ຕາມການລາຍງານ ຂອງຫ້ອງການແຮງ ງານ ແລະ ສະຫວັດດີການສັງຄົມ (ຄະນະຄຸ້ມຄອງໄພພິບັດນະຄອນປາກເຊ ແຂວງຈຳປາສັກ )ໃນຄັ້ງວັນທີ 29 ກັນຍາ 2022 ນີ້,ໃຫ້ຮູວ່າ: ສະພາບຝົນຕົກຫຼາຍວັນຕິດ ຕໍ່ກັນ ບວກກັບພະຍຸໃຕ້ຝຸ່ນ ໂນຣຸ ໄດ້ພັດຜ່ານ ເຮັດໃຫ້ຝົນຕົກໜັກ,ລົມພັດແຮງ ໃນວັນທີ 27-28 ກັນຍາ 2022 ຊຶ່ງໄດ້ສົ່ງຜົນກະທົບເຮັດໃຫ້ມິສະພາບນໍ້າຖ້ວມຢູ່ບາງບ້ານຂອງນະຄອນປາກເຊ ທີ່ນອນໃນພື້ນທີ່ຕໍ່າ ແລະ ລຽບແຄມແມ່ນໍ້າ.ແຕ່ບໍ່ມີລາຍງານເຖິງຜົນເສຍຫາຍຮ້າຍແຮງ ຫຼື ຄົນເສຍຊີວິດ.
ສຳລັບບ້ານທີ່ຖືກນໍ້າຖ້ວມຫຼາຍກ່ວາໝູ່ແມ່ນບ້ານນາແຫກ ມີປະຊາຊົນຮັບຜົນກະທົບແລ້ວ 36 ຄອບຄົວ,ໃນນັ້ນ ຫຼາຍຄອບຄົວໄດ້ຍ້າຍອອກມາຢູ່ເຂດປອດໄພຈົນກ່ວານໍ້າໄດ້ຄ່ອຍບົກລົງ ຄືນສູ່ສະພາບປົກກະຕິ. ຈາກນີ້ກໍມີບ້ານທີ່ມີຄວາມສ່ຽງຈາກຍໍ້າຖ້ວມ ເຊັ່ນ: ບ້ານໂພນກຸງ,ໂພນສະອາດ,ບ້ານແກ ເນື່ອງຈາກແມ່ນໍ້ເຊໂດນ,ນໍ້າຂອງຫຍື່ງຂື້ນສູງຕ້ອງເຮັດໃຫ້ປະຊາຊົນເຝົ້າລະວັງຢ່າງໃກ້ຊິດ.
ປະຈຸບັນທາງຄະນະພັກ – ອົງການປົກຄອງແຂວງຈໍາປາສັກ ໄດ້ຊີ້ນຳຄະນະຄຸມຄອງໄພພິບັດ ແຕ່ລະຂັ້ນລົງຕິດຕາມກວດກາ ແລະ ຊ່ວຍເຫຼືອປະຊາຊົນໃນເຂດນໍ້າຖ້ວມແລະ ບ້ານທີ່ມີຄວາມສ່ຽງ ຈາກນີ້ກໍເລັ່ງມືໃນການກະກຽມຈັກສູບນໍ້າ,ເພື່ອສູບນໍ້າອອກຈາກເຂດນໍ້າຖ້ວມຂັງ ເຊັ່ນ: ໄດ້ຕິດຕັ້ງລະບົບໄຟຟ້າ ແລະ ຈັກສູບນໍ້າ ເພື່ອລະບາຍນໍ້າອອກຈາກ ບ້ານໂພນສະອາດ ແລະ ບ້ານແກ.ແລະກະກຽມໃນຈຸດປະຕູລະບາຍນໍ້າອື່ນໆເຊັ່ນ:
– ຄອງເບີ 01 ບ້ານໃຫຍ່ທາໄຮ ( ຫ້ວຍວັດຈີນ )ຈັກສູບນໍ້າ ມີ 2 ເຄື່ອງ ໃຊ້ງານໄດ້ປົກກະຕິ
– ຄອງເບີ 02 ບ້ານໃຫຍ່ທ່າໄຮ ( ຄຸ້ມບຸ່ງອຸດົມ ) ມື 02 ເຄື່ອງ ໃຊ້ງານໄດ້ປົກກະຕິ
– ຄອງເບີ 03 ບ້ານປາກເຊ ( ຫ້ວຍເດື່ອ ມີ 02 ເຄື່ອງ ໃຊ້ງານໄດ້ປົກກະຕິ
– ຄອງເບີ 04 ບ້ານໂພນກຸງ ( ຫ້ວຍວັດໂພນກຸງ ) ໃຊ້ງານບໍ່ໄດ້ ກຳລັງກຽມສ້ອມແປງ.
– ຄອງເປີ 05 ບ້ານໂພນກຸງ ( ດາວເຮືອງ ) ມີ 04 ເຄື່ອງ ໃຊ້ງານໄດ້ 03 ເຄື່ອງ.
– ຄອງເປີ 06 ບ້ານແກ ມີ 02 ເຄື່ອງ ໃຊ້ງານບໍ່ໄດ້ ທັງ 2 ເຄື່ອງ ແລະໄດ້ເລັ່ງມືຕິດເຄື່ອງໃໝ່ມາທົດແທນ ໃນບ່າຍວັນທີ 29 ກັນຍານີ້.
– ຄອງ 07 ບ້ານທ່າຫີນເໜືອ ມີ 02 ເຄື່ອງ ໃຊ້ງານໄດ້ ແຕ່ບໍ່ມີປະຕູນ້ຳ.
ຢ່າງໃດກໍດີນັບຕອນເຊົ້າ ຫາຕອນແລງຂອງວັນທີ 29 ກັນຍາ 2022 ເຫັນວ່າຝົນທີ່ຕົກໃນເຂດນະຄອນປາກເຊ ໄດ້ເບົາລົງແລ້ວ ຖ້າທຽບໃສ່ 2 -3 ວັນຜ່ານມາ ແຕ່ກົມອຸຕຸນິຍົມຍັງແຈ້ງເຕືອນ ໃຫ້ຕ້ອງເຝົ້າລະວັງຕື່ມ ເນື່ອງຈາກນະຄອນປາກເຊ ແຂວງຈຳປາສັກ ຍັງມີປະລິມານນໍ້າໄຫຼມາຈາກພາກກາງ,ພາກເໜືອເປັນຈໍານວນຫຼາຍ ແລະ ຝົນຍັງຈະສືບຕໍ່ຕົກຈົນກ່ວາພະຍຸ ໂນຣຸຈະອ່ອນກຳລັງລົງໃນວັນວັນທີ 30 ກັນຍາ 2022 ນີ້.ຈິ່ງຈະວາງໃຈໄດ້,
ເກດສະໜາ ແກ້ວສຸວັນນະແສງ
