ໃນຕອນເຊົ້າຂອງວັນທີ 3 ຕຸລາ 2024 ທີ່ ນະຄອນຫຼວງໂດຮາ, ປະເທດ ກາຕາ, ທ່ານ ກິແກ້ວ ໄຂຄຳພິທູນ, ຮອງນາຍົກລັດຖະມົນຕີ ໄດ້ນຳພາຄະນະຜູ້ແທນ ແຫ່ງ ສປປ ລາວ ເຂົ້າຮ່ວມກອງປະຊຸມສຸດຍອດຂອບການຮ່ວມມື ເວທີປຶກສາຫາລື ແຫ່ງ ອາຊີ ຄັ້ງທີ 3 (3rd Asia Cooperation Dialogue Summit ຫຼື 3rd ACD) ພາຍໃຕ້ຄຳຂວັນ: “ການທູດດ້ານກິລາ (Sport Diplomacy)” ໂດຍການເປັນປະທານຂອງ ສົມເດັດ Sheikh Tamim Bin Hamad Al Thani, ປະມຸກລັດ ແຫ່ງ ປະເທດ ກາຕາ ແລະ ມີບັນດາປະມຸກລັດ/ຫົວໜ້າລັດຖະບານຈາກ 35 ປະເທດສະມາຊິກ ຂອບການຮ່ວມມືດັ່ງກ່າວ ເຂົ້າຮ່ວມຢ່າງພ້ອມພຽງ.
ກອງປະຊຸມ ໄດ້ຕີລາຄາສູງຕໍ່ການຈັດຕັ້ງປະຕິບັດກິດຈະກຳຕ່າງໆ ໄລຍະຜ່ານມາ ໂດຍສະເພາະ ແຜນງານບູລິມະສິດ ພາຍໃຕ້ວິໄສທັດ 2030 ຂອບການຮ່ວມມື ACD ເຊິ່ງກວມເອົາ 6 ຂະແໜງການເສົາຄໍ້າ. ພ້ອມດຽວກັນນີ້, ກອງປະຊຸມຍັງໄດ້ປຶກສາ ຫາລື ແລະ ແລກປ່ຽນຄຳຄິດເຫັນ ກ່ຽວກັບຄວາມພະຍາຍາມ ໃນການສືບຕໍ່ສ້າງພາກພື້ນອາຊີໃຫ້ເຂັ້ມແຂງ, ມີເສດຖະກິດຂະຫຍາຍຕົວ ໄປຄຽງຄູ່ກັບການພັດທະນາແບບຍືນຍົງ ໂດຍຖືເອົາບົດບາດຂອງວຽກງານການທູດກິລາ ເຂົ້າມາມີສ່ວນຮ່ວມຫຼາຍຂຶ້ນ.
ໃນໂອກາດນີ້, ທ່ານຮອງນາຍົກລັດຖະມົນຕີ ໄດ້ສະແດງຄວາມຊົມເຊີຍ ຕໍ່ບົດບາດສຳຄັນໃນການສົ່ງເສີມການທູດກິລາ ຂອງບັນດາປະເທດສະມາຊິກ ໃນໄລຍະຜ່ານມາ ເປັນຕົ້ນ: ການເປັນເຈົ້າພາບຈັດງານເຕະບານໂລກ ຂອງປະເທດ ກາຕາ ໃນປີ 2022 ແລະ ປະເທດອື່ນໆ ໃນພາກພື້ນອາຊີ, ພ້ອມທັງ ໄດ້ການແລກປ່ຽນຄຳເຫັນ ກ່ຽວກັບການສືບຕໍ່ຮ່ວມມືກັນ ທາງດ້ານຂໍ້ມູນຂ່າວສານ, ນະວັດຕະກໍາ ແລະ ເຕັກໂນໂລຊີທີ່ທັນສະໄໝ ສຳລັບລະບົບແຈ້ງເຕືອນເຫດສຸກເສີນດ້ານໄພພິບັດ, ການຈັດຕັ້ງປະຕິບັດບັນດາກິດຈະກຳ ພາຍໃຕ້ແຜນວຽກຂໍ້ລິເລີ່ມ ເພື່ອການເຊື່ອມໂຍງ ແລະ ເຊື່ອມຈອດ ດ້ານພື້ນຖານໂຄງລ່າງ, ການຄົມມະນາຄົມຂົນສົ່ງ ແລະ ສ້າງແລວເສດຖະກິດ ເພື່ອອຳນວຍຄວາມສະດວກໃຫ້ແກ່ການຄ້າ ແລະ ການລົງທຶນ ລະຫວ່າງ ປະເທດສະມາຊິກໃນຕໍ່ໜ້າ. ພ້ອມນີ້, ທ່ານຮອງນາຍົກລັດຖະມົນຕີ ຍັງໄດ້ແຈ້ງໃຫ້ທີ່ປະຊຸມຊາບ ກ່ຽວກັບການເປັນປະທານໝູນວຽນອາຊຽນ ຂອງ ສປປ ລາວ ໃນປີ 2024 ແລະ ຈະເປັນເຈົ້າພາບຈັດກອງປະຊຸມສຸດຍອດອາຊຽນ ຄັ້ງທີ 44 ແລະ 45 ແລະ ກອງປະຊຸມສຸດຍອດອື່ນໆທີ່ກ່ຽວຂ້ອງ ເຊິ່ງຈະຈັດຂຶ້ນໃນລະຫວ່າງ ວັນທີ 8-11 ຕຸລາ 2024 ທີ່ ນະຄອນຫຼວງວຽງຈັນ.
ກອງປະຊຸມສຸດຍອດ ຂອບການຮ່ວມມື ACD ໄດ້ຈັດຂຶ້ນມາແລ້ວທັງໝົດ 3 ຄັ້ງ ນັບແຕ່ການສ້າງຕັ້ງຂອບການຮ່ວມມື ໃນປິ 2002 ໂດຍການສະເໜີຂອງປະເທດສະມາຊິກ, ເຊິ່ງຄັ້ງທີ 1 ຈັດຂຶ້ນໃນປີ 2012 ທີ່ ປະເທດ ກູເວດ, ຄັ້ງທີ 2 ຈັດຂຶ້ນໃນປິ 2016 ທີ່ ປະເທດໄທ ແລະ ຄັ້ງນີ້ຈັດຂຶ້ນທີ່ ນະຄອນຫຼວງໂດຮາ, ປະເທດ ກາຕາ.
