ວັນທີ 17 ທັນວາ 2024, ທ່ານ ນາງ ວັດທະນາ ດາລາລອຍ ຮັກສາການຜູ້ວ່າການ ທະນາຄານແຫ່ງ ສປປ ລາວ ພ້ອມດ້ວຍຄະນະ ໄດ້ເດີນທາງເຂົ້າຮ່ວມກອງປະຊຸມ ທະວິພາຄີ ຄັ້ງທີ 12 ລະຫວ່າງ ທະນາຄານແຫ່ງ ສປປ ລາວ (ທຫລ) ແລະ ທະນາຄານແຫ່ງລັດ ຫວຽດນາມ (ທຫວ) ປະຈໍາປີ 2024 ທີ່ ນະຄອນຫຼວງ ຮ່າໂນ້ຍ, ສສ. ຫວຽດນາມ; ໂດຍການນໍາພາຂອງທ່ານ ນາງ ວັດທະນາ ດາລາລອຍ ຮັກສາການຜູ້ວ່າການ ທຫລ ແລະ ທ່ານ ນາງ ຫງວຽນ ທິ ຮົງ ຜູ້ວ່າການ ທຫວ ພ້ອມດ້ວຍຄະນະຜູ້ແທນຂອງທັງສອງຝ່າຍເຂົ້າຮ່ວມ.
ກອງປະຊຸມ ໄດ້ພ້ອມກັນປຶກສາຫາລື ແລະ ແລກປ່ຽນຂໍ້ມູນຂ່າວສານກ່ຽວກັບສະພາບເສດຖະກິດມະຫາພາກ ກໍ່ຄືບົດຮຽນໃນການຄຸ້ມຄອງຂະແໜງທະນາຄານ ແລະ ການຄຸ້ມຄອງເງິນຕາ ຕ່າງປະເທດ. ພ້ອມກັນນີ້, ສອງທະນາຄານ ຍັງໄດ້ຕິດຕາມຊຸກຍູ້ວຽກງານສົ່ງເສີມການນໍາໃຊ້ສະກຸນເງິນທ້ອງຖິ່ນ (ກີບ-ດົງ) ຊຶ່ງຖືວ່າຈະເປັນບາດກ້າວອັນສໍາຄັນໃນການຈັດຕັ້ງຜັນຂະຫຍາຍທິດຊີ້ນໍາຂອງລັດຖະບານສອງປະເທດ ໃຫ້ເປັນຮູບປະທໍາຫຼາຍຂຶ້ນ, ທັງເປັນການສົ່ງເສີມການຊໍາລະສະສາງລະຫວ່າງສອງປະເທດ ລາວ-ຫວຽດນາມ. ນອກຈາກນີ້, ກອງປະຊຸມຍັງໄດ້ຮັບຟັງການ ລາຍງານຜົນການຮ່ວມມືສອງຝ່າຍ ລະຫວ່າງໂຮງພິມທະນະບັດຂອງສອງທະນາຄານກາງ ແລະ ການຮ່ວມມືທາງດ້ານວິຊາການສອງຝ່າຍ ປະຈໍາປີ 2024 ແລະ ນໍາສະເໜີແຜນການຮ່ວມມືສອງຝ່າຍ ປະຈໍາປີ 2025. ກອງປະຊຸມດັ່ງກ່າວ ໄດ້ດໍາເນີນໄປດ້ວຍບັນຍາກາດທີ່ເຕັມໄປດ້ວຍໄມຕີຈິດມິດຕະພາບ ແລະ ມີຜົນສໍາເລັດອັນຈົບງາມ, ເຮັດໃຫ້ການຮ່ວມມືສອງຝ່າຍຂອງສອງທະນາຄານກາງ ສາມາດຂະຫຍາຍເຂົ້າສູ່ລວງກວ້າງ ແລະ ລວງເລິກຂຶ້ນຕື່ມອີກລະດັບໜຶ່ງ.
ຄຽງຄູ່ກັບກອງປະຊຸມດັ່ງກ່າວ, ທັງສອງທະນາຄານກາງ ຍັງໄດ້ພົບປະແລກປ່ຽນ ແລະ ຮັບຟັງການລາຍງານຜົນການດໍາເນີນທຸລະກິດໃນໄລຍະຜ່ານມາຂອງທະນາຄານທຸລະກິດ ຫວຽດນາມ ທີ່ມາດຳເນີນທຸລະກິດຢູ່ ສປປ ລາວ ຊຶ່ງໂດຍລວມເຫັນວ່າ: ມີຜົນສໍາເລັດເປັນຢ່າງດີ ຊຶ່ງໄດ້ເປັນການປະກອບສ່ວນເຂົ້າໃນການພັດທະນາເສດຖະກິດຂອງ ສປປ ລາວ ໃຫ້ມີການຂະຫຍາຍຕົວ ຕາມຄາດໝາຍແຜນການທີ່ກຳນົດໄວ້.
ການເຂົ້າຮ່ວມກອງປະຊຸມ ຄັ້ງທີ 12 ນີ້, ເປັນການສືບຕໍ່ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືແບບພິເສດລະຫວ່າງ ລາວ-ຫວຽດນາມ ເວົ້າລວມ, ເວົ້າສະເພາະກໍ່ຄືການພົວພັນຮ່ວມມືລະຫວ່າງສອງທະນາຄານກາງ ໃຫ້ນັບມື້ນັບແໜ້ນແຟ້ນຍິ່ງໆຂຶ້ນ.
ຂ່າວ: ກົມຮ່ວມມືສາກົນ. ທະນາຄານ ແຫ່ງ ສປປລ ລາວ
