ລັດຖະບານຍີ່ປຸ່ນໄດ້ໃຫ້ການຊ່ວຍເຫຼືອມູນຄ່າ 107,000 ໂດ ລາ ໃນການສະໜັບສະໜູນໂຄງການດ້ານການສຶກສາເພື່ອປັບ ປຸງສະພາບການຮໍ່າຮຽນ, ສິດສອນນັກຮຽນ ແລະ ຄູ-ອາຈານໃນແຂວງບໍ່ແກ້ວ ພາຍໃຕ້ໂຄງການເສີມສ້າງຄວາມໝັ້ນຄົງຂອງມະ ນຸດຂັ້ນຮາກຖານ (GGP).
ໂຄງການຈະໃຫ້ການສະໜັບສະໜູນທຶນຮອນເພື່ອກໍ່ສ້າງອາ ຄານຮຽນໃໝ່ ແລະ ຫ້ອງນໍ້າ, ພ້ອມທັງ ສະໜອງອຸປະກອນເຄື່ອງ ໃຊ້ໃຫ້ແກ່ໂຮງຮຽນອະນຸບານ-ປະຖົມສົມບູນບ້ານຕູບ ເມືອງຫ້ວຍຊາຍ ແຂວງບໍ່ແກ້ວ ເພື່ອປະກອບສ່ວນເຂົ້າໃນການຍົກລະດັບການສຶກສາຮໍ່າຮຽນຂອງໂຮງຮຽນດັ່ງກ່າວ.
ພິທີເຊັນສັນຍາຊ່ວຍເຫຼືອດັ່ງກ່າວໄດ້ຈັດຂຶ້ນໃນວັນທີ 24 ຕຸ ລານີ້ ທີ່ສະຖານທູດຍີ່ປຸ່ນປະຈຳລາວ. ຮ່ວມລົງນາມຄັ້ງນີ້ ໂດຍທ່ານ ໄຄອິຊີມິ ຊໍໂຕມຸ ເອກອັກຄະຣາຊະທູດ ຍີ່ປຸ່ນ ປະຈໍາ ສປປ ລາວ ແລະ ທ່ານ ສົມພິດ ຈັນທະວົງ ຫົວໜ້າຫ້ອງການສຶກສາທິ ການ ແລະ ກິລາເມືອງຫ້ວຍຊາຍ ມີ ທ່ານ ຄໍາຜະຫຍາ ພົມປັນຍາ ຮອງເຈົ້າແຂວງບໍ່ແກ້ວ ມີພາກສ່ວນທີ່ກ່ຽວຂ້ອງເຂົ້າຮ່ວມ.
ທ່ານ ໂຄອິຊີມີຊໍໂຕມຸ ກ່າວວ່າ: ໂຮງຮຽນດັ່ງກ່າວໃນປັດຈຸບັນແມ່ນຕັ້ງຢູ່ບ່ອນດິນຕໍ່າແຄມແມ່ນໍ້າຈຶ່ງມີຄວາມຈໍາເປັນໃນການເຄື່ອນຍ້າຍອາຄານຂຶ້ນທີ່ສູງເພື່ອປ້ອງກັນໄພນໍ້າຖ້ວມທີ່ຈະເກີດ ຂຶ້ນໃນອະນາຄົດ”, ໂຄງການເສີມສ້າງຄວາມໝັ້ນຄົງຂອງມະນຸດຂັ້ນຮາກຖານ (GGP) ແມ່ນການສະໜອງທຶນທີ່ຈໍາເປັນໃຫ້ແກ່ໂຄງການຂະໜາດນ້ອຍທີ່ໃຫ້ຜົນປະໂຫຍດໂດຍກົງແກ່ປະຊາຊົນຜູ້ອາໄສ ແລະ ມີຈຸດປະສົງເພື່ອການພັດທະນາເສດຖະ ກິດ-ສັງ ຄົມ ຂອງປະເທດລາວ ໂດຍອີງຕາມຄວາມຕ້ອງການພື້ນຖານຂອງມະນຸດເປັນຫຼັກ.
ລັດຖະບານຍີ່ປຸ່ນໄດ້ໃຫ້ການສະໜັບສະໜູນໃຫ້ແກ່ແຂວງບໍ່ແກ້ວ ລວມເປັນມູນຄ່າຫຼາຍກວ່າ 1,000,000 ໂດລາ ໃນດ້ານການສຶກສາ, ໂຄງລ່າງພື້ນຖານ ແລະ ກະສິກຳນັບແຕ່ປີ 1992 ເປັນຕົ້ນມາ, ປະເທດຍີ່ປຸ່ນຈະສືບຕໍ່ໃຫ້ການຊ່ວຍເຫຼືອປະເທດລາວໃນການປັບປຸງພື້ນຖານຊີວິດການເປັນຢູ່ຂັ້ນຮາກຖານຕໍ່ໄປເພື່ອຮັບປະກັນ“ບໍ່ໃຫ້ມີໃຜຖືກຖິ້ມໄວ້ທາງຫຼັງ” ຜ່ານການແກ້ໄຂຄວາມແຕກໂຕນໃນພາກພື້ນ.
ຂ່າວ-ພາບ: ສຳນານ, ຫນັງສືພິມປະຊາຊົນ
