ວັນທີ 11 ກຸມພາ 2026 ຄະນະຜູ້ສະໝັກຮັບເລືອກຕັ້ງເປັນສະມາຊິກສະພາແຫ່ງຊາດ(ສສຊ)ຊຸດທີ X ປະຈຳເຂດເລືອກຕັ້ງທີ 6 ແຂວງຫຼວງພະບາງ ທີມ 5 ເມືອງໃຕ້ ນໍາພາໂດຍ ທ່ານ ໄພວີ ສີບົວລິພາ ກໍາມະການສູນກາງພັກ, ເລຂາຄະນະບໍລິຫານງານພັກກະຊວງ, ລັດຖະມົນຕີກະຊວງຍຸຕິທຳ ຜູ້ຮັບສະໝັກເລືອກຕັ້ງ ນ້ຳເບີ 01 ໄດ້ສືບຕໍ່ລົງພົບປະປະຊາຊົນຜູ້ມີສິດປ່ອນບັດເລືອກຕັ້ງຢູ່ເມືອງຊຽງເງິນ ໂດຍມີຄະນະນໍາ ເມືອງຊຽງເງິນ ພ້ອມດ້ວຍພະນັກງານ-ລັດຖະກອນ ແລະ ປະຊາຊົນໃຫ້ການຕ້ອນຮັບ.
ໃນໂອກາດນີ້, ຜູ້ສະໝັກຮັບເລືອກຕັ້ງໄດ້ຮັບຟັງລາຍງານວ່າ: ເມືອງຊຽງເງິນປະກອບມີ 49 ບ້ານ, 6.688 ຄອບຄົວ, ພົນລະເມືອງ 37.079 ຄົນ, ຍິງ 18.980 ຄົນ, ມີຜູ້ມີສິດປ່ອນບັດເລືອກຕັ້ງທັງໝົດ 21.742 ຄົນ, ຍິງ 10.529 ຄົນ, ໄດ້ກຳນົດໜ່ວຍປ່ອນບັດເລືອກຕັ້ງທັງໝົດ 44 ໜ່ວຍ.
ໃນໂອກາດນີ້ຜູ້ຮັບສະໝັກຮັບເລືອກຕັ້ງທັງ ໄດ້ຜັດປ່ຽນກັນສະເໜີຕົວ ຜ່ານປະຫວັດການເຄື່ອນໄຫວຂອງຕົນແຕ່ລະໄລຍະ ແລະ ວິໄສທັດຂອງຕົນເອງ ເພື່ອໃຫ້ຜູ້ມີສິດປ່ອນບັດເລືອກຕັ້ງໄດ້ນຳໄປຄົ້ນຄວ້າ, ພິຈາລະນາ ແລະ ຕັດສິນໃຈເລືອກເອົາຜູ້ແທນຂອງຕົນທີ່ມີມາດຖານຄົນຖ້ວນກວ່າໝູ່ ເຂົ້າໄປເຮັດວຽກຢູ່ໃນສະພາ. ພາຍຫຼັງສຳເລັດການພົບປະປະຊາຊົນຢູ່ບ້ານສາມັກຄີໄຊແລ້ວ ຄະນະຜູ້ສະໝັກໄດ້ສືບຕໍ່ ລົງພົບປະປະຊາຊົນຢູ່ກຸ່ມບ້ານສວນຫຼວງ ແລະ ເຄື່ອນໄຫວໄປພົບປະປະຊາຊົນຢູ່ເມືອງ ໂພນໄຊ ແລະ ເມືອງປາກແຊງຕື່ມອີກ. ສຳລັບແຂວງຫຼວງພະບາງມີຜູ້ສະໝັກຮັບເລືອກຕັ້ງ ເປັນສະມາຊິກສະພາແຫ່ງຊາດ (ສສຊ) ທັງໝົດ 14 ທ່ານ, ຍິງ 5 ທ່ານ, ໃນນັ້ນ ແບ່ງອອກເປັນສອງຄະນະເຄື່ອນໄຫວພົບປະກັບປະຊາຊົນ ຄື: ຄະນະໜຶ່ງ 7 ທ່ານ ລົງ 5 ເມືອງໃຕ້ ແລະ ອີກຄະນະໜຶ່ງ 7 ທ່ານ ລົງ 5 ເມືອງເໜືອ.
ພາບ-ຂ່າວໂດຍ: ດາວອນ ມະນີວັນ