ແຂວງຜົ້ງສາລີ ກຽມຈັດປີທ່ອງທ່ຽວລາວ 2024 ໂດຍກໍາກຳນົດເອົາເທສະການອາຫານເຜົ່າ ແລະ ດື່ມນ້ຳຊາ ເປັນກິດຈະກໍາລະດັບແຂວງ ເພື່ອສົ່ງເສີມປີທ່ອງລາວ 2024 ແມ່ນຈະຈັດຂຶ້ນໃນເດືອນ ພະຈິກ 2024 ນີ້.
ທ່ານ ສົມຕຸ້ຍ ພົມມະວົງໄຊ ຮອງຫົວໜ້າພະແນກຖະແຫຼງ ຂ່າວ, ວັດທະນະທຳ ແລະ ທ່ອງທ່ຽວແຂວງຜົ້ງສາລີ ໄດ້ໃຫ້ສຳພາດຕໍ່ສື່ມວນຊົນແຂວງຜົ້ງສາລີ ໃຫ້ຮູ້ວ່າ: ພາຍໃນງານຈະມີຫລາຍກິດຈະກໍາທີ່ຈະຈັດຂຶ້ນໃນເທດສະການດັ່ງກ່າວເປັນຕົ້ນແມ່ນ: ກິດຈະກຳປະກວດອາຫານເຜົ່າ, ປະກວດການຊົງຊາ, ການປະກວດນາງງາມຊົນເຜົ່າ, ການວາງສະແດງອາຫານຂອງບັນດາເຜົ່າ, ວາງສະແດງສີນຄ້າຜະລິດຕະພັນຊາ ແລະ ສິນຄ້າໂອດ໋ອບຂອງແຂວງ, ການສະແດງສີລະປະວັນນະຄະດີ ແລະ ອື່ນໆ.
ທ່ານຍັງໄດ້ໃຫ້ຮູ້ຕື່ມວ່າ ນອກຈາກກິດຈະກຳປີທ່ອງທ່ຽວລະດັບແຂວງແລ້ວ ແຂວງຜົ້ງສາລີຍັງມີຫຼາຍກິດຈະກຳປີທ່ອງ ທ່ຽວລະດັບເມືອງ ຮອດປະຈຸບັນໄດ້ຈັດຕັ້ງປະຕິບັດສຳເລັດໄປແລ້ວ 2 ກິດຈະກໍາຢູ່ເມືອງບຸນເໜືອ ແລະ ເມືອງບຸນໃຕ້ ແລະ ໃນເວລາອັນໃກ້ນີ້ ກໍຈະມີກິດຈະກຳປີທ່ອງທ່ຽວຂອງເມືອງຍອດອູ ເຊິ່ງແມ່ນພິທີເປີດປີທ່ອງທ່ຽວ 2024 ຂອງເມືອງຍອດອູ ຕິດ ພັນກັບບຸນທານພະທາດອົງໄຫຈະຈັດຂຶ້ນໃນລະຫວ່າງວັນທີ 23-24 ມີນາ 2024 ແລະ ຈະມີຫຼາຍກິດຈະກຳເຊັ່ນ: ງານສະຫຼອງທານພະທາດອົງໄຫ, ງານວາງສະແດງສີນຄ້າ, ການສະແດງສີລະປະວັນນະຄະດີ ແລະ ອື່ນໆ.
ທີ່ມາ: ວິທະຍຸ – ໂທລະພາບ ແຂວງຜົ້ງສາລີ
