ບ່າຍວັນທີ 30 ມີນາ 2025 ທີ່ຜ່ານມາ, ໄດ້ເກີດເຫດໄຟໃໝ້ລາມປ່າ ເຂດບ້ານສ່າເຫຼົ້າ ຕໍ່ໃສ່ບ້ານຄັນແຍງ (ພູສ່າເຫຼົ້າ) ເມືອງໂພນທອງ ແຂວງຈໍາປາສັກ. ສະພາບໄຟປ່າຄັ້ງນີ້ເກີດຈາກພໍ່ແມ່ປະຊາຊົນຂຶ້ນໄປທໍາມາຫາກິນ ແລະ ມີການຈູດປ່າ ເຮັດໃຫ້ໄຟເກີດລຸກລາມເປັນວົງກວ້າງ. ຕໍ່ສະພາບການດັ່ງກ່າວ ພະແນກ ກະສິກຳແລະ ປ່າໄມ້ແຂວງ ໄດ້ສົມທົບກັບ ຫ້ອງການກະສິກຳ ແລະ ປ່າໄມ້ເມືອງໂພນທອງ ເພື່ອຂຶ້ນດັບມອດທັນທີ, ຮອດເວລາ 21 ໂມງ ສາມາດສະກັດໄຟໃໝ້ໄດ້ພຽງບາງສ່ວນສະເພາະທີ່ເຂດທີ່ສາມາດເຂົ້າເຖິງໄດ້, ສ່ວນເຂດທີ່ເປັນຜາຊັນບໍ່ສາມາດເຂົ້າເຖິງໄດ້ ແລະ ເປັນເວລາກາງຄືນ ແມ່ນບໍ່ສາມາດເຂົ້າສະກັດກັ້ນໄດ້, ຈິ່ງເຮັດໃຫ້ໄຟສືບຕໍ່ລຸກລາມຈົນຮອດເຂດວັດພູສ່າເຫຼົ້າ. ມາຮອດຕອນເຊົ້າວັນທີ 31 ມີນາ 2025, ພະແນກກະສິກຳ ແລະ ປ່າໄມ້ແຂວງ ໄດ້ສືບຕໍ່ສົມທົບກັບ ຄະນະພັກ - ອົງການປົກຄອງເມືອງໂພນທອງ ໄດ້ປະສານສົມທົບຂໍກຳລັງຈາກກອງພັນ 10 ທີ່ຕັ້ງຢູ່ເມືອງໂພນທອງ ມີຈໍານວນພົນເຂົ້າຮ່ວມດັບມອດໄຟປ່າ 62 ຄົນ, ຮອດຕອນຄໍ່າຈິ່ງສາມາດສະກັດກັ້ນໄດ້ໂດຍພື້ນຖານ ແຕ່ຍັງມີບາງຈຸດທີ່ເປັນຂອນໄມ້ໃຫຍ່, ກະຕໍໄມ້ ທີ່ບໍ່ສາມາດດັບມອດໄດ້ທັງໝົດ ຈິ່ງປະກົດເຫັນມີຄວັນຢູ່ ແຕ່ຄະນະຮັບຜິດຊອບມອດໄຟ ໄດ້ເຮັດເຂດກັນແລວໄຟໄວ້ຄັກແນ່ໃນແຕ່ລະຈຸດ ເພື່ອບໍ່ໃຫ້ໄຟສືບຕໍ່ລຸກລາມໄປຕື່ມ. ໄຟໃໝ້ປ່າຄັ້ງ ນີ້ມີເນື້ອທີ່ປ່າໄມ້ຖືກເສຍຫາຍ ປະມານ 20 ເຮັກຕາ.
ຂ່າວ: ທູນທອງໃຈ
ພາບ: ພະແນກກະສິກໍາ ແລະ ປ່າໄມ້ແຂວງ
