ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XII ຂອງພັກປະຊາຊົນປະຕິວັດລາວ ໃນວັນທີ 6 ມັງກອນ 2026 ຊື່ງເປັນມື້ທໍາອິດ ໄດ້ຮັບຮອງເອົາຫຼາຍເອກະສານສຳຄັນຂອງພັກ ເປັນຕົ້ນຮ່າງໂຄງການການເມືອງສະບັບທີ 3, ຮ່າງລາຍງານການເມືອງສະໄໝທີ XI, ຮ່າງແຜນພັດທະນາເສດຖະກິດ-ສັງຄົມ ຄັ້ງທີ X ແລະ ຮ່າງກົດລະບຽບສະບັບປັບປຸງຂອງພັກປະຊາຊົນປະຕິວັດລາວ.
ໃນໂອກາດຖະແຫລງຂ່າວຕໍ່ສື່ມວນຊົນກ່ຽວກັບຜົນກອງປະຊຸມໃຫຍ່ ຜູ້ແທນທົ່ວປະເທດ ຄັ້ງທີ XII ຂອງພັກມື້ທໍາອິດ ສະຫາຍ ຄໍາພັນ ເຜີຍຍະວົງ ຄະນະເລຂາທິການສູນກາງພັກ ຫົວໜ້າຄະນະໂຄສະນາອົບຮົມສູນກາງພັກ ປະທານສະພາທິດສະດີສູນກາງພັກ ຕາງໜ້າໃຫ້ກອງເລຂາກອງປະຊຸມໃຫຍ່ ແຈ້ງໃຫ້ຮູ້ວ່າ: ກອງປະຊຸມໃຫຍ່ ຄັ້ງທີ XII ຂອງພັກແມ່ນເຫດປະຫວັດສາດການທາງດ້ານການເມືອງອັນສຳຄັນຍິ່ງ ຂອງສາທາລະນະລັດ ປະຊາທິປະໄຕ ປະຊາຊົນລາວ ແລະ ໄດ້ດຳເນີນຢ່າງຖືກ-ຕ້ອງຕາມກົດລະບຽບຂອງພັກ ພາຍໃຕ້ບັນຍາກາດສ້າງສັນ ເອົາການເອົາງານ ແລະມີຄວາມຮັບຜິດຊອບສູງ ໂດຍໄດ້ ຮັບຟັງສູນທອນພົດ ໄຂກອງປະຊຸມໃຫຍ່ຂອງ ສະຫາຍ ທອງລຸນ ສີສຸລິດ ເລຂາທິການໃຫຍ່, ປະທານປະເທດ ສປປ ລາວ ດ້ວຍເນື້ອໃນທີ່ເລິກເຊິ່ງ, ຄົບຖ້ວນ, ຮັບຟັງລາຍງານກ່ຽວກັບ ໂຄງການການ ເມືອງ ສະບັບທີ 03 ຂອງພັກ; ລາຍງານການເມືອງຂອງຄະນະບໍລິຫານງານສູນກາງພັກ ສະໄໝທີ XI ຂອງພັກ, ຮັບຟັງແຜນພັດທະນາເສດຖະກິດ-ສັງຄົມແຫ່ງຊາດ 05 ປີ ຄັ້ງທີ X (2026-2030), ຮ່າງກົດລະບຽບພັກສະບັບປຸງ ສະໄໝທີ XII ຂອງພັກ. ພ້ອມດຽວກັນນີ້ກອງປະຊຸມຍັງໄດ້ຮັບຟັງການປະ ກອບຄຳເຫັນຂອງຕາງໜ້າກະຊວງ-ອົງການທັງສູນກາງ ແລະ ທ້ອງຖິ່ນຈຳນວນ 10 ຫົວຂໍ້. ສຸດທ້າຍກອງປະຊຸມໄດ້ຮັບຮອງເອົາບັນດາເອກະສານຕ່າງໆຢ່າງເປັນເອກກະສັນ.
ສັງລວມແລ້ວ, ກອງປະຊຸມໃຫຍ່ຄັ້ງທີ XII ຂອງພັກ ໃນມື້ທໍາອິດ ແມ່ນດໍາເນີນໄປດ້ວຍບັນຍາກາດທີ່ດີ ແລະ ມີຄວາມຮັບຜິດຊອບສູງ, ມີເນື້ອໃນອຸດົມສົມບູນ, ຮັບປະກັນໄດ້ຕາມກົດລະບຽບຂອງພັກປະຊາຊົນ ປະຕິວັດລາວ ກຳນົດໄວ້.