ປັດຈຸບັນຊາວນາຫຼາຍທ້ອງຖິ່ນໃນເມືອງຈອມເພັດ ກຳລັງຂຸ້ນຂ້ຽວທຳການຜະລິດ ນາປີຂອງຕົນ ເພື່ອເຮັດໃຫ້ຂະບວນການຜະລິດ ສຳເລັດທັນຕາມລະດູການ, ເພື່ອຮັບປະກັນ ໃຫ້ໄດ້ຜົນຜະລິດ ທີ່ມີປະສິດທິພາບສູງຂຶ້ນ. ໃນຂະນະດຽວກັນ, ປະຊາຊົນ ບ້ານປາກລຶມ ເມືອງຈອມເພັດ ແຂວງຫຼວງພະບາງ ກໍກຳລັງຂຸ້ນຂ້ຽວປັກດຳນາປີ ດ້ວຍບັນຍາກາດ ຟົດຟື້ນມ່ວນຊື່ນ, ເນື່ອງຈາກວ່າ ຟ້າຝົນ ໃນລະດູການຜະລິດນາປີນີ້ ອຸດົມສົມບູນ ແລະ ມີຄວາມຫວັງ ຈະໄດ້ຮັບຜົນຜະລິດຫລາຍກວ່າປີຜ່ານມາ.
ທ່ານ ສົມລອນ ນາຍບ້ານ-ບ້ານປາກລຶມ ໄດ້ໃຫ້ສຳພາດ ໃນວັນທີ 30 ມິຖຸນາ 2025 ນີ້ວ່າ: ມາຮອດປັດຈຸບັນ ການປັກດຳນາປີ ພາຍໃນບ້ານຂອງພວກເຮົາ ມີເນື້ອທີ່ທັງໝົດ 34,71 ເຮັກຕາ, ໄດ້ສຳເລັດໄປແລ້ວປະມານ 60 %, ໂດຍທົ່ວໄປແລ້ວ ປະຊາຊົນບ້ານປາກລຶມ ມີມູນເຊື້ອດຸໝັ່ນຂະຫຍັນພຽນ ແລະ ມີຄວາມຮັກແພງສາມັກຄີກັນ, ເຊິ່ງສະແດງອອກໃນການຊ່ວຍເຫລືອເຊິ່ງກັນ ແລະ ກັນ ໃນການເຮັດນາ ດ້ວຍການຢຶດຖືຮູບແບບ ແລກປ່ຽນແຮງງານກັນມາຕັ້ງແຕ່ຮຸ້ນພໍ່ ຮຸ້ນແມ່.
ສະມັດຕະພາບ ຂອງການຜະລິດ ຄິດສະເລ່ຍເຂົ້າເປືອກທີ່ໄດ້ຮັບພາຍໃນບ້ານໄດ້ 3,5 ໂຕນ/ເຮັກຕ່າ, ຊຶ່ງເຮັດໃຫ້ປະຊາຊົນສາມາດມີເຂົ້າກຸ້ມກິນຕະຫລອດປີ ແລະ ຂາຍຈຳນວນໜຶ່ງ. ໄປຄຽງຄູ່ກັບການຜະລິດເຂົ້ານາປີແລ້ວ, ພໍ່ແມ່ປະຊາຊົນຍັງໄດ້ປູກພືດຕາມລະດູ ແລະ ລ້ຽງສັດ ເປັນຕົ້ນ ງົວ, ຄວາຍ ເພື່ອເປັນລາຍໄດ້ເສີມ ແລະ ພ້ອມໄດ້ຝຸ່ນຈາກຝຸງສັດມາໃສ່ນານຳອີກ ເພື່ອເປັນການຫລຸດຄ່າໃຊ້ຈ່າຍ ຫລີກເວັ້ນການໃຊ້ປຸຍສານເຄມີ.
ພາບ,ຂ່າວ: ຕາດຳ ກະເສີມສຸກ
