ກອງປະຊຸມປຶກສາຫາລື ເພື່ອແກ້ໄຂປະກົດການຫຍໍ້ທໍ້ໃນຂະແໜງການທ່ອງທ່ຽວ ຢູ່ແຂວງຫຼວງພະບາງ ຈັດຂຶ້ນເມື່ອບໍ່ດົນມານີ້ ທີ່ພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງຫຼວງພະບາງ ໂດຍການເປັນປະທານຮ່ວມຂອງ ທ່ານ ນາງ ສຸດາພອນ ຄົມທະວົງ, ຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແຂວງຫຼວງພະບາງ ແລະ ທ່ານ ນາງ ສີພອນໄພ ສິດທິໄຊ, ຮອງຫົວໜ້າກົມຄຸ້ມຄອງທຸລະກິດການທ່ອງທ່ຽວ, ກະຊວງຖະແຫງຂ່າວ, ວັດທະນະທໍາ ແລະ ທ່ອງທ່ຽວ.
ຈຸດປະສົງເພື່ອປຶກສາຫາລືກ່ຽວກັບບັນຫາປະກົດການຫຍໍ້ທໍ້ຕ່າງໆທີ່ເກີດຂຶ້້ນໃນຂະ ແໜງການທ່ອງທ່ຽວ ເພື່ອຊອກຫາວິທີທາງແກ້ໄຂຮ່ວມກັນ. ໃນກອງປະຊຸມໄດ້ລາຍ ງານສະພາບການຄຸ້ມຄອງຫົວໜ່ວຍທຸລະກິດນຳທ່ຽວ, ການຕິດຕາມກວດກາຫົວ ໜ່ວຍທຸລະກິດນຳທ່ຽວ, ການເຄື່ອນໄຫວທຸລະກິດນຳທ່ຽວ, ການບໍລິການນຳທ່ຽວຂອງພະນັກງານນຳທ່ຽວ ຕາມສິດ, ໜ້າທີ່ ພາລະບົດບາດຂອງຕົນໃນໄລຍະຜ່ານມາ.
ໂດຍໄດ້ຍົກໃຫ້ເຫັນບັນຫາທີ່ຕິດພັນກັບການທ່ອງທ່ຽວທີ່ຕ້ອງໄດ້ຮີບຮ້ອນແກ້ໄຂເປັນຕົ້ນແມ່ນ: ສິ່ງຮອງຮັບນັກທ່ອງທ່ຽວບໍ່ພຽງພໍ, ສະຖານທີ່ທ່ອງທ່ຽວ ແລະ ເສັ້ນ ທາງໃນຕົວເມືອງ ມີຄວາມແອອັດ, ການເຄື່ອນໄຫວທຸລະກິດນຳທ່ຽວ, ພະນັກງານນຳທ່ຽວ ທີ່ເຄື່ອນໄຫວບໍ່ສອດຄ່ອງກັບລະບຽບກົດໝາຍ, ຊາວຕ່າງປະເທດເຄື່ອນໄຫວເຮັດທຸລະກິດທີ່ເປັນອາຊີບສະຫງວນໃຫ້ຄົນລາວ, ການເກັບເງິນກອງທຶນສົ່ງເສີມການທ່ອງທ່ຽວຢູ່ກັບດ່ານສາກົນ ຍັງບໍ່ທັນມີຄວາມເປັນເອກະພາບກັນ ແລະ ບັນຫາອື່ນໆ.
ເພື່ອແກ້ໄຂບັນຫາດັ່ງກ່າວ ທ່ານ ນາງ ສີພອນໄພ ສິດທິໄຊ, ໄດ້ມີຄຳເຫັນກ່ຽວກັບ ການການເກັບເງິນກອງທຶນສົ່ງເສີມການທ່ອງທ່ຽວປັດຈຸບັນມີຈຳນວນ 07 ດ່ານ ທີ່ສາມາດເກັບເງິນດ້ວຍລະບົບ easy pass ຜ່ານທະນາຄານກັບດ່ານໄດ້, ສຳລັບດ່ານທີ່ຍັງບໍ່ທັນຕິດຕັ້ງລະບົບເກັບເງິນເທື່ອແມ່ນໃຫ້ປະຕິບັດຕາມຮູບແບບເກົ່າກ່ອນ, ການກວດກາເອກະສານນຳທ່ຽວເຈົ້າໜ້າທີ່ຕຳຫຼວດຕ້ອງກວດກາຕາມພາລະບົດ ບາດຂອງຕົນ, ກຸ່ມພະນັກງານນຳທ່ຽວແຂວງຕ້ອງໄດ້ປະສານງານກັບສະມາຄົມນຳທ່ຽວນະຄອນຫຼວງວຽງຈັນ ເພື່ອອຳນວຍຄວາມສະດວກໃຫ້ພະນັກງານນຳທ່ຽວທີ່ເປັນສະມາຊິກຂອງກຸ່ມ ນຳພານັກທ່ອງທ່ຽວມາທ່ຽວຢູ່ນະຄອນຫຼວງວຽງຈັນ, ຮຽກຮ້ອງໃຫ້ສະມາຄົມທຸລະກິດນຳທ່ຽວ, ກຸ່ມພະນັກງານນຳທ່ຽວເອົາໃຈໃສ່ສຶກສາອົບຮົມສະ ມາຊິກໃຫ້ເຄື່ອນໄຫວຖືກຕ້ອງສອດຄ່ອງກັບລະບຽບກົດໝາຍ.
