ເນື່ອງໃນໂອກາດວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 70 ປີ (22/3/1955 – 22/3/2025), ວັນທີ 20 ມີນາ 2025, ສະຫາຍປະລິນຍາເອກ ອາລຸນໄຊ ສູນນະລາດ ກຳມະການສູນກາງພັກ ເລຂາຄະນະບໍລິຫານງານພັກແຂວງຈຳປາສັກ ມີຄໍາເຫັນວ່າ: ປີ 2025 ເປັນປີທີ່ມີຄວາມໝາຍສໍາຄັນ ສໍາລັບທົ່ວພັກ, ທົ່ວລັດ, ທົ່ວກຳລັງປະກອບອາວຸດ ແລະ ທົ່ວປວງລາວທັງຊາດ ເວົ້າລວມ, ເວົ້າສະເພາະກໍແມ່ນປວງຊົນລາວຊາວແຂວງຈຳປາສັກ ໄດ້ພ້ອມກັນກະກຽມສະເຫຼີມສະຫຼອງ 3 ວັນປະຫວັດສາດ ໂດຍສະເພາະແມ່ນ ວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 70 ປີ. ວັນສ້າງຕັ້ງພັກປະຊາຊົນ ປະຕິວັດລາວຄົບຮອບ 70 ປີ, ເນື້ອແທ້ແມ່ນເປັນການຫວນຄືນມູນເຊື້ອແຫ່ງການຕໍ່ສູ້ປົດປ່ອຍຊາດຢ່າງມີໄຊ ແລະ ຢັ້ງຢືນຄືນໝາກຜົນໆງານຕົວຈິງ ທີ່ພັກປະຊາຊົນ ປະຕິວັດລາວ ຍາດມາໄດ້ຕະຫຼອດໄລຍະ 70 ປີ.
ວັນສ້າງຕັ້ງພັກ ປະຊາຊົນ ປະຕິວັດລາວ ວັນທີ 22/3/1955 ເປັນວັນ ໄຊຊະນະຂອງຊົນຊັ້ນກຳມະກອນ ແລະ ຊາວຜູ້ອອກແຮງງານ, ເປັນວັນແຫ່ງການເອກອ້າງທະນົງໃຈຂອງທົ່ວພັກ, ທົ່ວກອງທັບ ແລະ ທົ່ວປວງຊົນບັນດາເຜົ່າ ພາຍໃຕ້ການນໍາພາຂອງພັກ. ຕະຫຼອດ 70 ປີ ແຫ່ງການນໍາພາ ພັກເຮົາໄດ້ແບກຫາບພາລະກຳປະຫວັດສາດອັນຍິ່ງໃຫຍ່ໃນແຕ່ລະໄລຍະທີ່ແຕກຕ່າງກັນ ແລະ ສາມາດປະຕິບັດພາລະກຳປະຫວັດສາດເຫຼົ່ານັ້ນໄດ້ຢ່າງສະຫງ່າງາມ.
ສະຫາຍ ປະລິນຍາເອກ ອາລຸນໄຊ ສູນນະລາດ ກ່າວຕື່ມວ່າ: ນັບແຕ່ມື້ສ້າງຕັ້ງພັກ ປີ 1955 – 1975, ພັກເຮົາໄດ້ນໍາພາຂະບວນການຕໍ່ສູ້ຂອງປະຊາຊົນລາວ ຕ້ານລັດທິລ່າເມືອງຂຶ້ນແບບໃໝ່ ລວມທັງອິດທິກຳລັງປະຕິການສໍາເລັດຜົນຢ່າງມີໄຊ, ສາມາດປົດປ່ອຍປະເທດຊາດ ແລະ ສ້າງຕັ້ງ ສປປ ລາວ ຂຶ້ນຢ່າງສະຫງ່າຜ່າເຜີຍ ໃນວັນທີ 2 ທັນວາ 1975, ໃນນັ້ນ ອັນພິເສດທີ່ສຸດແມ່ນການຢຶດອໍານາດໂດຍ ສັນຕິວິທີແບບ “ ບົວບໍ່ຊໍ້າ – ນໍ້າບໍ່ຂຸນ ແຕ່ຈັບປາໄດ້ທັງໝົດ” ດ້ວຍສາມບາດຄ້ອນຍຸດທະສາດ ຄື: ການລຸກຮື້ຂຶ້ນຂອງມະຫາຊົນ, ການລູກຂຶ້ນແຍກຕົວອອກຈາກຜູ້ບັນຊາເກົ່າຂອງທະຫານຝ່າຍວຽງຈັນ, ການໜູນໜີບຢ່າງແຂງແຮງຈາກ ກຳລັງປະກອບອາວຸດປະຕິວັດ. ໄລຍະແຕ່ປີ 1975 – 1985 ພັກເຮົາ ໄດ້ນໍາພາສ້າງຕັ້ງລະບົບອຳນາດປະຊາທິປະໄຕ ປະຊາຊົນ ແຕ່ສູນກາງລົງຮອດ ຮາກຖານ ໃນຂອບເຂດທົ່ວປະເທດສໍາເລັດຜົນ; ພ້ອມກັນນັ້ນ ກໍສາມາດປົກປັກຮັກສາໝາກຜົນຂອງການປະຕິວັດ ກໍຄືລະບອບໃໝ່ໄວ້ໄດ້ຢ່າງໝັ້ນຄົງ ໄປຄຽງຄູ່ກັບການຟື້ນຟູບູລະນະ ແລະ ສ້າງສາປະເທດຊາດເຮົາຄືນໃໝ່, ຜາບແພ້ ກົນອຸບາຍຮຸກຮານ ແລະ ບຽດຢຶດເອົາດິນແດນ, ລວມທັງການປິດລ້ອມຂອງອິດທິກຳລັງປໍລະປັກຈາກພາຍນອກ. ໄລຍະແຕ່ປີ 1986 ເຖິງປັດຈຸບັນ, ພັກເຮົາໄດ້ນໍາພາລິເລີ່ມ ແລະ ຈັດຕັ້ງປະຕິບັດແນວທາງການປ່ຽນແປງໃໝ່ ທີ່ມີຫຼັກການຂອງພັກ, ສົ່ງເສີມກຳລັງແຮງຂອງທຸກພາກສ່ວນເສດຖະກິດ ແລະ ທຸກຊັ້ນຄົນ ເຂົ້າໃນພາລະກິດປົກປັກຮັກສາ ແລະ ສ້າງສາປະເທດຊາດ ເຮັດໃຫ້ເສດຖະກິດຂະຫຍາຍຕົວໃນລະດັບສູງ ທັງມີລັກສະນະຕໍ່ເນື່ອງ ແລະ ຊີວິດການເປັນຢູ່ຂອງປະຊາຊົນໄດ້ຮັບການປັບປຸງດີຂຶ້ນ, ພ້ອມນີ້ ກໍເປີດກວ້າງການພົວພັນຮ່ວມມືກັບຕ່າງປະເທດ ເຮັດໃຫ້ບົດບາດຂອງ ສປປ ລາວ ເວົ້າລວມ, ເວົ້າສະເພາະແມ່ນເຮັດໃຫ້ແຂວງຈຳປາສັກ ໄດ້ຮັບການຍົກສູງໃນເວທີພາກພື້ນ ແລະ ສາກົນ, ປະເທດຊາດ ກໍຄືແຂວງຈໍາປາສັກຂອງພວກເຮົາພວມໄດ້ຮັບການພັດທະນາດ້ວຍບາດກ້າວ ແລະ ຖ່ວງທ່າໃໝ່ ເຂົ້າສູ່ໄລຍະໃໝ່.
ສະຫາຍ ປະລິນຍາເອກ ອາລຸນໄຊ ສູນນະລາດ ກ່າວຕື່ມອີກວ່າ: ໃນຊຸມປີຕໍ່ໜ້າ, ພັກເຮົາຍິ່ງມີຄວາມຮັບຜິດຊອບອັນໜັກໜ່ວງ ໃນການນໍາພາປົກປັກຮັກສາ ແລະ ສ້າງສາພັດທະນາປະເທດຊາດ ເຊິ່ງໜ້າທີ່ອັນສໍາຄັນແມ່ນສືບຕໍ່ຍູ້ແຮງພາລະກິດປ່ຽນແປງໃໝ່ຮອບດ້ານ ມີຫຼັກການຂອງພັກ ເພື່ອນໍາພາປະເທດຊາດກ້າວຂຶ້ນຢ່າງໜັກແໜ້ນສູ່ຈຸດໝາຍກຳນົດໄວ້ໃຫ້ເປັນຈິງ. ເພື່ອສືບຕໍ່ນໍາພາການຈັດຕັ້ງພັກ, ພະນັກງານສະມາຊິກພັກ, ໃນທົ່ວແຂວງຈຳປາສັກພວກເຮົາ ໃຫ້ປອດໃສ, ເຂັ້ມແຂງ ແລະ ໜັກແໜ້ນ ສົມເປັນແກນນໍາໃນລະບົບການເມືອງຂອງລະບອບປະຊາທິປະໄຕ ປະຊາຊົນ, ນໍາພາປະຊາຊົນບັນດາເຜົ່າຊາວແຂວງຈຳປາສັກ ປະຕິບັດ 2 ໜ້າທີ່ຍຸດທະສາດ ຄື: ປົກປັກຮັກສາປະເທດຊາດ ແລະ ກໍ່ສ້າງລະບອບປະຊາທິປະໄຕ ປະຊາຊົນ ຕາມຈຸດໝາຍສັງຄົມນິຍົມ, ຕ້ອງອອກແຮງສ້າງ ແລະ ປັບປຸງຕົນເອງ ຕາມ5 ຫຼັກການ 3 ທິດນໍາຂອງພັກ ຄື: ສືບຕໍ່ຢຶດໝັ້ນລັດທິມາກ – ເລນິນ, ແນວຄິດ ໄກສອນ ພົມວິຫານ ແລະ ມູນເຊື້ອອັນດີງາມຂອງພັກ ເປັນພື້ນຖານແນວຄິດ, ທິດສະດີຂອງພັກ, ເສີມຂະຫຍາຍລັກສະນະນຳໜ້າ, ລັກສະນະສຶກສາອົບຮົມ ແລະ ລັກສະນະຕໍ່ສູ້ຂອງຊົນຊັ້ນກຳມະກອນ, ກໍ່ສ້າງ ແລະ ປັບປຸງພັກໃຫ້ປອດໃສ, ເຂັ້ມແຂງ ແລະ ໜັກແໜ້ນ; ເອົາໃຈໃສ່ຍົກສູງການຈັດຕັ້ງພັກ ຕາມຫຼັກການລວມສູນປະຊາທິປະໄຕ, ນໍາພາເປັນໝູ່ຄະນະ, ບຸກຄົນຮັບຜິດຊອບ, ພັກມີລະບຽບວິໄນເຂັ້ມງວດ, ເຄົາລົບ, ປະຕິບັດລັດຖະທຳມະນູນ ແລະ ກົດໝາຍ, ສະມາຊິກພັກສະເໝີພາບກັນ ບົນພື້ນຖານກົດລະບຽບຂອງພັກ ແລະ ກົດໝາຍຂອງລັດ; ຖືເອົາຄວາມສາມັກຄີເປັນປຶກແຜ່ນເປັນຫຼັກການພື້ນຖານຂອງພັກບົນພື້ນຖານແນວທາງ, ນະໂຍບາຍ ແລະ ກົດລະບຽບຂອງພັກ, ຮັບປະກັນຄວາມສະເໝີພາບທາງດ້ານການເມືອງ – ແນວຄິດ, ການຈັດຕັ້ງ ແລະ ການກະທຳຂອງ ພັກ; ຖືເອົາປະຊາຊົນເປັນກົກ, ຮັບໃຊ້ປະຊົນດ້ວຍຄວາມບໍລິສຸດສັດຊື່, ເຄື່ອນໄຫວຕາມແນວທາງມະຫາຊົນຂອງພັກ, ອີງໃສ່ມະຫາຊົນ ແລະ ຜ່ານຂະບວນການປະຕິວັດຂອງມະຫາຊົນ ເພື່ອກໍ່ສ້າງ ແລະ ຂະຫຍາຍພັກ; ຖືເອົາການຮ່ວມຊີວິດການເມືອງຢ່າງເປັນປົກກະຕິ, ຕິຊົມຂອງຕົນເອງ, ຕິຊົມກັນ ເປັນກົດເກນແຫ່ງການຄົງຕົວ ແລະ ຂະຫຍາຍຕົວຂອງພັກ; ຕ້ອງອອກແຮງກໍ່ສ້າງພັກໃຫ້ມີຄວາມປອດໃສ, ເຂັ້ມແຂງ ແລະ ໜັກແໜ້ນ ທາງດ້ານການເມືອງ-ແນວຄິດ, ການຈັດຕັ້ງ ແລະ ແບບແຜນການນາພາຂອງພັກ, ເພີ່ມທະວີວຽກງານປ້ອງກັນພັກ, ເດັດດ່ຽວຕ້ານການເສື່ອມຄຸນທາດການເມືອງພາຍໃນພັກ; ອອກແຮງກໍ່ສ້າງ, ປັບປຸງພັກ ໂດຍຖືເອົາຄຸນນະພາບເປັນກົກ, ບູລະນະ ແລະ ພັດທະນາຕົນເອງຢ່າງບໍ່ຢຸດຢັ້ງ ເພື່ອໃຫ້ທຽບທັນກັບຄວາມຮຽກຮ້ອງຕ້ອງການແຫ່ງການນໍາພາຂອງພັກໃນແຕ່ລະໄລຍະ; ສົມທົບແໜ້ນລະຫວ່າງການເພີ່ມທະວີການນໍາພາຂອງພັກ ກັບການເຊີດຊູຄວາມສັກສິດໃນການຄຸ້ມຄອງລັດ, ເສີມຂະຫຍາຍບົດບາດເປັນເຈົ້າການຂອງແນວລາວສ້າງຊາດ, ບັນດາອົງການຈັດຕັ້ງມະຫາຊົນ ແລະ ອົງການຈັດຕັ້ງ ສັງຄົມ. ໃນອກາດທີ່ມີຄວາມໝາຍຄວາມສໍາຄັນ ຂອງ 70 ປີ ແຫ່ງການກໍ່ສ້າງພັກປະຊາຊົນ ປະຕິວັດລາວ, ຂ້າພະເຈົ້າ ຂໍສະແດງຄວມຮູ້ບຸນຄຸນຕໍ່ການນໍາຂອງພັກ ທັງຮຸ່ນກ່ອນ ແລະ ປັດຈຸບັນ; ອວຍພອນແດ່ການນໍາຂອງພັກ ແລະ ສະມາຊິກພັກປະຊາຊົນ ປະຕິວັດລາວ ຈົ່ງສືບຕໍ່ເປັນຄັນທຸງນໍາພາ – ຊີ້ນໍາ ພາລະກິດປ່ຽນແປງໃໝ່ຮອບດ້ານ ແລະ ມີຫຼັກການຂອງພັກ, ນໍາພາທົ່ວປວງຊົນລາວທັງຊາດ ປະຕິບັດໜ້າທີ່ປົກປັກຮັກສາປະເທດຊາດ ແລະ ໝາກຜົນຂອງການປະຕິວັດ ໄວ້ໃຫ້ໝັ້ນຄົງ; ສ້າງການຫັນປ່ຽນທີ່ແຂງແຮງ, ເລິກເຊິ່ງ ແລະ ຮອບດ້ານ ໃຫ້ແກ່ການບຸລະນະລະບອບປະຊາທິປະໄຕ ປະຊາຊົນ ໃຫ້ກ້າວເດີນໄປສູ່ຈຸດໝາຍສັງຄົມນິຍົມ ຢ່າງໜັກແໜ້ນ ເຮັດໃຫ້ປະເທດຊາດ ມັ່ງຄັ່ງເຂັ້ມແຂງ, ປະຊາຊົນ ຮັ່ງມີຜາສຸກ, ສັງຄົມມີຄວາມສາມັກຄີເປັນປຶກແຜ່ນ, ປະຊາທິປະໄຕ, ຍຸຕິທຳ ແລະ ສີວິໄລ.
” ພັກປະຊາຊົນປະຕິວັດລາວ ທີ່ມີກຽດສະຫງ່າໝັ້ນຍືນ; ພັກປະຊາຊົນ ປະຕິວັດລາວ ຜູ້ຈັດຕັ້ງ ແລະ ນໍາພາທຸກໄຊຊະນະຂອງການປະຕິວັດລາວ ໝັ້ນຍືນ; ຊົມເຊີຍວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 70 ປີຢ່າງສຸດໃຈ “.
ຂ່າວ-ພາບ: ທູນທອງໃຈ
