ໃນໂລກປັດຈຸບັນ, ຄວາມບໍ່ແນ່ນອນທີ່ເກີດຈາກລັດທິຝ່າຍດຽວ ແລະ ລັດທິປົກປ້ອງການຄ້ານັ້ນພວມແຜ່ລາມກວ້າງຂວາງອອກໄປ, ເຮັດໃຫ້ຜູ້ບໍລິຫານລະດັບສູງຂອງບໍລິສັດຂ້າມຊາດເປັນຫ່ວງເປັນໃຍຢ່າງໜັກໜ່ວງ. ແຕ່ເມື່ອເຂົາເຈົ້າເລັງສາຍຕາມາທີ່ປະເທດຈີນແລ້ວ ແມ່ນສາມາດເບິ່ງເຫັນເຖິງອະນາຄົດທີ່ສົດໃສ ແລະ ມີກຳລັງໃຈທີ່ໜ້າຕື່ນເຕັ້ນທີ່ສຸດ.
ຕອນເຊົ້າວັນທີ 28 ມີນານີ້, ທ່ານ ສີຈິ້ນຜິງ ປະທານປະເທດຈີນໄດ້ຕ້ອນຮັບການເຂົ້າຢ້ຽມຄຳນັບຂອງຄະນະຜູ້ແທນວົງການອຸດສາຫະກຳການຄ້າສາກົນ. ທ່ານ ປະທານ ສີຈິ້ນຜິງ ເນັ້ນໜັກວ່າ: ຈີນມີເວທີທຸລະກິດຂະໜາດໃຫຍ່, ຕະຫຼາດມີອະນາຄົດອັນກວ້າງຂວາງ, ການຄາດຫວັງດ້ານນະໂຍບາຍມີຄວາມໜັກແໜ້ນ, ທົ່ວປະເທດມີຄວາມໝັ້ນຄົງທີ່ດີ, ເປັນດິນແດນທີ່ເໝາະສຳລັບການລົງທຶນດໍາເນີນທຸລະກິດຂອງວິສາຫະກິດຕ່າງປະເທດ, ປະທານຄະນະບໍລິຫານວິສາຫະກິດລະດັບໂລກ, ຫົວໜ້າຜູ້ອຳນວຍການບໍລິຫານງານ ແລະ ຜູ້ຕາງໜ້າສະພາການຄ້າ 40 ກວ່າທ່ານທີ່ເຂົ້າຮ່ວມການພົບປະຄັ້ງນີ້ ຖືວ່າຈີນເປັນ “ແດນຂຽວແຫ່ງຄວາມແນ່ນອນ ແລະ ດິນແດນທີ່ດຶງດູດການລົງທຶນດໍາເນີນທຸລະກິດ”, ພ້ອມທັງສະແດງຄວາມມຸ່ງໝັ້ນທີ່ຈະເປີດກວ້າງການລົງທຶນ ແລະ ການຮ່ວມມືກັບຈີນຢ່າງເດັດດ່ຽວໜຽວແໜ້ນ ເພື່ອພັດທະນາທຸລະກິດຢູ່ຈີນໃຫ້ນັບມື້ເລິກເຊິ່ງກວ່າເກົ່າ.
ສຳລັບນັກລົງທຶນແລ້ວ, ຄວາມແນ່ນອນເປັນປະຖົມປັດໄຈເບື້ອງຕົ້ນສຳລັບການພັດທະນາ. ກ່ອນອື່ນໝົດ, ຄວາມແນ່ນອນຂອງຈີນແມ່ນມາຈາກຄວາມຄາດຫວັງດ້ານນະໂຍບາຍເປັນຕົ້ນຕໍ. ຄືດັ່ງທ່ານປະທານສີຈິ້ນຜິງໄດ້ເນັ້ນໜັກໃນໂອກາດຕ້ອນຮັບການເຂົ້າຢ້ຽມຄຳນັບຂອງຄະນະຜູ້ແທນວົງການອຸດສາຫະກຳການຄ້າສາກົນ ໂດຍກ່າວວ່າ: “ຈີນຈະເປີດປະຕູສູ່ພາຍນອກນັບມື້ນັບກວ້າງອອກ, ນະໂຍບາຍທີ່ດຶງດູດທຶນຈາກຕ່າງປະເທດບໍ່ມີການປ່ຽນແປງ ແລະ ຈະບໍ່ປ່ຽນແປງ”. ຄວາມແນ່ນອນຂອງຈີນຍັງມາຈາກສະພາບແວດລ້ອມການພັດທະນາທີ່ໝັ້ນຄົງ.
ຈີນ ໄດ້ຮັກສາສະຖຽນລະພາບທາງດ້ານການເມືອງ ແລະ ຄວາມສະຫງົບທາງສັງຄົມມາເປັນເວລາຍາວນານ ແລະ ໄດ້ຮັບການຍອມຮັບວ່າເປັນໜຶ່ງໃນປະເທດທີ່ມີຄວາມປອດໄພທີ່ສຸດໃນໂລກ ເຮັດໃຫ້ມີຄວາມໝັ້ນໃຈໃນການລົງທຶນດໍາເນີນທຸລະກິດຢູ່ຈີນຢ່າງບໍ່ຕ້ອງສົງໄສໃດໆ.
ຈີນ ເປັນຕະຫຼາດການບໍລິໂພກທີ່ໃຫຍ່ເປັນອັນດັບສອງຂອງໂລກ ແລະ ມີກຸ່ມຄົນທີ່ມີລາຍຮັບປານກາງຂະໜາດໃຫຍ່ທີ່ສຸດຂອງໂລກ, ແຝງຊ້ອນໄປດ້ວຍກຳລັງການລົງທຶນ ແລະ ການບໍລິໂພກທີ່ໃຫຍ່ຫຼວງ ເຊິ່ງໄດ້ສ້າງຄວາມອາດສາມາດຫຼາຍກວ່າເກົ່າໃຫ້ແກ່ທຶນຈາກຕ່າງປະເທດທີ່ “ລົງເລິກດໍາເນີນທຸລະກິດຢູ່ຈີນ”.
ສາມາດຄາດຄະເນໄດ້ວ່າ, ທຶນຈາກຕ່າງປະເທດຈະໄດ້ຮັບໂອກາດຫຼາຍຂຶ້ນກວ່າເກົ່າຢູ່ປະເທດຈີນ ແລະ ຈະມີຄວາມຮູ້ສຶກຢ່າງເລິກເຊິ່ງກວ່າເກົາວ່າ: ການກ້າວເດີນໄປໜ້າພ້ອມໆກັບຈີນຄືການກ້າວເດີນໄປໜ້າພ້ອມກັບໂອກາດ, ການເຊື່ອໝັ້ນປະເທດຈີນຄືການເຊື່ອໝັ້ນໃນອະນາຄົດ ແລະ ການລົງທຶນຢູ່ຈີນ ຄືການລົງທຶນເພື່ອອະນາຄົດທີ່ຈະເລີນຮຸ່ງເຮືອງ.
ທີ່ມາ: CMG
