ທ່ານ ຄໍາ ນິລາວົງ ວ່າການຫົວໜ້່ພະແນກກະສິກໍາ ແລະ ປ່າໄມ້ ແຂວງຈໍາປາສັກ ຕາງໜ້າໃຫ້ອົງການປົກຄອງແຂວງ ໃຫ້ສໍາພາດໃນວັນທີ 7 ກໍລະກົດ 2025 ນີ້ວ່າ: ເພື່ອສະເຫຼີມສະຫຼອງວັນປ່ອຍປາ ແລະ ສັດນໍ້າ ແຫ່ງຊາດ, ວັນທີ 13 ກໍລະກົດ ໃຫ້ມີບັນຍາກາດຟົດຟຶ້ນ ແລະ ມີເນື້ອໃນຄວາມໝາຍເລິກເຊິ່ງ, ໃນປີ 2025 ນີ້ ແຂວງຈໍາປາສັກ ໄດ້ວາງແຜນປ່ອຍປາໃນພິທີປ່ອຍປາ ຢູ່ນະຄອນປາກເຊ, 9 ເມືອງ ແລະ ບັນດາໂຄງການຕ່າງໆ ເຊັ່ນ: ເຂື່ອນໄຟຟ້າເຊປຽນ – ເຊນໍ້ານ້ອຍ, ເຂື່ອນໄຟຟ້າດອນເຊໂຮງ ແລະ ອື່ນໆ ຄາດຄະເນຈະປ່ອຍປາລົງແຫຼ່ງນໍ້າທຳມະຊາດໃຫ້ໄດ້ຫຼາຍກວ່າ 5 ແສນໂຕ. ນອກນີ້ ຍັງຈະຊຸກຍູ້ປ່ອຍລ້ຽງໃນໜອງທີ່ສ້າງຂຶ້ນຂອງປະຊາຊົນ ແລະ ການລ້ຽງປາເປັນສິນຄ້າຂອງຜູ້ປະກອບການ ໃຫ້ໄດ້ 51 ລ້ານ 4 ແສນກວ່າໂຕ. ສໍາລັບພິທີປ່ອຍປາຂອງແຂວງ ຈະຈັດຂຶ້ນຢູ່ສາຍນໍ້າເຊໂດນ ບໍລິເວນທ່າວັດຫຼວງປາກເຊ, ໃນວັນທີ 10 ກໍລະກົດ 2025 ເຊິ່ງກົງກັບວັນບຸນເຂົ້າພັນສາ ແລະ ຕາມແຜນຈະປ່ອຍປາໃຫ້ໄດ້ 250.000 ໂຕ, ປາທີ່ຈະນໍາມາປ່ອຍແມ່ນປາປາກ, ປາກິນຫຍ້າ ແລະ ປາຊວາຍ.
ຍ້ອນແນວນັ້ນ, ພະແນກກະສິກໍາ ແລະ ປ່າໄມ້ແຂວງ ຂໍເຊີນຊວນ ຄະນະພັກ - ອົງການປົກຄອງແຂວງ, ນະຄອນ - ເມືອງ, ພະນັກງານ, ທະຫານ, ຕຳຫຼວດ, ນັກຮຽນ, ນັກສຶກສາ, ນັກທຸລະກິດ, ຜູ້ປະກອບ ແລະ ປະຊາຊົນບັນດາເຜົ່າຊາວແຂວງຈໍາປາສັກ ຈົ່ງເປັນເຈົ້າການເຂົ້າຮ່ວມ ແລະ ປະກອບສ່ວນໃນການປົກປັກຮັກສາ, ຊຸກຍູ້ສ້າງຂະບວນການປ່ອຍປາ, ສັດນ້ຳພັນພື້ນເມືອງລາວ ລົງສູ່ແມ່ນ້ຳລຳເຊ, ຫ້ວຍໜອງຄອງບຶງ ແລະ ປ່ອຍຕາມໜອງສະລ້ຽງປາ ຂອງບຸກຄົນ ຫຼື ສ່ວນລວມ ເພື່ອເຮັດໃຫ້ມີຄວາມອຸດົມສົມບູນ ໄປດ້ວຍປູປານານ້ຳ ທັງເປັນການປະກອບສ່ວນຄືນຄວາມອຸດົມສົມບູນໃຫ້ກັບທຳມະຊາດ ເນື່ອງໃນໂອກາດສະເຫຼີມສະຫຼອງວັນປ່ອຍປາ ແລະ ອະນຸລັກສັດນ້ຳ ແຫ່ງຊາດ ວັນທີ13 ກໍລະກົດ. ນອກນີ້ ກໍເພື່ອສ້າງຜົນງານ, ສ້າງຂະບວນການຂໍ່ານັບຮັບຕ້ອນກອງປະຊຸມໃຫຍ່ ຄັ້ງທີ IX ຂອງອົງຄະນະພັກແຂວງ ທີ່ຈະໄຂຂຶ້ນໃນມໍ່ໆນີ້ ໃຫ້ມີບັນຍາກາດຟົດຟຶ້ນ ແລະ ມີເນື້ອໃນຄວາມໝາຍເລິກເຊິ່ງ.
ໃນປີ 2024 ຜ່ານມາ, ແຂວງຈໍາປາສັກ ໄດ້ປ່ອຍປາລົງໃນແຫຼ່ງນໍ້າທໍາມະຊາດ ໃນມື້ຈັດພິທີປ່ອຍປາສ້າງຂະບວນການໃນວັນທີ 13 ກໍລະກົດ ຈໍານວນ 450.000 ໂຕ, ປ່ອຍລ້ຽງໃນໜອງສ້າງຂຶ້ນຂອງປະຊາຊົນ ແລະ ການລ້ຽງປາເປັນສິນຄ້າຂອງຜູ້ປະກອບການ ຈໍານວນ 51 ພັນກວ່າໂຕ.
ວັນປ່ອຍປາ ແລະ ສັດນໍ້າ ແຫ່ງຊາດ 13 ກໍລະກົດ ເປັນວັນທີ່ພັກ ແລະ ລັດຖະບານ ໄດ້ກໍານົດໃຫ້ເປັນວັນປ່ອຍປາ ແລະ ສັດນໍ້າ ແຫ່ງຊາດ ທີ່ໄດ້ໝູນວຽນບັນຈົບຄົບຮອບ 28 ປີ(13/7/1997 - 13/7/2025) ແລະ ກົງກັບວັນຄ້າຍວັນເກີດ ຂອງປະທານ ສຸພານຸວົງ ຄົບຮອບ 116 ປີ (13/7/1909 - 13/7/2025) ເຊິ່ງໃນແຕ່ລະປີ ໃນທົ່ວປະເທດ ເວົ້າລວມ, ເວົ້າສະເພາະແມ່ນທົ່ວແຂວງຈໍາປາສັກ ກໍໄດ້ພ້ອມກັນຈັດກິດຈະກໍາຕ່າງໆ ເພື່ອປູກຈິດສໍານຶກໃຫ້ແກ່ເຍົາວະຊົນ ແລະ ອະນຸຊົນຮຸ່ນຫຼັງ ກໍຄືທົ່ວສັງຄົມ ໃຫ້ເຫັນຄວາມສໍາຄັນຂອງການອະນຸລັກປາ ແລະ ສັດນໍ້າ ແນໃສ່ເພີ່ມຄວາມອຸດົມສົມບູນໃຫ້ກັບທໍາມະຊາດ, ປົກປັກຮັກສາລະບົບນິເວດ ໃຫ້ມີຄວາມສົມດູນ ແລະ ຍືນຍົງ ທັງເປັນການຈາລຶກບຸນຄຸນ, ຄຸນງາມຄວາມດີ ແລະ ຜົນງານອັນໃຫຍ່ຫຼວງຂອງປະທານ ສຸພາ ນຸວົງ ທີ່ອຸທິດຕົນໃຫ້ແກ່ພາລະກິດແຫ່ງການຕໍ່ສູ້ກູ້ຊາດ ກໍຄືການປົກປັກຮັກສາ ແລະ ສ້າງສາພັດທະນາປະເທດຊາດຂອງພວກເຮົາ.
ຂ່າວ-ພາບ: ທູນທອງໃຈ