ໃນວັນທີ 27 ພະຈິກ 2024 ຢູ່ທີ່ຫ້ອງການແຮງງານ ແລະ ສະຫວັດດີການສັງຄົມ ເມືອງນາແລ ແຂວງຫຼວງນໍ້າທາ ໄດ້ຈັດພິທີມອບ-ຮັບເຄື່ອງຊ່ວຍເຫຼືອບັນເທົາທຸກໃຫ້ປະຊາຊົນ ທີ່ໄດ້ຮັບຜົນກະທົບຈາກໄພພິບັດນໍ້າຖ້ວມ ໂດຍການເຂົ້າຮ່ວມຂອງທ່ານ ຄຳເຫຼົ້າ ແກ້ວລະກຳ ຫົວໜ້າພະແຮງງານ ແລະ ສະຫວັດດີການສັງຄົມ ແຂວງຫຼວງນໍ້າທາ, ມີທ່ານ ຕັນ ວັນປະເສີດ ຮອງເຈົ້າເມືອງ ຜູ້ຊີ້ນຳຂົງເຂດວັດທະນະທຳສັງຄົມ ພ້ອມດ້ວຍຄະນະກຳມະການຄຸ້ມຄອງໄພພິບັດ ແລະ ກອງທຶນສັງຄົມສົງເຄາະຂັ້ນເມືອງ ເຂົ້າຮ່ວມ.
ເຄື່ອງທີ່ນຳມາມອບໃນຄັ້ງນີ້ມີ, ແມ່ນໄດ້ມາຈາກກະຊວງແຮງງານ ແລະ ສະຫວັດດີການສັງຄົມ ມອບໃຫ້ຫ້ອງການແຮງງານ ແລະ ສະຫວັດດີການສັງຄົມ ເມືອງນາແລ ຊຶ່ງປະກອບມີເຄື່ອງໃຊ້ຄົວເຮືອນ 250 ແກັດ, ເຄື່ອງສຸກຂະນາໄມ 300 ແກັດ, ຜ້າຫົ່ມ 170 ຜືນ, ມຸ້ງ 500 ດາງ, ຜ້າເຊັດ 150 ຜືນ, ຢາຖູແຂ້ວ 500 ຫຼອດ, ແປງຖຸແຂ້ວ 1,000 ອັນ, ສະບູ 650 ກ້ອນ, ໝີ່ສໍາເລັດຮູບແກັດນ້ອຍ 300 ແພັກ ແລະ ປອງປາ 100 ແພັກ. ກ່າວມອບໂດຍທ່ານ ຄຳເຫຼົາ ແກ້ວລະກຳ ແລະ ກ່າວຮັບໂດຍ ທ່ານ ຕັນ ວັນປະເສີດ ເພື່ອນໍາໄປຊ່ວຍເຫຼືອໄປແຈກຢາຍໃຫ້ປະຊາຊົນ ຜູ້ທີ່ຖືກໄພພິບັດນ້ຳຖ້ວມໃນໄລຍະຜ່ານມາ ຢູ່ເມືອງນາແລ.
ໃນຕອນທ້າຍ ທ່ານຮອງເຈົ້າເມືອງ ໄດ້ກ່າວສະແດງຄວາມຂອບໃຈ ທີ່ທ່ານ ຄຳເຫຼົາ ແກ້ວລະກຳ ທີ່ໄດ້ນຳເອົາເຄື່ອງຊ່ວຍເຫຼືອບັນເທົາທຸກມາມອບໃຫ້ໃນຄັ້ງນີ້ ແລະ ຈະນຳເອົາເຄື່ອງດັ່ງກ່າວລົງມອບໃຫ້ປະຊາຊົນຜູ້ທີ່ຖືກຜົນກະທົບຈາກໄພພິບັດໃນຄັ້ງນີ້ຕາມເປົ້າໝາຍທີ່ວາງໄວ້.
