ໃນວັນທີ 10 ກັນຍາ ນີ້, ທ່ານ ນາງ ສາຍໃຈ ບຸດດາກກັງ ຮອງຫົວໜ້າຫ້ອງການ ຖວທ ເມືອງດາກຈຶງ ພ້ອມດ້ວຍຄະນະ ແລະ ພະນັກງານວິຊາການ ໄດ້ລົງຕິດຕາມ, ກວດກາປ້າຍໂຄສະນາທີ່ບໍ່ຖືກຕ້ອງຕາມລະບຽບກົດໝາຍ ຢູ່ພາຍໃນເມືອງດາກຈຶງ.
ຜ່ານການລົງຕິດຕາມ ແລະ ກວດກາຕົວຈິງ ແມ່ນຍັງພົບເຫັນຫລາຍບັນຫາ ເນື່ອງຈາກມີຜູ້ປະກອບການທຸລະກິດຈຳນວນ ຫລາຍ ຍັງບໍ່ເອົາໃຈໃສ່ ແລະ ໃຫ້ຄວາມຮ່ວມມືໃນການແຈ້ງດຳເນີນການຂໍຂຶ້ນປ້າຍໂຄສະນາ ນຳພາກສ່ວນຮັບຜິດຊອບວຽກງານຄຸ້ມຄອງປ້າຍຂອງຫ້ອງການຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ (ຖວທ) ເມືອງ, ເຮັດໃຫ້ມີປ້າຍໂຄສະນາຕິດຕັ້ງບໍ່ເປັນລະບຽບ, ຕິດຕັ້ງຊະຊາຍ, ປ້າຍບໍ່ມີເຈົ້າຂອງ, ມີການລັກຕິດຕັ້ງ, ປ້າຍບໍ່ໄດ້ມາດຕະຖານ ແລະ ບໍ່ຖືກຕ້ອງຕາມຫລັກການໃຊ້ພາສາລາວ, ປ້າຍທີ່ມີແຕ່ພາສາຕ່າງປະເທດ, ພາສາຕ່າງປະເທດໃຫຍ່ກວ່າພາສາລາວ ແລະ ບາງປ້າຍການອອກແບບ, ສີ, ຂະໜາດ ບໍ່ຖືກຕ້ອງຕາມລະບຽບ ເປັນຕົ້ນ.
ໃນໂອກາດດັ່ງກ່າວນີ້, ຄະນະຮັບຜິດຊອບທີ່ໄດ້ລົງຕິດຕາມ, ກວດກາ ຈຶ່ງໄດ້ສຶກສາອົບຮົມ, ກ່າວເຕືອນຜູ້ປະກອບການ ແລະ ຮື້-ຖອນປ້າຍໂຄສະນາ ຈໍານວນ 36 ປ້າຍ, ພ້ອມທັງໄດ້ຮຽກຮ້ອງໃຫ້ຜູ້ປະກອບການທັງພາກລັດ ແລະ ເອກະຊົນ ທີ່ນໍາໃຊ້ປ້າຍຈົ່ງໃຫ້ການຮ່ວມມື ໃນການຕິດຕັ້ງປ້າຍໃຫ້ຖືກຕ້ອງຕາມລະບຽບ ເພື່ອເຮັດໃຫ້ເມືອງດາກຈຶງມີຄວາມງົດງາມ, ທັງນີ້ກໍເພື່ອເຮັດໃຫ້ການຄຸ້ມຄອງປ້າຍໂຄສະນາ ແລະ ບໍລິການຢູ່ເມືອງດາກຈຶງ ມີຄວາມເປັນລະບຽບຮຽບຮ້ອຍ ແລະ ຖືກຕ້ອງຕາມລະບຽບກົດໝາຍ.
ຂ່າວ-ພາບ: ພຸດທະໄຊ ຍົວມະນີ
