ລະຫວ່າງວັນທີ 28-30 ຕຸລາ 2024, ຄະນະຜູ້ແທນ ສປປ ລາວ ນຳພາໂດຍ ທ່ານ ໂພໄຊ ໄຂຄຳພິທູນ, ຮອງລັດຖະມົນຕີ ກະຊວງການຕ່າງປະເທດ ຊຶ່ງປະກອບມີ ຕ່າງໜ້າຈາກຕະຊວງການຕ່າງປະເທດ, ຄະນະກຳມະການແຫ່ງຊາດເພື່ອຄວາມກ້າວໜ້າແມ່ ຍິງ, ແມ່ ແລະ ເດັກ ແລະ ສູນກາງສະຫະພັນແມ່ຍິງລາວເຂົ້າຮ່ວມກອງປະຊຸມສາກົນລະດັບສູງ ວ່າດ້ວຍແມ່ຍິງ, ສັນຕິພາບ ແລະ ຄວາມໝັ້ນຄົງ (International Conference on Women, Peace and Security) ທີ່ ມານິລາ, ປະເທດຟິລິບປິ່ນ.
ຈຸດປະສົງຂອງກອງປະຊຸມດັ່ງກ່າວເພື່ອສົ່ງເສີມການຈັດຕັ້ງປະຕິບັດຍັດຕິສະພາຄວາມໝັ້ນຄົງ ອົງການສະຫະປະຊາຊາດ ເລກທີ 1325 ວ່າດ້ວຍ ແມ່ຍິງ, ສັນຕິພາບ ແລະ ຄວາມໝັ້ນຄົງ, ກໍ່ຄືການສະເຫລີມສະຫລອງຄົບຮອບ 25 ປີ ໃນການຮັບຮອງຍັດຕິດັ່ງກ່າວ. ກອງປະຊຸມລະດັບສູງຄັ້ງນີ້ ເປັນການປຶກສາຫາລື, ແລກປ່ຽນຄຳເຫັນໃນວຽກງານການສົ່ງເສີມຄວາມກ້າວໜ້າແມ່ ຍິງ, ຄວາມສະເໝີພາບຍິງ-ຊາຍ ແລະ ການເຊື່ອມສານວຽກງານດັ່ງກ່າວເຂົ້າທຸກຂົງເຂດວຽກງານທີ່ກ່ຽວຂ້ອງ ໂດຍສະເພາະການສົ່ງເສີມການມີສ່ວນຮ່ວມຂອງແມ່ຍິງ ໃນທຸກຂະບວນການສ້າງ ສັນຕິພາບ, ການພັດທະນາເສດຖະກິດ, ສັງຄົມ ແລະ ວັດທະນະ ທຳ.
ນອກຈາກນັ້ນ ແມ່ນໄດ້ແລກປ່ຽນບົດຮຽນການຈັດຕັ້ງປະຕິ ບັດໃນການແກ້ໄຂບັນຫາທີ່ໄດ້ເອົາໃຈໃສ່ແມ່ຍິງເປັນໃຈກາງ, ໂດຍໄດ້ມີການຮັບຮອງຖະແຫຼງການມະນິລາ ວ່າດ້ວຍແມ່ຍິງ, ສັນຕິພາບ ແລະ ຄວາມໝັ້ນຄົງ ທີ່ມີເນື້ອໃນສົ່ງເສີມການພັວພັນຮ່ວມມືລະ ຫວ່າງພາກລັດ, ອົງການຈັດຕັ້ງທາງສັງຄົມ, ອົງການຈັດຕັ້ງສາກົນ ໃນການປະກອບສ່ວນຮ່ວມມືກັນຈັດຕ້ັງປະຕິບັດວາລະແມ່ຍິງ, ສັນຕິພາບ ແລະ ຄວາມໝັ້ນຄົງ ໃຫ້ບັນລຸຕາມຈຸດປະສົງເປົ້າ ໝາຍ.
ໃນໂອກາດທີ່ເຂົ້າຮ່ວມກອງປະຊຸມດັ່ງກ່າວ ຄະນະຜູ້ແທນ ສປປ ລາວ ໄດ້ປະກອບຄຳເຫັນຕໍ່ກອງປະຊຸມໂດຍຢ້ຳຄືນຄຳໝາຍໝັ້ນຂອງ ລັດຖະບານ ສປປ ລາວ ໃນການສະໜັບສະໜູນສົ່ງ ເສີມຄວາມກ້າວໜ້າຂອງແມ່ຍິງ, ຄວາມສະເໝີພາບຍິງ-ຊາຍ ໃນທຸກຂົງເຂດວຽກງານ ໂດຍການສົ່ງເສີມບົດບາດ ແລະ ການມີສ່ວນຮ່ວມຂອງແມ່ຍິງຕຳແໜ່ງນຳພາຄຸ້ມຄອງ ແລະ ຂັ້ນຕັດສິນບັນຫານັບມື້ຫລາຍຂື້ນ, ຍົກໃຫ້ເຫັນຜົນສຳລັດການຈັດຕ້ັງປະຕິ ບັດຜ່ານມາ, ໄດ້ແລກປ່ຽນບົດຮຽນໃນນາມປະເທດທີ່ໄດ້ຮັບຜົນກະທົບຫລາຍທີ່ສຸດຈາກລະເບີດບໍ່ທັນແຕກ (ລບຕ) ທີ່ວຽກ ການແກ້ໄຂບັນຫາ ລບຕ ໄດ້ສົ່ງເສີມການມີສ່ວນຮ່ວມຂອງແມ່ຍິງ ໂດຍເຊື່ອມສານບົດບາດຍິງ-ຊາຍເຂົ້າໃນຂະແໜງການເພື່ອຮັບປະ ກັນການແກ້ໄຂບັນຫາ ລບຕ ໃຫ້ທຸກຄົນໄດ້ຮັບຜົນປະໂຫຍດ ແລະ ຊີວິດປະຊາຊົນປອດໄພຈາກ ລບຕ ນອກນັ້ນ, ໄດ້ຍົກໃຫ້ເຫັນຜົນງານການເປັນເຈົ້າພາບອາຊຽນຂອງ ສປປ ລາວ ທີ່ໄດ້ກຳນົດເອົາການສົ່ງເສີມຄວາມກ້າວໜ້າແມ່ຍິງ ແລະ ຄວາມສະເໝີ ພາບຍິງ-ຊາຍ ເປັນໜຶ່ງໃນວຽກງານບຸລິມະສິດ, ໂດຍພາຍໃຕ້ການເປັນປະທານຂອງ ສປປ ລາວ, ໄດ້ເປັນເຈົ້າພາບຈັດກອງປະຊຸມ ສຸດຍອດການນຳແມ່ຍິງອາຊຽນ ຄັ້ງທີ່ 3 ແລະ ໄດ້ຮັບຮອງເອກະສາານດັ່ງກ່າວໃນກອງປະຊຸມສຸດຍອດອາຊຽນ ທີ່ຈັດຂື້ນຢູ່ນະ ຄອນຫຼວງວຽງຈັນ.
ກອງປະຊຸມຄັ້ງນີ້ ເປັນກອງປະຊຸມຄັ້ງທຳອິດ ທີ່ໄດ້ຈັດໃນອາຊີຕາເວັນອອກສຽງໃຕ້, ມີຜູ້ເຂົາຮ່ວມຫລາຍກວ່າ 400 ຄົນ ຈາກ 85 ປະເທດ ທີ່ມາຈາກບັນດາຂະແໜງການກ່ຽວຂ້ອງຈາກພາກລັດຖະບານ, ລັດຖະສະພາ ຂອງຫລາຍປະເທດ, ອົງການຈັດຕັ້ງທາງສັງຄົມ ແລະ ອົງການຈັດຕັ້ງສາກົນ.
