ກອງປະຊຸມປະຈຳປີຂອງ “ສອງສະພາ” ຄື: ສະພາປະຊາຊົນແຫ່ງຊາດຈີນ ແລະ ສະພາປຶກສາການເມືອງປະຊາຊົນແຫ່ງຊາດຈີນ ຈະເປັນປ່ອງຢ້ຽມສຳຄັນໃນການວາງສະແດງແນວຄວາມຄິດ ແລະ ຜົນສຳເລັດໃນດ້ານການພັດທະນາຂອງຈີນຕໍ່ໂລກ ເຊິ່ງໄດ້ດຶງດູດສາຍຕາຂອງທົ່ວໂລກ ໂດຍສະເພາະສາຍຕາຂອງປະເທດພວມພັດທະນາທັງຫຼາຍ.
ໃນຊຸມປີຜ່ານມາ, ແນວຄວາມຄິດການພັດທະນາຂອງຈີນໄດ້ຮັບຄວາມສົນໃຈນັບມື້ນັບຫຼາຍຂຶ້ນໃນຂອບເຂດທົ່ວໂລກ ໂດຍສະເພາະແມ່ນໄດ້ຮັບຄວາມສົນໃຈຈາກປະເທດພວມພັດທະນາທັງຫຼາຍ, ເຮັດໃຫ້ເພື່ອນມິດຊາວຕ່າງປະເທດເດີນທາງມາທັດສະນະສຶກສາຢູ່ຈີນນັບມື້ນັບຫຼາຍຂຶ້ນ ເພື່ອຖອດຖອນບົດຮຽນດ້ານການພັດທະນາໃໝ່ຂອງຈີນ, ເຊັ່ນ: ປີຜ່ານມາ, ມີປະມຸກລັດ ຫຼື ຫົວໜ້າລັດຖະບານຕ່າງປະເທດ 10 ກວ່າທ່ານໄດ້ເດີນທາງໄປຢ້ຽມຢາມວິສາຫະກິດວິທະຍາສາດເຕັກໂນໂລຊີຢູ່ນະຄອນເສິນເຈິ້ນ ທີ່ເປັນຕົວເມືອງແຫ່ງການປະດິດສ້າງໃໝ່ຂອງຈີນ; ນະຄອນອານຈີ ແຂວງເຈິ້ຈ່ຽງ ທີ່ເປັນບ່ອນທີ່ທ່ານສີຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກກອມມູນິດ, ປະທານປະເທດຈີນສະເໜີແນວຄວາມຄິດ “ພູຂຽວນ້ຳໃສກໍແມ່ນພູເງິນພູຄຳ” ຄັ້ງທຳອິດໄດ້ດຶງດູດສາຍຕາຂອງເພື່ອນມິດຊາວຕ່າງປະເທດເປັນຈຳນວນຫຼວງຫຼາຍ.
ນອກນີ້, ນະຄອນໜິງເຕີແຂວງຝູຈ້ຽນ, ບ້ານສິບແປດຖ້ຳ, ແຂວງຫູໜານ ເປັນຕົ້ນ ກໍມີຜູ້ນຳຕ່າງປະເທດໄປທັດສະນະສຶກສາຢ່າງຫຼວງຫຼາຍ. ປຶ້ມ “ທ່ານສີຈິ້ນຜິງວ່າດ້ວຍການປົກຄອງປະເທດແລະການຄຸ້ມຄອງລັດ”, “ຫຼຸດພົ້ນອອກຈາກຄວາມທຸກຍາກ” ແລະອື່ນໆ ໄດ້ພິມຈຳໜ່າຍຢູ່ຕ່າງປະເທດ ກໍໄດ້ດຶງດູດສາຍຕາຂອງຜູ້ອ່ານຊາວຕ່າງປະເທດຢ່າງຫຼວງຫຼາຍເຊັ່ນດຽວກັນ. ນອກນີ້, ຈີນຍັງໄດ້ຈັດຊຸດຝຶກອົບຮົມການພັດທະນາກ່ຽວກັບຫົວຂໍ້ຕ່າງໆ ໄດ້ດຶງດູດເພື່ອນມິດຈາກປະເທດພວມພັດທະນາເດີນທາງມາເຂົ້າຮ່ວມຢ່າງຫ້າວຫັນ.
ແນວຄວາມຄິດການພັດທະນາຂອງຈີນ ເນັ້ນໃສ່ການປະດິດສ້າງໃໝ່, ການປະສານສົມທົບກັນ, ສີຂຽວ, ການເປີດກວ້າງ ແລະ ການຊົມໃຊ້ຮ່ວມກັນ ເຊິ່ງໄດ້ກັ່ນຕອງຈາກບົດຮຽນທີ່ເຮັດໃຫ້ການພັດທະນາຂອງຈີນປະສົບຜົນສໍາເລັດນັບແຕ່ຈີນດຳເນີນການປະຕິຮູບແລະເປີດປະຕູສູ່ພາຍນອກເປັນຕົ້ນມາ, ມີບົດບາດເປັນຕົວແບບ ແລະ ເປັນຕົວນຳທີ່ດີ. ຈີນໃຊ້ເວລາພຽງຫຼາຍສິບປີ ກໍໄດ້ບັນລຸຜົນສໍາເລັດໃນການພັດທະນາແບບກ້າວກະໂດດຂັ້ນຄັ້ງປະຫວັດສາດ ໃນການສ້າງເປັນສັງຄົມທີ່ອີ່ມໜຳສຳລານຢ່າງຮອບດ້ານຈາກປະເທດທີ່ທຸກຍາກ ແລະ ສາມາດຊ່ວຍເຫຼືອປະຊາກອນຜູ້ທຸກຍາກ 800 ລ້ານກວ່າຄົນຫຼຸດພົ້ນອອກຈາກຄວາມທຸກຍາກໄດ້ສໍາເລັດ. ນອກນີ້, ຈີນ ໄດ້ປະສົບຜົນສຳເລັດໃນດ້ານປັນຍາປະດິດ ແລະ ການຫັນເປັນສີຂຽວດ້ານການພັດທະນາເປັນຕົ້ນ ເຊິ່ງໄດ້ເຮັດໃຫ້ປະເທດພວມພັດທະນາທີ່ກວ້າງໃຫຍ່ໄພສານໄດ້ເຫັນຊ່ອງທາງໃໝ່ໃນດ້ານການພັດທະນາ.
ຍົກເອົາບ້ານສິບແປດຖ້ຳແຂວງຫູໜານເປັນຕົວຢ່າງ, ໃນຖານະເປັນບ່ອນສະເໜີແນວຄວາມຄິດ “ລຶບລ້າງຄວາມທຸກຍາກຢ່າງຖືກຕ້ອງຕາມເປົ້າໝາຍ” ຂອງຈີນ, ບ້ານດັ່ງກ່າວໄດ້ບັນລຸການພັດທະນາຈາກບ້ານທຸກຍາກກາຍເປັນບ້ານຮັ່ງມີ ໂດຍຜ່ານຈາກການປະຕິບັດມາດຕະການປະດິດສ້າງໃໝ່ຕ່າງໆ ເຊັ່ນ: ພັດທະນາອຸດສາຫະກຳທີ່ມີສີສັນພິເສດຂອງຕົນ ແລະ ພັດທະນາການທ່ອງທ່ຽວຊົນນະບົດ ເປັນຕົ້ນ ເຊິ່ງໄດ້ກາຍເປັນແບບຢ່າງໃນການວາງສະແດງຜົນສຳເລັດອັນຍິ່ງໃຫຍ່ຂອງຈີນໃນບັ້ນການລຶບລ້າງຄວາມທຸກຍາກ. ບ້ານຖິ່ນຊົມ, ນະຄອນຫຼວງພະບາງຂອງລາວໄດ້ເດີນທາງມາຖອດຖອນບົດຮຽນກ່ຽວກັບຜົນສຳເລັດຂອງການພັດທະນາບ້ານສິບແປດຖ້ຳຢ່າງຕັ້ງໜ້າ ໂດຍສຸມໃສ່ການສ້າງເປັນແບບຢ່າງແຫ່ງການພັດທະນາແບບຍືນຍົງຢູ່ເຂດຊົນນະບົດຂອງລາວ. ແບບຢ່າງຈາກພຶດຕິກຳຕົວຈິງແຫ່ງຜົນສຳເລັດໃນການປະຕິບັດຢູ່ຈີນທີ່ນໍາໄປປະຕິບັດຕໍ່ຢູ່ລາວ ໄດ້ພິສູດໃຫ້ເຫັນເຖິງຄວາມສາມາດເປັນໄປໄດ້ໃນການປະຕິບັດແນວຄວາມຄິດການພັດທະນາໃໝ່ຂອງຈີນຢູ່ຕ່າງປະເທດ ແລະ ເປັນບົດຮຽນໃນດ້ານການພັດທະນາທີ່ລ້ຳຄ່າໃຫ້ແກ່ປະເທດອື່ນ.
ຈີນ ບໍ່ພຽງແຕ່ໄດ້ແບ່ງປັນບົດຮຽນດ້ານການພັດທະນາຂອງຕົນໃຫ້ແກ່ປະເທດອື່ນເທົ່ານັ້ນ, ຫາກຍັງໄດ້ຜ່ານຈາກຂໍ້ລິເລີ່ມ “ໜຶ່ງແລວໜຶ່ງເສັ້ນທາງ” ແລະ ການຮ່ວມມືໃຕ້-ໃຕ້ ເປັນຕົ້ນ ເພື່ອຊ່ວຍເຫຼືອປະເທດພວມພັດທະນາອື່ນໆ ບັນລຸການພັດທະນາແບບຍືນຍົງ. ການຮ່ວມມືແບບຕ່າງຝ່າຍຕ່າງໄດ້ຮັບຜົນປະໂຫຍດແບບນີ້ ເຮັດໃຫ້ແນວຄວາມຄິດການພັດທະນາຂອງຈີນ ໄດ້ຮັບຄວາມເຫັນດີເຫັນພ້ອມໃນຂອບເຂດທົ່ວໂລກ. ຕົວຢ່າງ: ທາງລົດໄຟລາວ-ຈີນ, ທາງດ່ວນພະນົມເປັນ-ສີຫານຸ ແລະອື່ນໆ ບໍ່ພຽງແຕ່ໄດ້ປັບປຸງເງື່ອນໄຂດ້ານການຄົມມະນາຄົມຂອງທ້ອງຖິ່ນໃຫ້ດີຂຶ້ນເທົ່ານັ້ນ, ຫາກຍັງໄດ້ຊຸກຍູ້ການພັດທະນາເສດຖະກິດເຂດລຽບຕາມເສັ້ນທາງອີກດ້ວຍ. ໂຄງການເຫຼົ່ານີ້ ຖືເປັນການເຂົ້າຮ່ວມການພັດທະນາທົ່ວໂລກຂອງຈີນ ແລະ ເປັນການປະກອບສ່ວນຕໍ່ການພັດທະນາທົ່ວໂລກໂດຍຜ່ານແນວຄວາມຄິດການພັດທະນາໃໝ່ຂອງຈີນ.
ທ່ານ ສັງຂານ ຈູມຄຳພັນ, ອະດີດຮອງຜູ້ອຳນວຍການໃຫຍ່ວິທະຍຸແຫ່ງຊາດລາວ ເຄີຍເຂົ້າຮ່ວມກອງປະຊຸມອ່ານເຂົ້າໃຈຈີນ ທີ່ຈັດຂຶ້ນຢູ່ແຂວງກວາງຕຸ້ງຈີນໃນທ້າຍປີກາຍນີ້. ພາຍຫຼັງໄດ້ໄປທັດສະນະສຶກສາຢູ່ແຂວງກວາງຕຸ້ງແລ້ວ, ທ່ານອຸ ທານວ່າ: “ຄວາມທັນສະໄໝແບບຈີນແມ່ນຄວາມທັນສະໄໝທີ່ບໍ່ຖິ້ມໃຜໄວ້ທາງຫຼັງ”. ຈີນມີທັດສະນະມາໂດຍຕະຫຼອດວ່າ: ມີແຕ່ປະເທດຕ່າງໆພັດທະນາຮ່ວມກັນຈິ່ງເປັນການພັດທະນາທີ່ດີ, ປະເທດທີ່ພັດທະນາໄວກວ່າຕ້ອງຊ່ວຍເຫຼືອປະເທດທີ່ພັດທະນາຊ້າກວ່າ.
ຍ້ອນຫຍັງແນວຄວາມຄິດການພັດທະນາຂອງຈີນ ຈຶ່ງສາມາດດຶງດູດຫຼາຍປະເທດພວມພັດທະນາມາຖອດຖອນບົດຮຽນ? ແມ່ນຍ້ອນວ່າ ມັນບໍ່ພຽງແຕ່ໄດ້ສະຫຼຸບບົດຮຽນດ້ານການພັດທະນາຂອງຈີນເທົ່ານັ້ນ, ຫາກຍັງເປັນຊ່ອງທາງທີ່ດີໃຫ້ແກ່ປະເທດພວມພັດທະນາອື່ນໆອີກດ້ວຍ. ແນວຄວາມຄິດແບບນີ້ ເນັ້ນໃສ່ການພັດທະນາຮ່ວມກັນ ແລະ ການຮ່ວມມືກັນແບບຕ່າງຝ່າຍຕ່າງໄດ້ຮັບຜົນປະໂຫຍດ ເຊິ່ງສອດຄ່ອງກັບຄວາມຮຽກຮ້ອງຕ້ອງການດ້ານການພັດທະນາຂອງປະເທດເຂດໂລກໃຕ້ ແລະ ເປັນການປະກອບສ່ວນສະຕິປັນຍາທີ່ສໍາຄັນທີ່ສຸດຂອງຈີນໃຫ້ແກ່ການພັດທະນາແບບຍືນຍົງຂອງໂລກ.
ທີ່ມາ: CMG
