ໄລຍະເຄື່ອນໄຫວເຮັດວຽກຢູ່ແຂວງ ຫຼວງນໍ້າທາ ໃນລະຫວ່າງ ວັນທີ 6-7 ສິງຫາ 2024 ທ່ານ ບົວຄົງ ນາມມະວົງ, ລັດຖະມົນຕີ, ຫົວໜ້າຫ້ອງວ່າການສຳນັກງານນາຍົກລັດຖະມົນຕີ (ຫສນຍ), ຫົວໜ້າກອງເລຂາຄະນະສະເພາະກິດ 19/ກມສພ ພ້ອມດ້ວຍຄະນະ ໄດ້ຮັບຟັງການແຈ້ງສະພາບການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ທີ່ພົ້ນເດັ່ນຂອງແຂວງ ຕິດພັນກັບການຈັດຕັ້ງປະຕິບັດ 2 ວາລະແຫ່ງຊາດ ຈາກທ່ານ ວຽງສະຫວັດ ສີພັນດອນ, ເຈົ້າແຂວງໆຫຼວງນ້ຳທາ ເຊິ່ງໃນໄລຍະ 6 ເດືອນຜ່ານມາ ເສດຖະກິດຂະຫຍາຍຕົວຕໍ່ເນື່ອງ ລະດັບ 5.7%, ລວມຍອດຜະລິດຕະພັນພາຍໃນ (GDP) ບັນລຸໄດ້ 7,393.17 ຕື້ກີບ, ການເກັບລາຍຮັບເຂົ້າງົບປະມານ ໄດ້ 1,322.83 ຕື້ກີບ ເທົ່າກັບ 82.83% ຂອງແຜນການປີ, ການປະຕິບັດແຜນລາຍຈ່າຍ ໄດ້ 198.89 ຕື້ກີບ ເທົ່າກັບ 50.23% ຂອງແຜນການປີ; ໂຄງລ່າງພື້ນຖານ ກໍ່ໄດ້ຮັບການປົກປັກຮັກສາ, ກໍ່ສ້າງ ແລະ ສ້ອມແປງ, ເສັ້ນທາງກໍ່ໄດ້ຮັບການປັບປຸງ ແລະ ຍົກລະດັບ ເຮັດໃຫ້ການສັນຈອນໄປມາໄດ້ເປັນປົກກະຕິ, ທົ່ວແຂວງ ມີເສັ້ນທາງເຂົ້າເຖິງທຸກບ້ານ, ປະຊາຊົນໄດ້ຊົມໃຊ້ໄຟຟ້າຖາວອນ ກວມ 87.84% ຂອງຈຳນວນຄົວເຮືອນ, ໄດ້ນຳໃຊ້ນໍ້າສະອາດ ກວມ 88.61% ຂອງຈໍານວນຄອບຄົວ, ມີບ້ານພົ້ນທຸກ ກວມ 75.28%, ມີຄອບຄົວພົ້ນທຸກ ກວມ 89.62%.
ໃນໂອກາດດຽວກັນ, ທ່ານ ລັດຖະມົນຕີ, ຫົວໜ້າ ຫສນຍ ກໍ່ໄດ້ມີຄຳເຫັນແລກປ່ຽນຄວາມຄິດເຫັນ ຕໍ່ຜູ້ເຂົ້າຮ່ວມ, ພ້ອມທັງ ສະເໜີໃຫ້ແຂວງ ແລະ ພາກສ່ວນກ່ຽວຂ້ອງຂອງແຂວງ ສືບຕໍ່ເອົາໃຈໃສ່ຕື່ມບາງດ້ານ ເປັນຕົ້ນ ຮັກສາຄວາມສະຫງົບຮອບດ້ານ ແລະ ຄວາມເປັນລະບຽບຮຽນຮ້ອຍພາຍໃນແຂວງ; ພັດທະນາລະບົບການຂົນສົ່ງ ລະຫວ່າງ ແຂວງຕໍ່ແຂວງ ໃຫ້ມີຄວາມໂລ່ງລ່ຽນ, ສະດວກສະບາຍ; ສຸມໃສ່ໃນການຜະລິດສິນຄ້າໃຫ້ຫຼາຍ ເພື່ອທົດແທນການນຳເຂົ້າສິນຄ້າ; ພັດທະນາລະບົບການບໍລິການ ການທ່ອງທ່ຽວ ໂດຍສະເພາະ ຂອດຂັ້ນການບໍລິການ ຢູ່ໂຮງແຮມ, ຮ້ານອາຫານ ແລະ ແຫຼ່ງທ່ອງທ່ຽວ, ທັງຮັບປະກັນຄວາມປອດໄພ ແລະ ສ້າງຄວາມປະທັບໃຈ ໃຫ້ແກ່ນັກທ່ອງທ່ຽວ; ພັດທະນາອຸດສາຫະກຳການປຸງແຕ່ງ ເພື່ອສ້າງເພີ່ມມູນຄ່າໃຫ້ຫຼາຍຂຶ້ນ; ກໍ່ສ້າງ ແລະ ພັດທະນາຊັບພະຍາກອນມະນຸດ ໃຫ້ສາມາດຕອບສະໜອງຄວາມຮຽກຮ້ອງຕ້ອງການຂອງວຽກງານ ໃນປັດຈຸບັນ ແລະ ອະນາຄົດ; ຖືເອົາການພັດທະນາເຂດເສດຖະກິດພິເສດ ບໍ່ເຕ່ນແດນງາມ ເປັນທ່າແຮງຍູ້ການພັດທະນາເສດຖະກິດຂອງແຂວງ; ພ້ອມກັນຈັດຕັ້ງຜັນຂະຫຍາຍມະຕິກອງປະຊຸມລັດຖະບານເປີດກວ້າງ ຄັ້ງທີ I ປີ 2024 ຄຽງຄູ່ກັບການຈັດຕັ້ງປະຕິບັດ ທິດຊີ້ນໍາຂອງສະຫາຍ ເລຂາທິການໃຫຍ່, ປະທານປະເທດ ທີ່ໄດ້ຊີ້ນຳ ໃນໂອກາດດຳເນີນກອງປະຊຸມເປີດກວ້າງດັ່ງກ່າວ ໃຫ້ປະກົດຜົນເປັນຈິງ; ສືບຕໍ່ຈັດຕັ້ງປະຕິບັດ ບັນດາໜ້າວຽກຈຸດສຸມ ແລະ ບັນດານິຕິກຳ ທີ່ຄະນະສະເພາະກິດ ຮັບຜິດຊອບແກ້ໄຂບັນຫາເຄັ່ງຮ້ອນທາງດ້ານເສດຖະກິດ-ການເງິນ ກໍ່ຄື ລັດຖະບານ ວາງອອກ ໃຫ້ມີການຫັນປ່ຽນຢ່າງຈະແຈ້ງດີຂຶ້ນ ແລະ ມີຄວາມຄືບໜ້າໄວ.
ຫຼັງຈາກນັ້ນ, ຄະນະຂອງທ່ານ ລັດຖະມົນຕີ, ຫົວໜ້າ ຫສນຍ ກໍ່ໄດ້ສືບຕໍ່ໄປຕິດຕາມເບິ່ງສະພາບການຄຸ້ມຄອງ ແລະ ພັດທະນາກິດຈະການສຳຄັນຕ່າງໆ ຢູ່ພາຍໃນເຂດເສດຖະກິດພິເສດ ບໍ່ເຕ່ນແດນງາມ ຕົວຈິງຕື່ມອີກ.
ຂ່າວ ແລະ ພາບ: ກົມປະຊາສຳພັນ ຫສນຍ
