ບຸນນະມັດສະການພະທາດຫລວງ ແລະ ງານວາງສະແດງສິນຄ້າ ປະຈຳປີ 2024 ຈະຈັດຂຶ້ນ ໃນລະຫວ່າງ ວັນທີ 11-15 ພະ ຈິກນີ້ ເຊິ່ງຈະຈັດຂຶ້ນຢູ່ສອງສະຖານທີ່ຄືທຸກປີຜ່ານມາ.
ທ່ານ ນາງ ວຽງພອນ ແກ້ວຄູນສີ ຫົວໜ້າພະແນກ ຖະແຫລງຂ່າວວັດທະນະທຳ ແລະ ທ່ອງທ່ຽວ ນະຄອນຫລວງວຽງຈັນ ໃຫ້ຮູ້ໃນໂອກາດຮ່ວມກັບຄະນະຖະແຫລງຂ່າວຕໍ່ສື່ມວນຊົນ ໃນວັນທີ 5 ພະຈິກ 2024 ນີ້ວ່າ: ບຸນນະມັດສະການພະທາດຫລວງປີນີ້ ຈະຈັດໃຫ້ມີຫລາກຫລາຍກິດຈະກໍາທີ່ໜ້າສົນໃຈຢູ່ເດີ່ນພະທາດຫລວງ, ເດີ່ນສະໜາມຫລວງ ແລະ ງານວາງສະແດງຂາຍສິນຄ້າ ຈະຈັດຢູ່ສູນການຄ້າ ລາວ-ໄອເຕັກ ນະຄອນຫລວງວຽງຈັນ ເຊິ່ງພິທີເປີດງານບຸນຢ່າງເປັນທາງການ ຈະຈັດຂຶ້ນ ໃນວັນທີ 11 ພະ ຈິກ ແລະ ຈະດຳເນີນ ໄປຈົນຮອດວັນທີ 15 ພະຈິກ ໂດຍຈະມີ ການຄົບງັນຕາມປະເພນີອັນດີງາມຂອງຊາດລາວເຮົາ ເປັນຕົ້ນ, ວັນທີ 13 ເວລາ 16:00 ໂມງ ຈະມີ ພິທີສູດປະລິຕຕະມຸງຄຸນ ທີ່ພຣະທາດຫລວງ, ວັນທີ 14 ເວລາ 13:30 ໂມງ ຈະມີພິທີແຫ່ຜາສາດເຜິ້ງ, ວັນທີ 15 ເວລາ 07:00 ໂມງ ຈະມີພິທີໃສ່ບາດຖວາຍສັງກະທານ, ເວລາ 13:00 ໂມງ ຈະມີພິທີແຫ່ລູກຄີ ແລະ ການແແຂ່ງຂັນກິລາພື້ນບ້ານຕີຄີ ແລະ ເວລາ 19:00 ໂມງ ຈະມີພິທີວຽນທຽນ ແລະ ຈູດທູບທຽນ, ບັ້ງໄຟສັກກະລະບູຊາອົງພຣະທາດ.
ທັງນີ້, ເພື່ອອະນຸລັກຮັກສາ ແລະ ສົ່ງເສີມວັດທະນະທຳ ຮີດຄອງປະເພນີອັນດີງາມ ບຸນນະມັດສະການພພະທາດຫລວງຂອງຊາວລາວ ກໍຄື ຊາວນະຄອນຫລວງວຽງຈັນ ທີ່ເຄີຍສືບທອດກັນມາແຕ່ບຸຮານນະການ ໃຫ້ມີຄວາມໂດດເດັ່ນ ແລະ ເປັນທີ່ຮັບຮູ້ໃນເວທີສາກົນ, ທັງເປັນການສ້າງໂອກາດໃນການຈັດຕັ້ງປະຕິບັດ 2 ວາລະແຫ່ງຊາດ ກໍຄື ຟື້ນຟູເສດຖະກິດ ດ້ວຍຮຸບການຊຸກຍູ້ສົ່ງເສີ່ມການທ່ອງທ່ຽວ, ສົ່ງເສີມການຄ້າ, ສິນຄ້າຄອບຄົວຕົວແບບ ທີ່ຈະກ້າວເປັນສິນຄ້າໂອດ໋ອບ ທີ່ໄດ້ກາໝາຍແຫ່ງຊາດ ແລະ ສິນຄ້າຂອງວັນດາວິສາຫະກິດຂະໜາດນ້ອຍ ແລະ ກາງ ໄດ້ມາວາງສະແດງ, ຈຳໜ່າຍສິນຄ້າ ທັງ ພາຍໃນ ແລະ ຕ່າງປະເທດ ໃຫ້ປະຊາຊົນຊາວນະຄອນຫລວງວຽງຈັນ ແລະ ແຂກຕ່າງປະເທດໄດ້ເຫັນ ແລະ ໄດ້ຊົມໃຊ້ສິນຄ້າ, ພ້ອມທັງເປັນການແລກປ່ຽນບົດຮຽນ ແລະ ປະສົບການຕຕ່າງໆຂອງບັນດາຫົວໜ່ວຍທຸລະກິດດ້ວຍກັນ.
ທ່ານ ນາງ ວຽງພອນ ແກ້ວຄູນສີ ກ່າວອີກວ່າ: ເພື່ອຊຸກຍູ້ສົ່ງເສີມປີທ່ອງທ່ຽວລາວ 2024 ກໍຄື ເຮັດໃຫ້ງານບຸນນະມັດ ສະການ ພະທາດຫລວງ ໃນປີນີ້, ດຳເນີນໄປດ້ວຍຜົນສຳເລັດ ຮັກສາໄດ້ວັດທະນະທຳອັນດີງາມຄະນະຮັບຜິດຊອບ ກໍຄື ນະຄອນຫລວງວຽງຈັນ ໄດ້ຈັດໃຫ້ມີຫລາກຫລາຍກິດຈະກຳ ທີ່ໜ້າສົນໃຈ ນັບແຕ່ຮ້ານຄ້າທາງເຂົ້າຈາກໄຟແດງ ບ້ານໜອງບອນ ຈະຕົບແຕ່ງເປັນເອກະລັກຂອງລາວ, ສິນຄ້າລາວ ເປັນສ່ວນຫລາຍ, ປະຕູໂຂງທາງເຂົ້າງານ ຕົບແຕ່ງປະດັບປະດາດ້ວຍແຄນ ແລະ ກອງຫາງ ທີ່ເປັນເອກະລັກວັດທະນະທຳ ລາວທີ່ໂດດເດັ່ນ, ທາງເຂົ້າຮ້ານວາງສະແດງສິນຄ້າ ໂອດອບ ຕົບແຕ່ງປະດັບປະດາດ້ວຍ ວັດຖຸພັນຈາກພາຍໃນ ແລະ ຈະເຫັນຕິບເຂົ້າໃຫຍ່ ສອງດ້ານຂ້າງ, ຮ້ານຄ້າໂອດອບ ຈາກພາຍໃນ ແລະ ຕ່າງປະເທດ ທີ່ມີສິນຄ້າຫລວງຫລາຍ, ພິເສດ ຮ້ານພາມີລຽນ ຈະຕົບແຕ່ງປະດັບປະດາ ຜາສາດເຜີ້ງ, ພາຂວັນໃຫຍ່, ວາງສະແດງປະຫວັດພະທາດຫລວງວຽງຈັນ, ປະຫວັດລູກຄີ ແລະ ເຄື່ອງປະດັບປະດາ ຕ່າງໆ ທີ່ໜ້າສົນໃຈ. ສຳລັບ ທາງເຂົ້າ ໜ້າສະພາແຫ່ງຊາດ ຈະຕົບແຕ່ງ ເປັນບ່ອນຢ່າງຫລິ້ນ ປະດັບປະດາດອກໄຟ, ໂຄມໄຟ ແລະ ມີຈຸດຖ່າຍຮູບ ທີ່ຈົບງາມ. ນອກນັ້ນ, ຈຸດສູນລວມ ຈະມີເວທີກາງ ເເພື່ອໄວ້ໃນການສະແດງກິດຈະກຳ, ສິລະປະ ຕ່າງໆ ອາດຈະມີສິລະປິນຈາກຕ່າງປະເທດ ມາສະແດງຮ່ວມບາງລາຍການ ໃນທຸກໆ ຄືນ ນັບແຕ່ມື້ເປີດງານບຸນ ຈົນຮອດມື້ປິດງານ.
