ງານວາງສະແດງສິນຄ້ານຳເຂົ້າສາກົນຈີນຄັ້ງທີ 7 ໄດ້ຈັດຂຶ້ນຢູ່ນະຄອນຊຽງໄຮ້ຂອງຈີນລະຫວ່າງວັນທີ 5 ຫາ 10 ພະຈິກນີ້ ໂດຍມີວິສາຫະກິດ 3.496 ແຫ່ງຈາກ 129 ປະເທດ ແລະ ເຂດແຄວ້ນໃນໂລກເຂົ້າຮ່ວມ, ຈຳນວນວິສາຫະກິດ ແລະ ປະເທດລລ້ວນແຕ່ຫຼາຍກວ່າຄັ້ງຜ່ານມາ; ໃນ 500 ອັນດັບສຸດຍອດວິສາຫະກິດລະດັບໂລກ ແລະ ບໍລິສັດນຳໜ້າຂະແໜງການເຂົ້າຮ່ວມງານວາງສະແດງຄັ້ງນີ້ມີເຖິງ 297 ແຫ່ງ ເຊິ່ງໄດ້ສ້າງສະຖິຕິສູງສຸດໃນປະຫວັດສາດຂອງງານວາງສະແດງດັ່ງກ່າວ.
ໃນນັ້ນ, ມີວິສາຫະກິດປະເທດພວມພັດທະນາໃນພາກພື້ນອາຊີຕາເວັນອອກສຽງໃຕ້ໄດ້ເຂົ້າຮ່ວມງານເປັນປະຈຳ. ແຕ່ລະປີ, ວິສາຫະກິດຫຼາຍແຫ່ງຂອງປະເທດເຫຼົ່ານີ້ ລ້ວນແຕ່ໄດ້ນຳເອົາຜະລິດຕະພັນທີ່ມີເອກະລັກພິເສດຂອງຕົນມາເຂົ້າຮ່ວມງານວາງສະແດງ ເຊິ່ງເປັນທັງຜູ້ເຂົ້າຮ່ວມ ແລະ ເປັນສັກຂີພິຍານ ພ້ອມທັງແມ່ນຜູ້ໄດ້ຮັບຜົນປະໂຫຍດຈາກງານວາງສະແດງສິນຄ້ານຳເຂົ້າສາກົນຈີນ. ສຳລັບປີນີ້ກໍເຊັ່ນດຽວກັນ.
ໃນງານວາງສະແດງຄັ້ງນີ້, ຫໍວາງສະແດງແຫ່ງຊາດລາວໄດ້ເນັ້ນໃສ່ “ທາງລົດໄຟຈີນ-ລາວ” ໂດຍໄດ້ວາງສະແດງຜະລິດຕະພັນທີ່ມີເອກະລັກພິເສດຂອງລາວຈະເລັ່ງການເຂົ້າສູ່ຕະຫຼາດຈີນ ໂດຍຜ່ານທາງລົດໄຟຈີນ-ລາວ ເພື່ອເພີ່ມພະລັງຂັບເຄື່ອນໃໝ່ໃຫ້ແກ່ການພັດທະນາເສດຖະກິດພາກພື້ນ. ຢູ່ໜ້າຫໍວາງສະແດງແຫ່ງຊາດລາວແມ່ນວິສາຫະກິດທີ່ດຳເນີນທຸລະກິດເອເລັກໂຕຣນິກຜະລິດຕະພັນກະສິກຳຂ້າມຊາດເປັນການສະເພາະ. ຕາມຂ່າວແຈ້ງວ່າ ວິສາຫະກິດແຫ່ງນີ້ເປັນໜຶ່ງໃນໂຄງການທຸລະກິດເອເລັກໂຕຣນິກຊົນນະບົດ ທີ່ຈີນຊ່ວຍເຫຼືອລາວພັດທະນາ. ໂດຍຜ່ານວິສາຫະກິດແຫ່ງນີ້, ນັກທຸລະກິດຈີນຈະສາມາດເລືອກຊື້ຜະລິດຕະພັນກະສິກຳລາວທາງອອນລາຍ ແລະ ຊຳລະບັນຊີດ້ວຍບັດທະນາຄານຈີນ.
ໃນຊຸມປີຜ່ານມາ, ຄຽງຄູ່ກັບການເປີດນຳໃຊ້ທາງລົດໄຟຈີນ- ລາວ, ປະສິດທິພາບການຂົນສົ່ງສິນຄ້າລາວໄດ້ຮັບການຍົກສູງຂຶ້ນ ແລະ ໄດ້ຫຼຸດຕົ້ນທຶນດ້ານການຈໍລະຈອນສິນຄ້າຂອງວິສາຫະກິດ ເຊິ່ງເຮັດໃຫ້ຜະລິດຕະພັນກະສິກຳທີ່ມີເອກະລັກພິເສດຂອງລາວຊະນິດຕ່າງໆ ເຊັ່ນ: ໝາກກ້ວຍ, ໝາກຖົ່ວລຽນ, ມັນຕົ້ນ ແລະອື່ນໆໄດ້ເຂົ້າສູ່ຕະຫຼາດຈີນນັບມື້ນັບຫຼາຍຂຶ້ນ. ເພື່ອຕອບສະໜອງຕາມຄວາມຕ້ອງການຂອງຕະຫຼາດຈີນ, ລັດຖະບານລາວຫວັງວ່າ ຈະສາມາດຊຸກຍູ້ການພັດທະນາກະສິກຳແບບຍືນຍົງ ໂດຍຜ່ານທາງລົດໄຟຈີນ-ລາວ ແລະ ສົ່ງເສີມໃຫ້ຊາວກະສິກອນເພີ່ມການສົ່ງອອກຜະລິດຕະພັນກະສິກຳສູ່ຈີນ. ໂດຍຜ່ານຈາກການເຂົ້າຮ່ວມງານວາງສະແດງສິນຄ້ານຳເຂົ້າສາກົນຈີນ, ຊາພັນປີ, ເບຍລາວ, ກາເຟລາວເປັນຕົ້ນ ລ້ວນແຕ່ໄດ້ຮັບຄວາມນິຍົມຊົມຊອບຈາກລູກຄ້າຈີນ.
ໄທໄດ້ເຂົ້າຮ່ວມງານວາງສະແດງສິນຄ້ານຳເຂົ້າສາກົນຈີນເປັນ 7 ຄັ້ງລຽນຕິດແລ້ວ, ປີນີ້ມີວິສາຫະກິດໄທຫຼາຍກວ່າ 80 ແຫ່ງໄດ້ມາເຂົ້າຮ່ວມງານ ໂດຍໄດ້ພົວພັນເຖິງຂະແໜງການອາຫານ, ຮູບເງົາ, ການທ່ອງທ່ຽວ, ເຄື່ອງປະດັບ, ຜະລິດຕະພັນໝູນວຽນໃນດ້ານການອະນຸລັກສິ່ງແວດລ້ອມ, ຜະລິດຕະພັນບຳລຸງສຸຂະພາບ ແລະອື່ນໆ. ທ່ານພິໄຊ ນາຣິບທະພັນ ລັດຖະມົນຕີກະຊວງການຄ້າຄົນໃໝ່ຂອງໄທໄດ້ໃຫ້ສຳພາດຕໍ່ນັກຂ່າວໃນງານວາງສະແດງສິນຄ້ານຳເຂົ້າສາກົນຈີນຄັ້ງນີ້ວ່າ: ການຮ່ວມມືແບບຊ່ວຍຊູຍູ້ໜູນກັນລະຫວ່າງປະເທດພວມພັດທະນາແມ່ນສຳຄັນທີ່ສຸດ. ງານວາງສະແດງສິນຄ້ານຳເຂົ້າສາກົນຈີນໄດ້ເສີມຂະຫຍາຍບົດບາດຢ່າງຕັ້ງໜ້າໃນການຊຸກຍູ້ໃຫ້ຜະລິດຕະພັນໄທເຂົ້າສູ່ຕະຫຼາດຈີນໃຫ້ຫຼາຍ ກວ່າເກົ່າ, ໄທຈະສຸມໃສ່ເພີ່ມທະວີການຮ່ວມມືດ້ານການຄ້າກັບຈີນຕື່ມອີກ.
ສິ່ງທີ່ຄວນເວົ້າເຖິງນັ້ນກໍຄື: ມີ 37 ປະເທດທີ່ດ້ອຍພັດທະນາໃນໂລກໄດ້ເຂົ້າຮ່ວມງານວາງສະແດງສິນຄ້ານຳເຂົ້າສາກົນຈີນປີນີ້, ຝ່າຍເຈົ້າພາບຍັງໄດ້ສະໜອງຮ້ານວາງສະແດງທີ່ບໍ່ເສຍຄ່າເຊົ່າ 120 ກວ່າບ່ອນໃຫ້ແກ່ວິສາຫະກິດຂອງປະເທດເຫຼົ່ານີ້. ທີ່ຈິງແລ້ວ, ນັບແຕ່ຄັ້ງປະຖົມມະລືກເປັນຕົ້ນມາ, ງານວາງສະແດງດັ່ງກ່າວກໍໄດ້ອຳນວຍຄວາມສະດວກໃຫ້ແກ່ປະເທດດ້ອຍພັດທະນາມາໂດຍຕະຫຼອດ. 7 ປີຜ່ານມາ, ຜະລິດຕະພັນຂອງປະເທດດດ້ອຍພັດທະນາ ໄດ້ເຂົ້າສູ່ຕະຫຼາດຈີນນັບມື້ນັບຫຼາຍຂຶ້ນ ໂດຍຜ່ານງານວາງສະແດງສິນຄ້ານຳເຂົ້າສາກົນຈີນ ເຊິ່ງໄດ້ນຳພາການພັດທະນາຂອງຂະແໜງການທີ່ກ່ຽວຂ້ອງ ແລະ ປັບປຸງຊີວິດການເປັນຢູ່ຂອງປະຊາຊົນປະເທດເຫຼົ່ານີ້ໃຫ້ສູງຂຶ້ນ.
ນອກນີ້, ຈີນຍັງຈະເປີດກວ້າງການເປີດປະຕູສູ່ພາຍນອກຕໍ່ປະເທດດ້ອຍພັດທະນາໃນໂລກຕື່ມອີກ. ນັບແຕ່ວັນທີ 1 ທັນວາປີນີ້ເປັນຕົ້ນໄປ, ຈີນຈະຍົກເວັ້ນພາສີ 100% ຕໍ່ຜະລິດຕະພັນທີ່ນຳເຂົ້າຈາກປະເທດດ້ອຍພັດທະນາໃນໂລກ ເຊິ່ງລວມທັງລາວ. ນີ້ແມ່ນມາດຕະການສຳຄັນ ທີ່ທ່ານສີຈິ້ນຜິງ ປະທານປະເທດຈີນໄດ້ປະກາດໃນພິທີໄຂກອງປະຊຸມສຸດຍອດປັກກິ່ງຂອງເວທີເປິກສາຫາລືຈີນ-ອາຟຣິກາປີ 2024.
ຈີນ ແມ່ນປະເທດພວມພັດທະນາທີ່ໃຫຍ່ທີ່ສຸດ ແລະ ເປັນສະມາຊິກສົມບູນຂອງ “ເຂດໂລກໃຕ້”, ຈີນໄດ້ຍຶດໝັ້ນສະໜັບສະໜູນການຮ່ວມມືໃຕ້-ໃຕ້ຢ່າງສະເໝີຕົ້ນສະເໝີປາຍ, ຍຶດໝັ້ນເປີດປະຕູສູ່ພາຍນອກ ແລະ ຮ່ວມມືກັນແບບຕ່າງຝ່າຍຕ່າງໄດ້ຮັບຜົນປະໂຫຍດ ເພື່ອເຮັດໃຫ້ໝາກຜົນການພັດທະນາສ້າງຜົນປະໂຫຍດໃຫ້ແກ່ປະຊາຊົນປະເທດຕ່າງໆໃຫ້ໄດ້ຢ່າງທ່ຽງທຳກວ່າເກົ່າ. ໂດຍຜ່ານຈາກງານ
ງານວາງສະແດງສິນຄ້ານຳເຂົ້າສາກົນຈີນ ທີ່ເປີດປະຕູສູ່ພາຍນອກ ແລະ ເນັ້ນໃສ່ການຮ່ວມມືກັນ, ບັນດາປະເທດ “ເຂດໂລກໃຕ້” ຈະສາມາດຄົ້ນຫາໂອກາດຫຼາຍກວ່າເກົ່າ ແລະ ໄດ້ຮັບການພັດທະນາໃຫຍ່ກວ່າເກົ່າຈາກຕະຫຼາດຈີນ.
ທີ່ມາ: CMG
