ໃນລະຫວ່າງວັນທີ 5-6 ທັນວາ 2024 ຄະນະນໍາເມືອງຊານໄຊ ແຂວງອັດຕະປື ແຫ່ງສາທາລະນະລັດ ປະຊາທິປະໄຕ ປະຊາຊົນລາວ ແລະ ຄະນະນໍາເມືອງດັກໄລ ແຂວງກອນຕູມ ແຫ່ງສາທາ ລະນະລັດ ສັງຄົມນິຍົມຫວຽດນາມ ໄດ້ຮ່ວກັນຮ່ວມກັນລົງກວດກາສະພາບຄວາມປອດໄພຢູ່ເສັ້ນຊາຍແດນຕິດຈອດລະຫວ່າງ ເມືອງ ຊານໄຊ ແລະ ເມືອງດັກໄລ, ໂດຍມີ ສະຫາຍ ສູວັນສີ ແກ້ວວີເສີດ ກຳມະການພັກແຂວງ ເລຂາພັກເມືອງ ເຈົ້າ ເມືອງຊານໄຊ ພ້ອມຄະນະ,ມີສະຫາຍ ໂດ໊ສຸມ ຮອງເຈົ້າເມືອງ -ເມືອງດັກໄລ ພ້ອມຄະນະ.
ການລົງກວດກາຄັ້ງນີ້, ຄະນະນໍາຂອງສອງເມືອງໄດ້ຮັບຟັງການລາຍງານສະພາບການຢູ່ຕາມລຽບຊາຍແດນກ່ຽວກັບປະ ກົດການຫຍໍ້ທໍ້ຕ່າງໆທີ່ເກີດຂື້ນ ແລະ ສະພາບການລົງແກ້ໄຂໃນໄລຍະຜ່ານມາ,ຈາກນັ້ນຄະນະທັງສອງເມືອງໄດ້ລົງກວດກາຕົວຈິງກ່ຽວກັບສະພາບການຮ່ວມມືວຽກງານປ້ອງກັນຄວາມສະຫງົບ, ຄວາມປອດໄພຢູ່ເສັ້ນຊາຍແດນ, ກວດກາຄວາມເປັນລະບຽບຮຽບຮ້ອຍ ແລະ ບ່າງບັນຫາທັງສອງເມືອງໄດ້ເປັນເອກະພາບກັນ ຄື: ສະພາບເຂດນໍ້າແດນດິນ ແລະເຂດຫຼັກໝາຍຊາຍແດນ ເສັ້ນ ທາງລຽບຊາຍແດນ, ສະພາບຄວາມປອດໄພຢູ່ເຂດຊາຍແດນມີຄວາມສະຫງົບປອດໄພໂດຍພື້ນຖານ, ບັນດາສອງກໍາລັງປ້ອງກັນຄວາມສະຫງົບ ມີຄວາມສາມັກຄີມິດຕະພາບພາບ, ພິເສດບໍ່ມີການບຸກລຸກລ່ວງລໍ້າເຂດນໍ້າແດນດິນຂອງກັນ ແລະ ກັນ, ທັງສອງຝ່າຍຈະສືບຕໍ່ປະສານສົມທົບ ແລະຊີ້ນຳບັນດາຂະແໜງການທີ່ຢູ່ເຂດຊາຍແດນ ເພີ່ມທະວີກວດກາ, ຄວບຄຸມປະຊາຊົນ, ສິນຄ້າ ແລະ ພາຫະນະຜ່ານຊາຍແດນ ແລະ ເປີດດ່ານທ້ອງຖິ່ນໃຫ້ຖືກ ຕ້ອງຕາມກົດໝາຍຂອງແຕ່ລະຝ່າຍ.
ສອງກໍາລັງປ້ອງກັນຄວາມສະຫງົບຊາຍແດນຈະປະສານສົມ ທົບເຊິ່ງກັນ ແລະ ກັນໃນການຕິດຕາມກວດກາລາດຕະເວນ, ກວດກາຄົນເຂົ້າ-ອອກເມືອງຕາມເສັ້ນທາງລຽບຊາຍແດນ, ຫຼັກໝາຍຊາຍແດນຢູ່ໃນລະຫວ່າງສອງເມືອງ, ແຕ່ລະປີສອງຝ່າຍຈັດຕັ້ງຄະນະຜູ້ແທນຂະແໜງການຕ່າງໆ ເພື່ອສົມທົບກັນກວດ ກາ, ພົບປະແລກປ່ຽນ, ກວດກາສະພາບຄວາມສະຫງົບ, ຄວາມ ເປັນລະບຽບຮຽບຮ້ອຍຢູ່ເຂດຊາຍແດນໂດຍອີງຕາມສະພາບ ການຕ່າງໆເກີດຂື້ນທີ່ບໍ່ອາດຄາດເນໄດ້, ສະເໜີໃຫ້ບັນດາເຈົ້າ ໜ້າທີ່ກ່ຽວຂ້ອງເອົາໃຈໃສ່ລົງທຶນກໍ່ສ້າງພື້ນຖານໂຄງລ່າງຢູ່ເຂດຊາຍແດນ ໂດຍສະເພາະການຍົກລະດັບດ່ານປະເພນີໃຫ້ເປັນດ່ານແຫ່ງຊາດ, ສອງຝ່າຍສືບຕໍ່ເພີ່ມທະວີຊີ້ນຳ-ນຳພາຂະແໜງການໂຄສະນາເຜີຍແຜ່ໃຫ້ປະຊາຊົນທັງສອງເມືອງທີ່ດຳລົງຊີວິດຕິດແປະກັບເສັ້ນຊາຍແດນ ບໍ່ໃຫ້ຕັດໄມ້ທຳລາຍປ່າ, ເຮັດໄຮ່-ເຮັດສວນ, ເພື່ອປ້ອງກັນ ແລະປົກປອງຮັກສາຊັບພະຍາກອນໃຫ້ຂຽວງາມຕະຫຼອດໄປ.
ທັງນີ້ກໍ່ເພື່ອຮັດແໜ້ນສາຍພົວພັນສາມັກຄີແບບພິເສດລະຫວ່າງສອງຊາດ,ລາວ-ຫວຽດນາມຫວຽດນາມ-ລາວ ໂດຍ ສະເພາະແມ່ນລະຫວ່າງສອງເມືອງສອງແຂວງ ຄື: ເມືອງຊານໄຊ ແຂວງອັດຕະປື ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ເມືອງດັກໄລ ແຂວງກອນຕູມ ແຫ່ງ ສາທາລະນະລັດ ສັງຄົມນິຍົມ ຫວຽດນາມ ໃຫ້ມີຄວາມໝັ້ນຄົງທະນົງແກ່ນຕະຫຼອດໄປ.
ຂ່າວ: ສຸກສະຫວ່າງ
