ພິທີປ່ອນບັດເລືອກຕັ້ງສະມາຊິກສະພາແຫ່ງຊາດ ຊຸດທີ 10 ແລະ ສະພາປະຊາຊົນແຂວງ ຊຸດທີ 5 ຢູ່ຈຸດເລືອກຕັ້ງທີ 11 ບ້ານໂພນໄຊ ເມືອງ ຫຼວງນໍ້າທາ ແຂວງຫຼວງນໍ້າທາ ເລີ່ມຂຶ້ນຢ່າງເປັນທາງການ ພ້ອມໆກັບໜ່ວຍປ່ອນບັດອື່ນໆໃນຂອບເຂດທົ່ວປະເທດ ໃນວັນທີ 22 ກຸມພາ 2026 ໂດຍມີ ທ່ານ ນາງ ອຳໄພວອນ ລ້ອມບຸນແພງ ກຳມະການປະຈໍາສະພາແຫ່ງຊາດ ຫົວໜ້າຫ້ອງວ່າການສະພາແຫ່ງຊາດ ທັງເປັນຜູ້ສະໝັກຮັບເລືອກຕັ້ງເປັນສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 3 ແຂວງຫຼວງນໍາທາ ພ້ອມດ້ວຍການນໍາແຂວງ ຕະຫຼອດຮອດປະຊາຊົນພາຍໃນເມືອງເຂົ້າຮ່ວມ.
ໃນພິທີ ທ່ານ ສີຈັນ ລໍຄໍາໂຫລຍ ຮອງປະທານຄະນະກໍາມະການປົກຄອງເມືອງ ຫົວໜ້າຄະນະຮັບຜິດຊອບໜ່ວຍປ່ອນບັດເລືອກຕັ້ງ ເມືອງຫຼວງນໍ້າທາ ໄດ້ລາຍງານສະພາບການກຽມການເລືອກຕັ້ງ ແລະ ຄວາມໝາຍສໍາຄັນຂອງການເລືອກຕັ້ງສະມາຊິກສະພາແຫ່ງຊາດ ຊຸດທີ 10 ແລະ ສະພາປະຊາຊົນຂັ້ນແຂວງ ຊຸດທີ 5 ຊື່ງແມ່ນການສືບຕໍ່ຈັດຕັ້ງຜັນຂະຫຍາຍເນື້ອໃນຈິດໃຈມະຕິກອງປະຊຸມໃຫ່ຍ ຄັ້ງທີ 12 ຂອງພັກ ໃນການເສີມຂະຫຍາຍສິດປະຊາທິປະໄຕຂອງປະຊາຊົນເຂົ້າໃນການຄຸ້ມຄອງບໍລິຫານລັດດ້ວຍການສ້າງເງື່ອນໄຂອຳນວຍຄວາມສະດວກໃຫ້ປະຊາຊົນລາວບັນດາເຜົ່າໄດ້ນໍາໃຊ້ສິດປະຊາທິປະໄຕຂອງຕົນຕາມທີ່ກຳນົດໄວ້ໃນລັດຖະທໍາມະນູນ ແລະ ກົດໝາຍ ເພື່ອເລືອກເອົາຜູ້ແທນແຫ່ງສິດ ແລະ ຜົນປະໂຫຍດຂອງຕົນ. ເມືອງຫຼວງນໍ້າທາມີຈຸດປ່ອນບັດເລືອກຕັ້ງທັງໝົດ 97 ຈຸດ ໃນນີ້ມີໜ່ວຍປ່ອນບັດເຄື່ອນທີ່ 26 ໜ່ວຍ ມີຜູ້ມີສິດປ່ອນບັດເລືອກຕັ້ງເອົາສະມາຊິກສະພາແຫ່ງຊາດ ຊຸດທີ 10 ແລະ ສະພາປະຊາຊົນແຂວງ ຊຸດທີ 5 ທັງໝົດ 41.544 ຄົນ.
ເຂດເລືອກຕັ້ງທີ 3 ແຂວງຫຼວງນໍ້າທາ, ມີຜູ້ຮັບສະໝັກເປັນສະມາຊິກສະພາແຫ່ງຊາດ 10 ທ່ານ, ຍິງ 3 ທ່ານ, ເລືອກເອົາ 7 ທ່ານ, ສໍາລັບຜູ້ສະໝັກເປັນສະມາຊິກສະພາປະຊາຊົນແຂວງ ຊຸດທີ V, ມີ 35 ທ່ານ, ຍິງ 13 ທ່ານ, ເລືອກ 25 ທ່ານ, ທົ່ວແຂວງມີຜູ້ມີສິປ່ອນບັດເລືອກຕັ້ງທັງໝົດ 136.346 ຄົນ, ຍິງ 66.770 ຄົນ, ມີໜ່ວຍປ່ອນບັດ 322 ໜ່ວຍ ໃນນີ້ໜ່ວຍປ່ອນບັດເຄື່ອນທີ່ 109 ໜ່ວຍ.
