ທ່ານ ອາລຸນໄຊ ສູນນະລາດ ເລຂາພັກແຂວງຈໍາປາສັກ, ທ່ານ ສຸກສະຫວັນ ວິໄລວົງ ຮອງເລຂາພັກແຂວງ ປະທານຄະນະກໍາມະການປົກຄອງແຂວງ, ທ່ານ ພູວົງ ອະໄພ ກຳມະການພັກແຂວງ ຫົວໜ້າພະແນກສຶກສາທິການ ແລະ ກິລາແຂວງ, ພ້ອມຄະນະນໍາຂອງແຂວງ ແລະ ມວນຊົນ ໄດ້ເຂົ້າຮ່ວມຊົມການສະແດງກ້ອນກຳລັງ ທີ່ຈະມາສະແດງໃນພິທີປິດງານມະຫະກຳກິລາແຫ່ງຊາດ ຄັ້ງທີ 12 ທີ່ນະຄອນຫຼວງວຽງຈັນ ເພື່ອຮັບເອົາທຸງໄຊເປັນເຈົ້າພາບຈັດງານມະຫະກຳກິລາແຫ່ງຊາດ ຄັ້ງທີ 13 ໃນປີ 2028.
ການສະແດງກ້ອນກໍາລັງມີຂຶ້ນໃນຕອນແລງວັນທີ 21 ພະຈິກ 2025 ທີ່ສະໜາມກິລາແຂວງ (ຫຼັກ2) ນະຄອນປາກເຊ, ໂດຍແມ່ນພະແນກສຶກສາທິການ ແລະ ກິລາແຂວງ – ຄະນະກຳມະການ ກອງເລຂາ ຮ່ວມກັບ ພະແນກວັດທະນະທຳ ແລະ ທ່ອງທ່ຽວແຂວງຈັດຂຶ້ນ.
ການຝຶກຊ້ອມຂອງກ້ອນກໍາລັງແມ່ນເລີ່ມແຕ່ວັນທີ 15 ພະຈິກ 2025 ເປັນຕົ້ນມາ, ເນື້ອໃນການສະແດງແມ່ນເນັ້ນໃສ່ຍິນດີຕ້ອນຮັບ ສູ່ແຂວງຈໍາປາສັກ. ບັນດາບົດຟ້ອນ, ບົດເພງ, ສັດນໍາໂຊກ ແລະ ຄໍາຂວັນ ລ້ວນແຕ່ ໄດ້ຈັດການປະກວດແຂ່ງຂັນ ແລະ ຮັບຮອງເອົາຜູ້ຊະນະເລີດ ເພື່ອເປັນຕົວແທນ ສະແດງອອກຢູໃນບົດສະແດງລວມມີ 4 ຕອນ:
ຕອນທີ 01 ສະເໜີເປັນຈັງຫວະ ລໍາສີພັນດອນ ເຊີນທ່ຽວຈໍາປາສັກ ເຊີນຊວນແຂກໃກ້ – ໄກ ເຂົ້າມາຊົມ ມົນສະເໜ່ທໍາມະຊາດລາວໃຕ້ທີ່ມີສະຖານທີ່ທ່ອງທ່ຽວສວຍສົດງົດງາມຫຼາຍແຫ່ງ ແລະ ທ່ຽວຊົມວັດທະນະທໍາ ຮີດຄອງປະເພນີອັນດີງາມຂອງຊາວຈໍາປາສັກ. ນອກນັ້ນຍັງໄດ້ເວົ້າ ເຖິງຄວາມອຸດົມສົມບູນທາງດ້ານ ເຂົ້າປາອາຫານ, ພືດພັນທັນຍາຫານ ແລະ ໝາກໄມ້ນາໆຊະນິດ ພ້ອມທັງໄດ້ຮັບຊົມສິລະປະວັນນະຄະດີ ທີ່ເປັນເອກະລັກສະເພາະຂອງພີ່ນ້ອງລາວ-ຊາວໃຕ້ ແລະ ຈະໄດ້ທ່ຽວ ຊົມສີມືຫັດຖະກຳທີ່ລະອຽດອ່ອນທີ່ສືບສານມາແຕ່ສະໄໝບູຮານ.
ຕອນທີ 02 ສະເໜີບົດເພັງ ຈໍາປາສັກກ້າວໄກ ບັນລະຍາຍເຖິງ ຄໍາຂວັນຂອງແຂວງຈໍາປາສັກ:
ເອກະລັກວັດພູ ກຸຫຼາບປາກເຊ
ກາເຟປາກຊ່ອງ ນໍ້າຂອງໂຕນຄອນ
ສີພັນດອນລືນາມ ງາມນໍ້າໃຈຊາວຈໍາປາ
ລືຊາກ້ອງໄກ ກອງໄຊຈັກກະພັດ
ພັກ – ລັດນໍາພາ- ປວງປະຊາ ຢູ່ດີກິນດີ
ຕອນທີ 03 ສະເໜີເປັນດົນຕີນົກສິດາເປັນຕົວລະຄອນເອກໃນວັນນະຄະດີພື້ນເມືອງລາວ, ເປັນຕໍານານທີ່ເລົ່າຂານສືບຕໍ່ກັນມາ, ນົກສິດາຕິດພັນກັບການດຳລົງຊີວິດຂອງປະຊາຊົນຊາວແຂວງຈໍາປາສັກມາເປັນເວລາຍາວນານ ໂດຍສະເພາະໃນເຂດຄອນພະເພັງ, ຫຼີ່ຜີ ເປັນນົກທີ່ມີສີສັນສວຍງາມ ແລະ ເປັນສິລິມຸງຄຸນໃຫ້ແກ່ຜູ້ພົບເຫັນໃນເວລາໄປທຳມາຫາກິນ ແລະ ເປັນສັດນໍາໂຊກ
ຕອນທີ 04 ສະເໜີກອນເຊິ້ງ ເຊີນຊວນຮ່ວມນໍ້າໃຈເນື້ອໃນເວົ້າເຖິງ: ເຊີນຊວນປວງຊົນລາວ ຊາວແຂວງຈໍາປາສັກຮ່ວມແຮງຮ່ວມ ໃຈສ້າງສາພັດທະນາຕາມວິຖີຊີວິດ ແລະ ການທຳມາຫາກິນອັນອຸດົມສົມບູນ ໄປຕາມລະດູການ ແລະ ທ່າແຮງທີ່ບົ່ມຊ້ອນໄປດ້ວຍພູມປັນຍາຂອງແຕ່ລະເຂດ ເພດໄວຊາວແຂວງຈໍາປາສັກ ເພື່ອພ້ອມກັນສ້າງສາພັດທະນາເສດຖະກິດ, ຊີວິດການເປັນຢູ່ນັບມື້ນັບດີຂຶ້ນເທື່ອລະກ້າວ.
ໃນໂອກາດນີ້ ທ່ານ ອາລຸນໄຊ ສູນນະລາດ ເລຂາພັກແຂວງຈຳປາສັກ ໄດ້ກ່າວຄໍາຊົມເຊີຍຕໍ່ຄະນະຮັບຜິດຊອບ, ອາຈານຜູ້ປະດິດຄິດແຕ່ງບົດການສະແດງຂອງກ້ອນກໍາລັງ ແລະ ຊົມເຊີຍນັກສະແດງ, ພ້ອມທັງຊຸກຍູ້ໃຫ້ທຸກຄົນເອົາໃຈໃສ່ປະກອບສ່ວນເຂົ້າຮ່ວມການສະແດງດ້ວຍຄວາມຮັບຜິດຊອບ ແລະ ມີຜົນສໍາເລັດ ໃນການທີ່ຈະເປັນເຈົ້າພາບຈັດງານມະຫະກຳກິລາແຫ່ງຊາດ ຄັ້ງທີ 13 ທີ່ແຂວງຈຳປາສັກ ໃນປີ 2028.
ຂ່າວ-ພາບ: ຈັນທະວີສັກ