ໃນເວທີເປິກສາຫາລືກອງປະຊຸມສຸດຍອດການຮ່ວມມືສາກົນ “ໜຶ່ງແລວໜຶ່ງເສັ້ນທາງ” ຄັ້ງທີ 3, ທ່ານສີຈິ້ນຜິງ ປະທານປະເທດຈີນໄດ້ປະກາດການເຄື່ອນໄຫວ 8 ລາຍການກ່ຽວກັບຈີນສະໜັບສະໜູນການຮ່ວມກັນສ້າງ “ໜຶ່ງແລວໜຶ່ງເສັ້ນທາງ” ດ້ວຍຄຸນນະພາບສູງ ໂດຍເນັ້ນໜັກວ່າຕ້ອງສ້າງເຄືອຂ່າຍເຊື່ອມໂຍງເຊື່ອມຈອດກັນຢ່າງຮອບດ້ານຂອງ “ໜຶ່ງແລວໜຶ່ງເສັ້ນທາງ”. ໃນນັ້ນ, ການເຊື່ອມໂຍງເຊື່ອມຈອດກັນດ້ານພະລັງງານໄຟຟ້າ ທີ່ເປັນສ່ວນປະກອບອັນສຳຄັນຂອງການເຊື່ອມໂຍງເຊື່ອມຈອດກັນດ້ານພື້ນຖານໂຄງລ່າງຂອງ “ໜຶ່ງແລວໜຶ່ງເສັ້ນທາງ” ແມ່ນມີຄວາມໝາຍສຳຄັນຕໍ່ການຊຸກຍູ້ການຫັນປ່ຽນຮູບແບບພະລັງງານທົ່ວໂລກ ແລະ ຍົກລະດັບການຫັນເປັນອຸດສາຫະກຳຂອງປະເທດກຳລັງພັດທະນາ.
ໃນຊຸມປີທີ່ຜ່ານມາ, ວິສາຫະກິດຂອງຈີນໄດ້ເຂົ້າສູ່ຕະຫຼາດພະລັງງານໄຟຟ້າຂອງລາວ ແລະ ໄດ້ລົງທຶນກໍ່ສ້າງເຂື່ອນໄຟຟ້ານ້ຳຕົກ, ໂຮງງານຜະລິດໄຟຟ້າດ້ວຍແສງຕາເວັນ ແລະ ທົ່ງກັນຫັນລົມຜະລິດໄຟຟ້າຫຼາຍແຫ່ງ ເຊັ່ນ: ເຂື່ອນໄຟຟ້ານ້ຳຕົກຕາມລຳນ້ຳອູ, ໂຄງການພະລັງງານສະອາດທີ່ພາກເໜືອຂອງລາວ, ໂຮງໄຟຟ້າພະລັງງານລົມມອນຊຸນກຳລັງການຜະລິດ 600 ເມກາວັດ ແລະອື່ນໆ. ນອກນີ້, ຈີນຍັງໄດ້ຊ່ວຍລາວສ້າງເຄືອຂ່າຍໄຟຟ້າທີ່ມີເຕັກໂນໂລຊີທັນສະໄໝ ເຊິ່ງໄດ້ທັບມ້າງອຸປະສັກດ້ານເຕັກນິກການເຊື່ອມຕໍ່ເຄືອຂ່າຍໄຟຟ້າຂອງລາວກັບເຄືອຂ່າຍໄຟຟ້າຂອງຈີນດ້ວຍກັນ.
ພາຍໃຕ້ເບື້ອງຫຼັງທີ່ຈີນ ແລະ ລາວດຳເນີນການຮ່ວມມືຢ່າງຮອບດ້ານ, ເຄືອຂ່າຍສົ່ງໄຟຟ້າຂອງລາວໄດ້ຮັບການພັດທະນາຢ່າງວ່ອງໄວໃນຫຼາຍປີມໍ່ໆມານີ້ ໂດຍໄດ້ຮັບການຍ້ອງຍໍວ່າ ໄດ້ສ້າງ “ທາງດ່ວນ” ດ້ານການສົ່ງໄຟຟ້າຢ່າງສຳເລັດຜົນ ເຊິ່ງບໍ່ພຽງແຕ່ໄດ້ຊຸກຍູ້ການພັດທະນາຂອງເສດຖະກິດ-ສັງຄົມຂອງທ້ອງຖິ່ນຢ່າງຫຼວງຫຼາຍເທົ່ານັ້ນ ຍັງໄດ້ເຮັດໃຫ້ພະລັງງານໄຟຟ້າອັນອຸດົມສົມບູນຂອງລາວສາມາດສົ່ງອອກໄປໃຫ້ປະເທດໃກ້ຄຽງຂອງລາວອີກດ້ວຍ. ອີງຕາມຂໍ້ມູນຂອງກະຊວງອຸດສາຫະກຳການຄ້າລາວສະແດງໃຫ້ເຫັນວ່າ: ໃນປີ 2023, ລາວໄດ້ສົ່ງອອກພະລັງງານໄຟຟ້າທີ່ມີມູນຄ່າເຖິງ 2.382.000.000 ໂດລາ ເຊິ່ງກວມເອົາ 28,45% ຂອງຍອດມູນຄ່າການສົ່ງອອກຂອງລາວໃນປີດັ່ງກ່າວ.
