ວັນທີ 10 ມັງກອນ 2025ຜ່ານມານີ້, ທ່ານ ພັນຄຳ ວິພາວັນ ອະດີດນາຍົກລັດຖະມົນ ໄດ້ມາຢ້ຽມຢາມໂຮງງານຜະລິດຫົວອາຫານສັດໄຊມິ່ງເມືອງ ຕັ້ງຢູ່ບ້ານຫ້ວຍຂຸມ ເມືອງໄຊ ແຂວງອຸດົມໄຊ.
ໂຮງງານຫົວອາຫານສັດແຫ່ງນີ ໄດ້ກໍ່ສ້າງໃນປີ 2012 ແລະສຳເລັດໃນປີ 2013 ແລະ ມອບໂຮງງານຜະລິດອາຫານສັດພາກເໜືອ ເປັນຂອງຂັວນໃຫ້ແກ່ລັດຖະບານລາວ ໃນວັນທີ 29 ກັນຍາ 2013 ເພື່ອເປັນການຊ່ວຍພັດທະນາຂະແໜງປູກຝັງ, ລ້ຽງສັດໃນເຂດພາກ ເໜືອຂອງລາວ, ເປັນສັນຍາລັກໜຶ່ງແຫ່ງການຮ່ວມມືລາວ-ຈີນ, ຈີນ-ລາວ. ຊຶ່ງມີກຳລັງການຜະລິດຂອງໂຮງງານແມ່ນ 60,000 ໂຕນ/ປີ. ມາເຖິງປີ 2022 ໄດ້ຢຸດເຊົາການຜະລິດຊົ່ວຄາວ, ຕໍ່ມາໃນປີ 2023 ສືບຕໍ່ດຳເນີນກິດຈະການໂຮງງານ ອາຫານສັດ ແລະ ໄດ້ດໍາເນີນການຜະລິດອາຫານສັດ ເພື່ອສະ ໜອງ ໃຫ້ແກ່ການລ້ຽງສັດພາຍໃນແຂວງອຸດົມໄຊ ແລະ ແຂວງໃກ້ຄຽງພາຍໃນປະເທດລາວ.
ມາຮອດປັດຈຸບັນ ໄດ້ມີການຈັດຕັ້ງທາງດ້ານກົງຈັກບຸກຄະລາກອນ ແລະ ໄດ້ປັບປຸງບັນດາເຄື່ອງຈັກ, ໂຮງເຮືອນ ເພື່ອກຽມ ພ້ອມໃນການຜະລິດອາຫານສັດ, ສາມາດຜະລິດອາຫານສັດສໍາເລັດຮູບບາງຊະນິດໄດ້ຢ່າງເປັນປົກຕິ ພ້ອມຈະຈໍາໜ່າຍໃຫ້ແກ່ການລ້ຽງສັດ.
ການຜະລິດຫົວອາຫານສ່ວນໃຫຍ່ແມ່ນນຳໃຊ້ວັດຖຸດິບພາຍ ໃນເປັນຕົ້ນແມ່ນສາລີ 60% ພ້ອມນັ້ນກໍໄດ້ນຳເຂົ້າຈາກ ສປ ຈີນ ເປັນຕົ້ນແມ່ນ ປຼີມິກ, ກາກຖົ່ວເຫຼື່ອງ, ນໍ້າມັນຖົ່ວ. ປັດຈຸບັນສາມາດຜະລິດຫົວອາຫານໄກ່ນ້ອຍ, ໄກ່ກາງ, ໄກ່ໄຂ່, ໝູກາງ, ໝູໃຫຍ່, ເປັດນ້ອຍ ແລະ ຈຳໜ່າຍໃນບັນດາແຂວງພາກເໜືອຂອງລາວ.
ໃນໂອກາດນີ້, ທ່ານ ພັນຄຳ ວິພາວັນ ໄດ້ຊີ້ນຳໃຫ້ຄະນະນໍາໂຮງ ງານເອົາໃຈໃສ່ຜະລິດຫົວອາຫານ ໃຫ້ໄດ້ຄຸນນະພາບ, ສາມາດແຂ່ງ ຂັນໃນທ້ອງຕະຫຼາດ ພ້ອມທັງເຮັດໃຫ້ລາຄາຫົວອາຫານຖືກກວ່າຫົວອາຫານນຳເຂົ້າຈາກຕ່າງປະເທດ ແລະ ເນັນໃຫ້ການນຳແຂວງອຸດົມໄຊ ເປັນເຈົ້າການຕິດຕາມ,ກວດກາ ແລະ ຊຸກຍູ້ໃຫ້ການຜະ ລິດຫົວອາຫານ ຕອບສະໜອງໃຫ້ແກ່ປະຊາຊົນບັນດາເຜົ່າໃນການລ້ຽງສັດ ພ້ອມທັງສ້າງເງື່ອນໄຂໃຫ້ທາງໂຮງງານໄດ້ນຳໃຊ້ວັດຖຸດິບຈາກພໍ່ແມ່ປະຊາຊົນພາຍໃນແຂວງ ເພື່ອຊ່ວຍເຫຼືອປະຊົນໃຫ້ມີລາຍຮັບ ແລະ ສາມາດແກ້ໄຂຄວາມທຸກຍາກໄດ້ເທື່ອລະກ້າວ.
ຂ່າວ: ຄຳພູສະຫວັນ ເພັນສະຫວັດ, ພາບ: ສຸວັນທອງ ປັນຍາຂັນ
