ຄະນະນໍາ ກະຊວງຖະແຫລງຂ່າວ ວັດທະນະທໍາ ແລະ ທ່ອງທ່ຽວ ແລະ ກະຊວງສາທາລະນະສຸກ ຮ່ວມກັບພະແນກສາທາລະນະສຸກ ແຂວງ ສະຫວັນນະເຂດ ລົງສ້າງຂະບວນການສັກວັກຊີນປ້ອງກັນພະຍາດໝາກແດງໃຫຍ່ ແລະ ໝາກແດງນ້ອຍ ຢູ່ເມືອງ ອາດສະພັງທອງ ແຂວງ ສະຫວັນນະເຂດ ເຊຶ່ງພິທີໄດ້ຈັດຂຶ້ນໃນວັນທີ 27 ພຶດສະພານີ້ ທີ່ສຸກສາລາບ້ານຫລຽນໄຊ ເມືອງອາດສະພັງທອງ, ໂດຍການເຂົ້າຮ່ວມຂອງທ່ານ ໂພສີ ແກ້ວມະນີວົງ ຮອງລັດຖະມົນຕີ ກະຊວງຖະແຫຼງຂ່າວ ວັດທະນະທໍາ ແລະ ທ່ອງທ່ຽວ, ມີທ່ານ ໂພສີສ້ອຍ ອຸດຕະລາດ ຫົວໜ້າພະແນກຖະແຫຼງຂ່າວ ວັດທະນະທໍາ ແລະ ທ່ອງທ່ຽວແຂວງ ສະຫວັນນະເຂດ, ທ່ານ ສົມສະຫວາດ ວົງສາ ຫົວໜ້າກົມສື່ມວນຊົນ ກະຊວງ ຖະແຫຼງຂ່າວ ວັດທະນະທໍາ ແລະ ທ່ອງທ່ຽວ, ທ່ານ ວິສິດ ຄໍາລືຊາ ຫົວນ້າສູນສະຖີຕິ ແລະ ຂ່າວສານກະຊວງສາທາລະນະສຸກ ພ້ອມດ້ວຍຕາງໜ້າທຸກພາກສ່ວນຕະຫລອດຮອດພໍ່ແມ່ປະຊາຊົນເຂົ້າຮ່ວມຢ່າງພ້ອມພຽງ, ອົງການພັນທະມິດ ເພື່ອວັກຊີນ ແລະ ການສັກຢາປ້ອງກັນ ໃນທົ່ວໂລກ ຫລື GAVI, ລັດຖະບານປະເທດອົດສະຕຣາລີ, ອົງການຢູນິເຊັບ ແລະ ອົງການອະນາໄມໂລກ.
ດຣ ໄພທູນ ສີດາວົງ ຮອງຫົວໜ້າຫ້ອງການສາທາລະນະສຸກເມືອງ ອາດສະພັງທອງ ໄດ້ຂຶ້ນລາຍງານຫຍໍ້ກ່ຽວກັບຂະບວນການ ສັກວັກຊີນກັນພະຍາດໝາແດງໃຫຍ່ ແລະ ໝາກແດງນ້ອຍ ໃນຄັ້ງນີ້ວ່າ: ສໍາລັບຂະບວນການສັກວັກຊິນປ້ອງກັນພະຍາດໝາກແດງໃຫຍ່ ແລະ ໝາກແດງນ້ອຍ ຢູ່ພາຍໃນເມືອງອາດສະພັງທອງ ໄດ້ກະກຽມມາແຕ່ວັນທີ 8 ພຶດສະພາ ຈົນເຖິງວັນທີ 20 ພຶດສະພາຈຶ່ງເລີ່ມຈັດຕັ້ງປະຕິບັດເຄື່ອນໄຫວໃນການສັກຢາ ໂດຍໄດ້ແບ່ງໜ່ວຍງານພະນັກງານແພດໝໍ ທີ່ຮັບຜິດຊອບປະຈໍາຢູ່ແຕ່ລະຈຸດສັກ ລວມທັງໜ່ວຍເຄື່ອນທີ່, ເຊິ່ງທົ່ວເມືອງໄດ້ແບ່ງຈຸດສັກຢາອອກທັງໝົດ 97 ຈຸດສັກຢາໃນນີ້ ຈຸດໂຮງຮຽນອະນຸບານ 29 ຈຸດ, ຈໍານວນ 41 ບ້ານ, ໂດຍແນໃສ່ເດັກນ້ອຍອາຍຸນັບແຕ່ 9 ເດືອນຫາ 19 ເດືອນ ຫລື ອາຍຸແຕ່ 9 ເດືອນ ຫາ ເດັກລຸ່ມ 5 ປີ ແລະ ຜ່ານການຈັດຕັ້ງປະຕິບັດເຫັນວ່າພໍ່ແມ່ຜູ້ປົກຄອງເດັກໄດ້ໃຫ້ຄວາມສົນໃຈ ແລະ ນໍາເອົາລູກຫລານຂອງຕົນໄປສັກວັກຊິນປ້ອງກັນພະຍາດໝາກແດງໃຫຍ່ ແລະ ໝາກແດງນ້ອຍ ຢ່າງເປັນຂະບວນຟົດຟື້ນ
ໃນໂອກາດເຂົ້າຮ່ວມຂະບວນການ ການບໍລິການສັກວັກຊີນປ້ອງກັນພະຍາດໝາກແດງໃຫຍ່ ແລະ ໝາກແດງນ້ອຍ ທີ່ບ້ານຫລຽນໄຊ, ເມືອງ ອາດສະພັງທອງ ແຂວງ ສະຫວັນນະເຂດ ໃນຄັ້ງນີ້ ທ່ານ ໂພສີ ແກ້ວມະນີວົງ ຮອງລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ໄດ້ກ່າວຊົມເຊີຍການນໍາພາຂອງກະຊວງສາທາລະນະສຸກ ແລະ ຄວາມພະຍາຍາມອັນບໍ່ອິດເມື່ອຍຂອງພະນັກງານສາທາລະນະສຸກ ທີ່ເປັນຕົວເຊື່ອມອັນສຳຄັນໃນການສະໜອງວັກຊີນໃນຂອບເຂດທົ່ວປະເທດ, ຕັ້ງແຕ່ໃຈກາງເມືອງເຖິງເຂດຫ່າງໄກສອກຫຼີກ ແລະ ກະຊວງຖະແຫລງຂ່າວ ວັດທະນະທໍາ ແລະ ທ່ອງທ່ຽວ ແມ່ນໄດ້ປະກອບສ່ວນຢ່າງເຂັ້ມແຂວງໃນການໂຄສະນາໃຫ້ຄວາມຮູ້ ແກ່ຊຸ່ມຊົນກ່ຽວກັບຜົນດີຂອງການສັກວັກຊີນປ້ອງກັນພະຍາດໝາກແດງໃຫຍ່ ແລະ ໝາກແດງນ້ອຍ ຜ່ານຫລາຍຊ່ອງທາງ ເປັນຕົ້ນ: ທາງວິທະຍຸ, ໂທລະພາບ, ຫນັງສືພິມ, ສື່ສັງຄົມອອນລາຍ ແລະ ລະບົບໂທລະໂຄ່ງຊຸມຊົນ.
ສື່ມວນຊົນມີຄວາມສາມາດໃນການເຂົ້າເຖິງຊຸມຊົນຢ່າງກວ້າງຂວາງ ແລະ ຫຼາກຫຼາຍດ້ວຍຂໍ້ຄວາມທີ່ເຂົ້າໃຈງ່າຍ ທີ່ຈະສົ່ງຜົນສະທ້ອນທາງບວກໃຫ້ແກ່ສຸຂະພາບຂອງແມ່ ແລະເດັກ ແລະ ເຮັດໃຫ້ຄອບຄົວມີຂໍ້ມູນໃນການຕັດສິນໃຈ ກ່ຽວກັບການສັກຢາວັກຊີນໃຫ້ລູກຂອງເຂົາເຈົ້າ, ພ້ອມດຽວກັນນີ້ ອົງການຢູນິເຊັບປະຈໍາລາວຢືນຢັນຄືນຄວາມໝາຍໝັ້ນອັນບໍ່ປ່ຽນແປງໃນການຂອງອົງການຢູນິເຊັບ ຕໍ່ກັບສຸຂະພາບຂອງເດັກນ້ອຍລາວ ແລະ ການຂະຫຍາຍການເຂົ້າເຖິງການສັກຢາປ້ອງກັນຊີວິດ, ສື່ມວນຊົນລາວໄດ້ຊ່ວຍປຸກລະດົມ ພໍ່ແມ່ຜູ້ປົກຄອງເດັກ ເພື່ອຮັບປະກັນວ່າຈະບໍ່ມີເດັກນ້ອຍໄດ້ຮັບການປ້ອງກັນສຸຂະພາບ.
ທົ່ວເມືອງອາດສະພັງທອງ ແຂວງ ສະຫວັນນະເຂດ ມີປະຊາກອນທັງໝົດ 53.000 ກວ່າຄອບຄົວ, ໃນນີ້ ມີເດັກໃນກຸ່ມເປົ້າໝາຍສັກວັກຊິນປ້ອງກັນພະຍາດໝາກແດງໃຫຍ່ ແລະ ໝາກແດງນ້ອຍ ນັບແຕ່ອາຍຸ 9 ເດືອນ ຫາ 19 ເດືອນ ຫລື ລຸ່ມ 5 ປີ ມີທັງໝົດ 3.341 ຄົນ, ເຊິ່ງຜ່ານການຈັດຕັ້ງປະຕິບັດບໍລິການ ຂະບວນການສັກຢານັບແຕ່ວັນທີ 20 ຫາ 26 ພຶດສະພາ ນີ້, ສາມາດປະຕິບັດໄດ້ 2.812 ຄົນ ກວມເອົາຫລາຍກວ່າ 71 ສ່ວນ ຮ້ອຍ ແລະ ພ້ອມຈະສືບຕໍ່ຈັດຕັ້ງປະຕິບັດສັກຢາຈົນເຖິງວັນທີ 31 ພຶດສະພານີ້ ຈະໃຫ້ສໍາເລັດຮ້ອຍສ່ວນຮ້ອຍ.
ຂ່າວ: ວິທະຍຸກະຈາຍສຽງແຫ່ງຊາດລາວ ( ວສລ )
ພາບ: ເພັດຈິນດາ ໄຊຍະວົງ
