ພະແນກວັດທະນະທຳ ແລະການທ່ອງທ່ຽວ ນະຄອນຫຼວງວຽງຈັນ ຈັດງານວາງສະແດງຮູບພາບ-ສິນລະປະດົນຕີ ” ສຽງປະສານແຫ່ງຍຸກສະໄໝ ” ເພື່ອສະເຫລີມສະຫລອງວັນຍຶດອຳນາດ ວັນທີ 23 ສິງຫາ ຄົບຮອບ 50 ປີ ໃນຕອນແລງວັນທີ 22 ສິງຫາ 2025 ທີ່ຫໍວັດທະນະທໍາແຫ່ງຊາດ ມີການນໍາພັກ-ລັດ, ບັນດາທ່ານເອກອັກຄະລັດຖະທູດ, ທຸຕານຸທູດ ພ້ອມດ້ວຍມວນຊົນເຂົ້າຮ່ວມຢ່າງຫລວງຫລາຍ.
ທ່ານ ນາງ ວຽງພອນ ແກ້ວຄຸນສີ ຫົວໜ້າພະແນກວັດທະນະທຳ-ທ່ອງທ່ຽວນະ ຄອນຫລວງວຽງຈັນ ມີຄໍາເຫັນວ່າ: ການສະແດງສິລະປະວັດທະນະທໍາ “ສຽງປະສານແຫ່ງຍຸກສະໄໝ ແລະ ວາງສະແດງຮູບພາບ 23 ສິງຫາ ວັນຍຶດອໍານາດ ຄົບຮອບ 50 ປີ” ມີຈຸດປະສົງ:
1. ເພື່ອສ້າງຂະບວນການຂໍ່ານັບຮັບຕ້ອນ 3 ວັນປະຫວັດສາດ ຄື: ສະເຫຼີມສະຫຼອງມູນເຊື້ອການນໍາພາຂອງພັກ ປປ ລາວ ຄົບຮອບ 70 ປີ, ວັນຊາດທີ 2 ທັນວາ ຄົບຮອບ 50 ປີ, ວັນເກີດປະທານໄກສອນ ພົມວິຫານ ຄົບຮອບ 105 ປີ; ວັນຢຶດອໍານາດ 23 ສິງຫາ ຄົບຮອບ 50 ປີ ແລະ ກອງປະຊຸມໃຫຍ່ ອົງຄະນະພັກນະຄອນຫຼວງວຽງຈັນ ຄັ້ງທີ VIII ດ້ວຍເນື້ອໃນອຸດົມສົມບູນ, ມີບັນຍາກາດຄຶກຄື້ນ, ເຕັມໄປ ດ້ວຍຈິດໃຈສາມັກຄີຟົດຟື້ນປະຕິວັດ ພາຍໃຕ້ຮົ່ມທຸງໄຊຂອງພັກ.
2. ສົ່ງເສີມວັດທະນະທຳ ແລະ ສິລະປະດົນຕີ ໃຫ້ໄດ້ຮັບການປົກປັກຮັກສາ, ພັດທະນາ ແລະ ສືບທອດຈາກຮຸ່ນສູ່ຮຸ່ນ ໃນເວທີການສະແດງທີ່ມີຄຸນຄ່າ ເອກອ້າງພາກພູມໃຈ ກ້າວສູ່ພາກພື້ນ ແລະ ສາກົນ.
3. ສືບທອດ, ສົ່ງເສີມ, ກໍ່ສ້າງຊັບພະຍາກອນມະນຸດ-ນັກສິລະປິນ-ນັກປະດິດຄິດແຕ່ງດົນຕີ-ວິຈິດສິນໜຸ່ມ ທີ່ມີຄວາມຮູ້ຄວາມສາມາດໃຫ້ຍືນຍົງ ທັງຍົກສູງຄຸນຄ່າສິລະປິນລາວ ໂດຍສະເພາະ ທາງດ້ານດົນຕີປະສານສຽງ ຜ່ານບັນດາບົດເພງມູນເຊື້ອການປະຕິວັດ, ບົດເພັງມໍຣະດົກວຽງຈັນ ອັນມີຊີວິດຊີວາທີ່ສຸດ.
ງານຄັ້ງນີ້ ໄດ້ແບ່ງອອກເປັນ 2 ກິດຈະກໍາຍ່ອຍ ຄື:
1. ການສະແດງສິລະປະວັດທະນະທໍາ “ສຽງປະສານແຫ່ງຍຸກສະໄໝ”
2. ວາງສະແດງຮູບພາບປະຫວັດສາດ ວັນຢຶດອໍານາດ 23 ສິງຫາ ຄົບຮອບ 50 ປີ ຈັດຢູ່ 2 ຈຸດຄື: ຫໍວັດທະນະທໍາແຫ່ງຊາດ ແລະ ສວນປະຕູໄຊ ນັບແຕ່ວັນທີ 23-25 ສິງຫາ 2025.
ຂ່າວ-ພາບ : ຈັນທະສອນ