ວັນທີ 25 ຕຸລາ 2024, ພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ແຂວງຈໍາປາສັກ ຮ່ວມກັບ ມະຫາວິທະຍາໄລຈໍາປາສັກ, ໂຮງຮຽນວິຈິດສິນຊັ້ນກາງແຂວງຈໍາປາສັກ ແລະ ສູນການຄ້າ ແຟຣນຊີບມໍ ໄດ້ຈັດຈັດງານ ຫອມກິ່ນລາວເດີມ 2024 ຢູ່ສູນການຄ້າເເຟຣນຊີບມໍຫຼັກ 2 ນະຄອນປາກເຊ ໂດຍການເຂົ້າຮ່ວມຂອງ ທ່ານ ອາລຸນໄຊ ສູນນະລາດ ເຈົ້າແຂວງຈໍາປາສັກ.
ການຈັດງານ “ ຫອມກິ່ນນລາວເດີມ ປີ 2024 ” ຄັ້ງນີ້ ເພື່ອເປັນການອະນຸລັກຮັກສາຮີດຄອງປະເພນີ, ວິຖີຊີວິດ, ວັດທະນະທຳລາວ ທັງເປັນການສົ່ງເສີມການທ່ອງ ທ່ຽວລາວ ໂດຍການສະທ້ອນໃຫ້ເຫັນວີຖີຊີວິດ, ທຳນຽມປະເພນີ - ວັດທະນະທຳຂອງຄົນລາວທີ່ສືບທອດກັນມາແຕ່ສະໄໝບູຮານນະການ ພ້ອມທັງສົ່ງເສີມ ທັກສະດ້ານສີລະປະການແຕ້ມ, ຄວດ, ການປັ້ນຫຼ່ໍ ແລະ ອື່ນໆ ຂອງລາວທີ່ມີມາແຕ່ດົນນານ
ກິດຈະກໍາທີ່ຈັດຂຶ້ນໃນງານຄັ້ງນີ້ ໄດ້ນໍາເອົາສິ່ງທີ່ມີຄວາມທັນສະໄໝ ມາປະສົມປະສານເຂົ້າກັບ ວັດທະນະທຳ, ຮີດຄອງປະເພນີອັນດີງາມຂອງຊາດ ແລະ ທ້ອງຖິ່ນ ເພື່ອວາງສະແດງ, ໂຄສະນາເຜີຍແຜ່ໃຫ້ອະນຸຊົນຄົນຮຸ່ນຫຼັງ ໄດ້ຮັບຮູ້ເຖິງຄຸນຄ່າທາງດ້ານວັດທະນະທໍາ, ຮີດຄອງປະເພນີ ນັບແຕ່ວັດທະນະທຳໃນການນຸ່ງຖືທີ່ເປັນເອກະ ລັກ, ສີລະປະ, ຫັດຖະກໍາ, ປະຕິມາກໍາ ລວມທັງອາຫານການກິນແບບລາວໆ ເພື່ອປູກຈິດສໍານຶກໃຫ້ລູກຫຼານ ເອົາໃຈໃສ່ປະກອບສ່ວນໃນການອະນຸລັກ, ປົກປັກຮັກສາ ສິ່ງເຫຼົ້ານີ້ໃຫ້ຍືນຍົງຄົງຢູ່ຄຽງຄູ່ກັບຊາດລາວ ແລະ ຄົນລາວຕະຫຼອດໄປ.
ທ່ານ ອາລຸນໄຊ ສູນນະລາດ ມີຄໍາເຫັນວ່າ: ການຈັດງານຄັ້ງນີ້ ໄດ້ສ່ອງແສງໃຫ້ເຫັນເຖິງຄວາມພະຍາຍາມຂອງທຸກພາກສ່ວນທີ່ກ່ຽວຂ້ອງ ເພື່ອປະກອບສ່ວນສົ່ງ ເສີມ, ອະນຸລັກຮັກສາ ແລະ ເສີມຂະຫຍາຍສິລະປະ,ວັດທະນະທຳ, ຮີດຄອງປະເພນີອັນດີງາມຂອງຊາດ ແລະ ທ້ອງຖິ່ນ, ງານຄັ້ງນີ້ ໄດ້ອອກແບບຢ່າງລະອຽດອ່ອນ, ມີຫົວຄິດປະດິດສ້າງ ເຊິ່ງສະແດງອອກເຖິງຄວາມຕັ້ງໃຈຂອງຜູ້ອອກແບບ, ຜູ້ຈັດງານ ດ້ວຍເຫື່ອແຮງ, ສະຕິປັນຍາຂອງຄົນຮຸ່ນໜຸ່ມ ເຮັດໃຫ້ງານຄັ້ງນີ້ ມີຄຸນນະພາບ, ມີດ້ານເນື້ອໃນຄວາມໝາຍເລິກເຊິ່ງ ແລະ ເຂົ້າໃຈງ່າຍ.
ຂ່າວ-ພາບ: ທູນທອງໃຈ
