ທ່ານ ລັນ ແສງອາພອນ ຮອງລັດຖະມົນຕີ ກະຊວງໂຍທາທິ ການແລະຂົນສົ່ງ (ຍທຂ) ລາຍງານໃນກອງປະຊຸມສະຫຼຸບວຽກງານ ຍທຂ ປະຈໍາປີ 2023 ຜ່ານມາວ່າ: ໂຄງການກໍ່ສ້າງທາງດ່ວນ ແຕ່ນະຄອນຫຼວງວຽງຈັນຫາບໍ່ເຕັນ ໄດ້ແບ່ງອອກເປັນ 4 ໄລຍະ ຄື: ໄລຍະທີ 1 ນະຄອນຫຼວງວຽງຈັນ–ວັງວຽງ ລວງຍາວ 109 ກິໂລແມັດ ໄດ້ສໍາເລັດການກໍ່ສ້າງ ແລະ ເປີດໃຫ້ບໍລິການຕັ້ງແຕ່ປີ 2021 ເປັນຕົ້ນມາ. ສ່ວນໄລຍະທີ 2 ວັງວຽງ ຫາ ຫຼວງພະບາງ ໄດ້ສໍາເລັດໂດຍພື້ນຖານໃນການສໍາຫຼວດອອກແບບເບື້ອງຕົ້ນ; ໄລຍະທີ 3 ຫຼວງພະບາງຫາອຸດົມໄຊ ຢູ່ໃນຂັ້ນຕອນພິຈາລະນາບົດບັນທຶກຮ່ວມມືພັດທະນາກັບຜູ້ລົງທຶນ ແລະ ໄລຍະທີ 4 ອຸດົມໄຊຫາບໍ່ເຕັນ ໄດ້ເຊັນບົດບັນທຶກ MOU ຮ່ວມກັບບັນດາບໍລິສັດທີ່ຈະມາພັດທະນາ ຊຶ່ງເຫັນດີຕໍ່ອາຍຸ MOU ແລະກໍາລັງຢູ່ໃນຂັ້ນຕອນພິຈາລະນາປັບປຸງ MOU ກັບຜູ້ລົງທຶນ.
ມາຮອດປັດຈຸບັນ, ເສັ້ນທາງດ່ວນວຽງຈັນ-ວັງວຽງ ໄດ້ຮັບຄວາມນິຍົມຫຼາຍຈາກສັງຄົມ ເພາະຫຍໍ້ເວລາເດີນທາງລະຫວ່າງ ນະຄອນຫຼວງວຽງຈັນ ແລະສະຖານທີ່ທ່ອງທ່ຽວວັງວຽງ ຈາກ 3 ຊົ່ວໂມງເຄິ່ງ ເຫຼືອພຽງ 1 ຊົ່ວໂມງ. ນອກນັ້ນ, ເສັ້ນທາງສາຍນີ້ຍັງເປັນທາງດ່ວນສາຍທຳອິດຂອງ ສປປ ລາວ ທີ່ໄດ້ຮັບການຮ່ວມມືໂດຍລັດຖະບານລາວ ແລະກຸ່ມບໍລິສັດກໍ່ສ້າງ ແລະ ການລົງທຶນຢຸນນານຂອງ ສປຈີນ (YCIH).
ຂໍ້ມູນ: ໜັງສືພິມວຽງຈັນທາຍ
