ວັນທີ 28-29 ກໍລະກົດ 2025 ທີ່ໂຮງແຮມ ສຸພັດຕາ ນະຄອນຫຼວງພະບາງ ກະຊວງການຕ່າງປະເທດ ໄດ້ຈັດກອງປະຊຸມ ສໍາມະນາ ເພື່ອແລກປ່ຽນດ້ານວິຊາການ ກ່ຽວກັບ ສິດທິມະນຸດ ແລະການພັດທະນາ ພາຍໃຕ້ຂອບການຮ່ວມມືແມ່ນໍໍ້າຂອງ-ແມ່ນໍໍ້າລ້ານຊ້າງ ,ຮ່ວມກັນຫາລື ໂຄງຮ່າງບົດຄົ້ນຄວ້າຮ່ວມ ກ່ຽວກັບ ສິດທິມະນຸດ ແລະການພັດທະນາ ລະຫວ່າງ ສປປ ລາວ ແລະ ບັນດາປະເທດຂອບການຮ່ວມມືແມ່ນໍໍ້າຂອງ-ແມ່ນໍໍ້າລ້ານຊ້າງ.
ກອງປະຊຸມຄັ້ງນີ້ ແມ່ນໄດ້ຮັບຟັງການບັນຍາຍຈາກ ຜູ້ຊ່ຽວຊານດ້ານສິດທິມະນຸດຂອງສະຖາບັນໃນບັນດາປະເທດອາຊຽນ ແລະ ຈີນ, ໃນຫົວຂໍ້: 1. ສິດທິມະນຸດ ແລະ ການພັດທະນາພາຍໃຕ້ກົນໄກ ສະຫະປະຊາຊາດ(ສປຊ) ແລະພາກພື້ນ, 2. ການເຊື່ອມສານສິດທິມະນຸດ ແລະ ການພັດທະນາເຂົ້າໃນນະໂຍບາຍລັດ ແລະ ກົດຫມາຍ, 3. ຮັບຟັງຮ່າງບົດຄົ້ນຄວ້າຮ່ວມ ກ່ຽວກັບ ສິດທິມະນຸດ ແລະການພັດທະນາ ລະຫວ່າງ ສປປ ລາວ ແລະ ບັນດາປະເທດຂອບການຮ່ວມມື ແມ່ນໍໍ້າຂອງ-ແມ່ນໍໍ້າລ້ານຊ້າງ ແລະບາດກ້າວຕໍ່ໄປ ແລະແຜນໃນຕໍ່່ຫນ້າຮ່າງບົດຄົ້ນຄວ້າຮ່ວມກ່ຽວກັບ ສິດທິມະນຸດ ແລະ ການພັດທະນາ ລະຫວ່າງ ສປປ ລາວ ແລະ ບັນດາປະເທດຂອບການຮ່ວມມືແມ່ນໍໍ້າຂອງ-ແມ່ນໍໍ້າລ້ານຊ້າງ; ຈຸດປະສົງການຫາລືໃນຫົວຂໍ້ເຫລົ່ານັ້ນ ເພື່ອຈະນໍາເອົາ ສິດທິມະນຸດ ເຊື່ອມສານ ເຂົ້າໃນນະໂຍບາຍພັດທະນາ ແລະ ພາກປະຕິບັດຕົວຈິງ, ໂດຍສະເພາະ ນໍາສະເຫນີແບ່ງປັນປະສົບການ, ການແລກປ່ຽນຂໍໍ້ມູນ ແລະ ສິ່ງທ້າທາຍບັນດາປະເທດຂອບການຮ່ວມມື ແມ່ນໍໍ້າຂອງ-ແມ່ນໍໍ້າລ້ານຊ້າງ ພາຍໃຕ້ການພັດທະນາເສດຖະກິດ ແລະ ສິດທິມະນຸດ.
ຈາກນັ້ນ ຕອນແລງຂອງວັນດຽວກັນ ຈິ່ງໄດ້ເປີດກອງປະຊຸມຢ່າງເປັນທາງການ ໂດຍມີທ່ານ ອານຸພາບ ວົງໜໍ່ແກ້ວ ຮອງລັດຖະມົນຕີ ກະຊວງການຕ່າງປະເທດ, ທ່ານ ບຸນເລື່ອມ ມະນີວົງ ຮອງເຈົ້າແຂວງຫຼວງພະບາງ, ທ່ານ ຈ່າງ ເຊີ ຜິງ ກົງສູນໃຫຍ່ ສປ ຈີນ ປະຈໍາພາກເໜືອ, ມີບັນດາຫົວໜ້າກົມຈາກກະຊວງການຕ່າງປະເທດ ພ້ອມດ້ວຍ ພະນັກງານວິຊາການ, ຜູ້ແທນ ແລະ ຊ່ຽວຊານຈາກບັນດາປະເທດອາຊຽນ ມີ: ລາວ, ກໍາປູເຈຍ, ມຽນມາ, ໄທ, ຫວຽດນາມ ແລະ ຈີນ ເຂົ້າຮ່ວມ.
ທ່ານ ຮອງລັດຖະມົນຕີ ກ່າວເປີດກອງປະຊຸມຄັ້ງນີ້ ວ່າ: ເພື່ອແບ່ງປັນປະສົບການ, ຂໍ້ມູນຂ່າວສານ ແລະ ສິ່ງທ້າທາຍລະຫວ່າງ ບັນດາປະເທດ LMC ໃນການຈັດຕັ້ງປະຕິບັດແບບວິທີການພັດທະນາທີ່ອີງໃສ່ສິດທິມະນຸດເປັນພື້ນຖານ; ແລະເພີ່ມທະວີການຮ່ວມມືດ້ານສິດທິມະນຸດ ແລະ ການພັດທະນາ ພາຍໃຕ້ຂອບການຮ່ວມມື LMC. ການສຶກສາຄັ້ງນີ້ ມີຄຸນຄ່າອັນສຳຄັນໃນການປະກອບສ່ວນເຂົ້າໃນການສົນທະນາ ດ້ານນະໂຍບາຍຂອງພາກພື້ນ ແລະ ການວາງແຜນພັດທະນາຕົວຈິງໃນບັນດາປະເທດພາຍໃຕ້ຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ (LMC) ຄື: ສປ ຈີນ, ກຳປູເຈຍ, ສປປ ລາວ, ມຽນມາ, ໄທ ແລະ ສສ ຫວຽດນາມ. ໃນຂະນະທີ່ພາກພື້ນມີການພັດທະນາຢ່າງວ່ອງໄວ, ມັນເປັນສິ່ງສຳຄັນທີ່ຈະຮັບປະກັນການເຕີບໂຕດ້ານເສດຖະກິດ ປະກອບສ່ວນຊຸກຍູ້ການປົກປ້ອງສິດທິມະນຸດ ແລະ ຄວາມຍຸຕິທຳໃນສັງຄົມ.
ໂອກາດດັ່ງກ່າວນີ້ ທ່ານ ຮອງເຈົ້າແຂວງ ກໍໄດ້ກ່າວສະແດງຄວາມຕ້ອນຮັບ ແລະ ຍັງໄດ້ຍົກໃຫ້ເຫັນສະພາບທີ່ຕັ້ງ ແລະ ພູມສາດຂອງ ແຂວງຫຼວງພະບາງ ຕໍ່ຜູ້ແທນຈາກບັນດາປະເທດທີ່ເຂົ້າຮ່ວມຊາບຕື່ມອີກ.
ກອງປະຊຸມສໍາມະນາ ເພື່ອແລກປ່ຽນດ້ານວິຊາການ ກ່ຽວກັບ ສິດທິມະນຸດ ແລະການພັດທະນາ ພາຍໃຕ້ຂອບການຮ່ວມມືແມ່ນໍໍ້າຂອງ-ແມ່ນໍໍ້າລ້ານຊ້າງ ດໍາເນີນ ເປັນເວລາ 2 ວັນ ຈິ່ງສໍາເລັດ.
ຂ່າວ: ເພັດສາຄອນ ສິມມະວົງ