຊື້ອເຮສໄອວີ ໃນລະດັບຕໍ່າ (0,4%) ໃນກຸ່ມປະຊາກອນທົ່ວໄປອາຍຸ 15-49 ປີ.
ສໍາລັບຕົວເລກສະສົມ ຜູ້ຕິດເຊື້ອເຮສໄອວີໃນທົ່ວປະເທດ ແຕ່ປີ 1990 ຮອດເດືອນ 11 ປີ 2024ທັງໝົດ: 22,584 ຄົນ, ຜູ້ຕິດເຊື້ອເຮສໄອວີ ຍັງມີຊີວິດ 16,726 ຄົນ, ເປັນພະຍາດເອດ 7,455 ຄົນແລະ ເສຍຊີວິດແລ້ວ 5,858 ຄົນ, ສະເພາະປີ 2024 ນັບແຕ່ ເດືອນ 1 ຫາ 11 ໄດ້ກວດບົ່ງມະຕິວ່າຕິດເຊື້ອເຮສໄອວີ ແມ່ນ 1,896 ຄົນ.
ທີ່ມາ: ແຂວງວຽງຈັນ
