ທ່ານ ສອນໄຊ ສີພັນດອນ ນາຍົກລັດຖະມົນຕີ ໄດ້ລົງໄປຢ້ຽມຢາມຖາມຂ່າວ ສຳຫຼວດກວດກາ, ມອບເງິນ ແລະ ເຄື່ອງຊ່ວຍເຫຼືອປະຊາຊົນບ້ານໂພນສົມບູນ

ຕອນເຊົ້າວັນທີ 28 ມີນາ 2026, ທ່ານ ສອນໄຊ ສີພັນດອນ ນາຍົກລັດຖະມົນຕີ ໄດ້ລົງໄປຢ້ຽມຢາມຖາມຂ່າວ ສຳຫຼວດກວດກາ, ມອບເງິນ ແລະ ເຄື່ອງຊ່ວຍເຫຼືອປະຊາຊົນບ້ານໂພນສົມບູນ ເມືອງສີໂຄດຕະບອງ ນະຄອນຫຼວງວຽງຈັນ ທີ່ໄດ້ຮັບຜົນກະທົບຈາກພະຍຸລະດູຮ້ອນພັດຜ່ານ ເຮັດໃຫ້ເກີດໝາກເຫັບໃຫຍ່ຕົກໃສ່ຫຼັງຄາເຮືອນເສຍຫາຍເປັນຈຳນວນຫຼວງຫຼາຍ.

ຫຼັງຈາກຢ້ຽມຢາມຖາມຂ່າວ ແລະ ກວດກາເບິ່ງຜົນເສຍຫາຍຕົວຈິງແລ້ວ, ນາຍົກລັດຖະມົນຕີໄດ້ມອບເງິນສົດ ແລະ ເຄື່ອງຊ່ວຍເຫຼືອຈຳນວນໜຶ່ງ ໃຫ້ປະຊາຊົນທີ່ຫຍຸ້ງຍາກຂາດເຂີນ ແລະ ຜູ້ໄດ້ຮັບຜົນກະທົບຈາກໄພທຳມະຊາດຄັ້ງນີ້.

ທັງນີ້, ແມ່ນສະແດງເຖິງຄວາມເປັນຫວ່ງເປັນໃຍຂອງລັດຖະບານທີ່ມີຕໍ່ປະຊາຊົນທີ່ໄດ້ຮັບຜົນກະທົບ ແລະ ໄດ້ຮັບຄວາມເດືອດຮ້ອນຈາກໄພພິບັດທາງທຳມະຊາດທີ່ເກີດຂຶ້ນ.