ງານບຸນລະນຶກບຸນຄຸນພຣະເຈົ້າໄຊຍະເຊດຖາທິລາດ ແລະ ສະເຫີມສະຫຼອງປີທ່ອງທ່ຽວລາວ 2024 ທີ່ແຂວງອັດຕະປື ໄດ້ຈັດຂຶ້ນໃນວັນທີ 17 ທັນວາ ນີ້ ທີ່ເດີ່ນອະນຸສາວະລີ ເຈົ້າໄຊຍະເຊດຖາທິລາດ ບ້ານ ຫາດຊາຍຂາວ ເມືອງໄຊເຊດຖາ ໂດຍໃຫ້ກຽດເຂົ້າ ຮ່ວມຂອງທ່ານ ວັນທອງ ກອງມະນີ ເຈົ້າແຂວງອັດຕະປື, ມີທ່ານ ເລັດ ໄຊຍະພອນ ປະທານສູນກາງສະຫະພັນກໍາມະບານລາວ, ຄະນະນຳຈາກກະຊວງຖະແຫຼງຂ່າວ, ວັດທະນະ ທໍາ ແລະ ທ່ອງທ່ຽວ (ຖວທ), ແຂກຖືກເຊີນ ແລະ ມວນຊົນຊາວແຂວງ ອັດຕະປື ເຂົ້າຮ່ວມຢ່າງຫຼວງຫຼາຍ.
ໃນພິທີ ທ່ານ ບຸນເສີດ ເສດທິລາດ ຮອງເຈົ້າແຂວງອັດຕະປື ປະທານຈັດງານປີທ່ອງທ່ຽວລາວ ແຂວງ ໄດ້ລາຍງານໃຫ້ຮູ້ວ່າ: ແຂວງອັດຕະປື ໄດ້ກຳນົດກິດຈະກຳທ່ອງທ່ຽວ ໃນລະດັບແຂວງມີທັງໝົດ 7 ກິດຈະກຳ, ຊຶ່ງໃນ 7 ກິດ ຈະກຳປະກອບມີ: ຂອງແຂວງສະເພາະມີ 1 ກິດຈະກຳ, ແຂວງ ຮ່ວມກັບເມືອງມີ 1 ກິດຈະກຳ, ຈາກນັ້ນ 5 ກິດຈະກຳແມ່ນຂອງເມືອງ, ສໍາລັບກິດຈະກຳລະດັບແຂວງ ໄດ້ກຳນົດຈັດຂຶ້ນຕັ້ງແຕ່ວັນທີ 14-18 ທັນວາ 2024 ຊຶ່ງແມ່ນງານບຸນລະນຶກບຸນຄຸນພຣະເຈົ້າໄຊຍະເຊດຖາທິຣາດ ສະເຫຼີມສະຫຼອງປີທ່ອງທ່ຽວລາວ 2024 ຂອງແຂວງອັດຕະປື.
ພິທີສະເຫຼີມສະຫຼອງປີທ່ອງທ່ຽວລາວ 2024 ຂອງແຂວງ ຕິດພັນກັບງານບຸນລະນຶກບຸນຄຸນພຣະເຈົ້າໄຊຍະເຊດຖາທິຣາດ ໄດ້ກໍານົດເອົາ 8 ກິດຈະກໍາ ຄື:
1. ກິດຈະກຳຂີ້ລົດຖີບເພື່ອສຸຂະ ພາບຂອງສະຫະພັນລົດຖີບແຂວງ ຈັດຂື້ນໃນຄັ້ງວັນທີ 14 ທັນວາ,
2. ກິດຈະກຳວາງສະແດງສິນຄ້າ ແລະ ການທ່ອງທ່ຽວ ຈັດຂື້ນລະຫວ່າງ ວັນທີ 14-18 ທັນວາ,
3. ກິດຈະກຳປະກວດນາງສາວທ່ອງທ່ຽວ ຈັດຂື້ນໃນຄໍ່າຄືນວັນທີ 16 ທັນວາ,
4. ກິດຈະກຳຮ່ອນຄໍາຕາມປະເພນີ ຈັດຂື້ນໃນຄັ້ງວັນທີ 17 ທັນວາ,
5. ກິດຈະກຳແຫ່ຜ້າສາດເຜີ້ງ: ຈັດຂື້ນວັນທີ 17 ທັນວາ,
6. ກິດຈະກຳສະແດງສີລະປະຄົບງັນ ຈັດຂື້ນລະຫວ່າງວັນທີ 14-17 ທັນວາ 2024
7. ກິດຈະກຳຕັກບາດ ຈັດຂື້ນໃນຄັ້ງວັນທີ 18 ທັນວາ 2024
8. ກິດຈະກຳຊ່ວງເຮືອຕາມຕຳນານ ຈັດຂື້ນໃນຄັ້ງວັນທີ່ 18 ທັນວາ 2024,
ສໍາລັບການເປີດງານມື້ນີ້ ແມ່ນໄດ້ມີຂະບວນສະແດງ ແລະ ຂະບວນແຫ່ ຂອງກ້ອນກຳລັງຂອງແຕ່ລະເມືອງ, ຊຶ່ງມີຂະບວນ ແຫ່ທັງໝົດ 9 ກ້ອນກຳລັງ ຈໍານວນ ຄົນເຂົ້າຮ່ວມ ແລະ ສະແດງ ເກືອບ 2.000 ຄົນ.
ຂ່າວ: ໄພບູນ
