ໃນຕອນເຊົ້າ ວັນທີ 6 ເມສາ 2025 ຢູ່ທີ່ຫໍປະຊຸມເເຫ່ງຊາດ ນະຄອນຫລວງວຽງຈັນ, ສະຫາຍ ເຫຼັກໄຫຼ ສີວິໄລ ກໍາມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງ ເຊກອງ ພ້ອມດ້ວຍຄະນະນໍາ ເຊິ່ງຕາງໜ້າອົງການປົກຄອງແຂວງເຊກອງ ໄດ້ເຂົ້າວາງພວງມາລາ ເເລະ ໄຫວ້ອາໄລ ຕໍ່ການຈາກໄປຂອງສະຫາຍ ພົນເອກ ຄໍາໄຕ ສີພັນດອນ ອະດີດປະທານຄະນະບໍລິຫານງານສູນກາງພັກ, ອະດີດປະທານປະເທດ ເເຫ່ງສາທາລະນະລັດປະຊາທິປະໄຕປະຊາຊົນລາວ, ທີ່ໄດ້ເຖີງເເກ່ມໍລະນະກໍາ.
ສະຫາຍ ເຫຼັກໄຫຼ ສີວິໄລ ກໍາມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງ ເຊກອງ ໄດ້ເຊັນປຶ້ມໄວ້ອາໄລ ທີ່ມີເນື້ອໃນຄໍາໄວ້ອາໄລວ່າ: ຄະນະບໍລິຫານງານພັກແຂວງ ເຊກອງ, ອົງການປົກຄອງແຂວງ, ສະພາປະຊາຊົນແຂວງ ແລະ ແນວລາວສ້າງຊາດແຂວງ ພ້ອມດ້ວຍພະນັກງານພັກ-ລັດຖະກອນ ທະຫານຕໍາຫຼວດ ແລະ ປະຊາຊົນບັນດາເຜົ່າຊາວແຂວງເຊກອງ ອາໄລຮັກຢ່າງສຸດຊື້ງຕໍ່ການຈາກໄປ ຂອງສະຫາຍ ພົນເອກ ຄໍາໄຕ ສີພັນດອນ ອະດີດປະທານຄະນະບໍລິຫານງານສູນກາງພັກ ອະດີດປະທານປະເທດ ແຫ່ງ ສປປ ລາວ ຜູ້ນໍາທີ່ແສນເຄົາລົບຮັກຂອງພັກ-ລັດ ແລະ ປະຊາຊົນທັງຊາດ, ຂໍໃຫ້ດວງວິນຍານຂອງສະຫາຍ ພົນເອກ ຄໍາໄຕ ສີພັນດອນ ຈົ່ງໄປສູ່ສຸຄະຕິເທີ້ນ.
ຄະນະພັກ, ອົງການປົກຄອງແຂວງເຊກອງ ຈາລຶກຄຸນງາມຄວາມດີຂອງ ສະຫາຍ ພົນເອກ ຄໍາໄຕ ສີພັນດອນ ແລະ ຈະພວກເຮົາຈະພ້ອມກັນປົກປັກຮັກສາ ແລະ ສ້າງສາພັດທະນາແຂວງເຊກອງ ໃຫ້ມີຄວາມຈະເລີນຮຸ່ງເຮືອງ ຕາມອຸດົມການຂອງສະຫາຍ ຕະຫຼອດໄປ.
