ພິທີມອບ-ຮັບເຄື່ອງຊ່ວຍເຫຼືອຕອບໂຕ້ໄພພິບັດສຸກເສີນປະເພດເຄື່ອງໃຊ້ໃນຄົວເຮືອນຈາກລັດຖະບານອົດສະຕຣາລີ ໃຫ້ລັດຖະບານລາວ ພາຍໃຕ້ກິດຈະກຳຮ່ວມມືດ້ານວຽກງານການປ້ອງກັນຊາດ ປີ 2025 ເພື່ອສະໜັບສະໜູນລາວ ກຽມພ້ອມຮັບມືກັບໄພພິບັດ ແລະ ການຊ່ວຍເຫຼືອດ້ານມະນຸດສະທຳ ຈັດຂຶ້ນໃນຕອນເຊົ້າວັນທີ 11 ພະຈິກ 2025 ທີ່ສະໜາມບິນສາກົນວັດໄຕ ນະຄອນຫຼວງວຽງຈັນ, ມີ ທ່ານນາງ ເມ ແກນ ຈອນສ, ເອກອັກຄະລັດຖະທູດອົດສະຕຣາລີປະຈຳລາວ, ພ້ອມດ້ວຍ ພົນຈັດຕະວາ ເຈນ ເຮລີສ, ຜູ້ບັນຊາການ ໂຄງການອິນໂດ-ປາຊີຟິກຂອງກອງທັບອົດສະຕຣາລີ ແລະ ພັນໂທ ນິກ ເບີມາ, ທີ່ເປິກສາທູດປ້ອງກັນຊາດອົດສະຕຣາລີ ໄດ້ມອບເຄື່ອງຊ່ວຍເຫຼືອຢ່າງເປັນທາງການໃຫ້ທ່ານ ໂພໄຊ ໄຊຍະສອນ, ລັດຖະມົນຕີ ກະຊວງແຮງງານ ແລະສະຫວັດດີການສັງຄົມ ມີພາກສ່ວນກ່ຽວຂ້ອງເຂົ້າຮ່ວມ.
ການມອບເຄື່ອງຊ່ວຍເຫຼືອຄັ້ງນີ້, ແມ່ນສ່ວນໜຶ່ງຂອງກິດຈະກຳຮ່ວມມືພາກພື້ນດ້ານວຽກງານປ້ອງກັນຊາດ ຫຼື ໂຄງການອິນໂດ-ປາຊີຟິກ ຈັດຕັ້ງນໍາພາໂດຍກອງທັບປ້ອງກັນຊາດຂອງອົດສະຕຣາລີ ເພື່ອເສີມສ້າງການຮ່ວມມື ແລະ ຄວາມເຂັ້ມແຂງໃນທົ່ວພາກພື້ນອິນໂດ-ປາຊີຟິກ.
ເຄື່ອງຊ່ວຍເຫຼືອດ້ານມະນຸດສະທຳ ມີມູນຄ່າ 98,000 ໂດລາອົດສະຕຣາລີ ຫຼື ປະມານ 1 ຕື້ 300 ລ້ານກີບ ປະກອບມີ: ເຄື່ອງສຸຂະອະນາໄມ 360 ຊຸດ, ເຄື່ອງໃຊ້ໃນຄົວເຮືອນ 360 ຊຸດ, ຜ້າຫົ່ມ 2.200 ຜືນ, ມຸ້ງ 2.8000 ດາງ ແລະ ສາດ 1.8000 ຜືນ ເຄື່ອງເຫຼົ່ານີ້,ຈະສະມາດຊ່ວຍເຫຼືອປະຊາຊົນໄດ້ຫຼາຍກວ່າ 1.800 ຄົນ.
ທ່ານນາງ ເມແກນ ຈອນສ, ເອກອັກຄະລັດຖະທູດອົດສະຕຣາລີປະຈຳລາວ ກ່າວວ່າ: ອົດສະຕຣາລີ ມຸ່ງໝັ້ນທີ່ຈະສະໜັບສະໜູນລັດຖະບານລາວ ກະກຽມຄວາມພ້ອມ ແລະ ຕອບໂຕ້ໄພພິບັດທາງທຳມະຊາດ ແລະ ເຫດການສຸກເສີນດ້ານມະນຸດສະທຳ, ພວກເຮົາຍິນດີ ແລະ ດີໃຈທີ່ໄດ້ຮູ້ວ່າ ເຄື່ອງຊ່ວຍເຫຼືອດ້ານມະນຸດສະທຳທີ່ສົ່ງມອບໃຫ້ໄລຍະ 3 ປີ ຜ່ານມາ ໄດ້ຊ່ວຍເຫຼືອຫຼາຍຄອບຄົວທີ່ໄດ້ຮັບຜົນກະທົບຈາກ ໄພນໍ້າຖ້ວມຢູ່ຫຼາຍແຂວງຂອງລາວ.
ທ່ານ ໂພໄຊ ໄຊຍະສອນ ກ່າວສະແດງຄວາມຂອບໃຈຕໍ່ການສະໜັບສະໜູນຢ່າງຕໍ່ເນື່ອງຂອງລັດຖະບານອົດສະຕຣາລີ ໃນການສ້າງຄວາມເຂັ້ມແຂງເພື່ອກຽມພ້ອມຮັບມືກັບໄພພິບັດ ແລະ ການຕອບໂຕ້ພາວະສຸກເສີນລາວ, ເຄື່ອງຊ່ວຍເຫຼືອຕອບໂຕ້ໄພພິບັດນີ້ ແມ່ນມີຄວາມສໍາຄັນ ແລະ ຈໍາເປັນ ພ້ອມທັງໄດ້ຖືກມອບໃຫ້ທັນເວລາ, ຈະຊ່ວຍໃຫ້ພວກເຮົາສາມາດແຈກຢາຍ ແລະ ຕອບສະໜອງຄວາມຕ້ອງການຂອງຄອບຄົວທີ່ຖືກຜົນກະທົບຈາກໄພພິບັດທາງທຳມະຊາດໃນທົ່ວປະເທດໄດ້ຢ່າງວ່ອງໄວ ແລະ ມີປະສິດຕິພາບ ໂດຍສະເພາະຜູ້ປະສົບໄພໃນໄລຍະລະດູຝົນຜ່ານມາ.