ພິທີເປີດງານບຸນນະມັດສະການຜາສາດຫີນວັດພູຈໍາປາສັກ ປະຈໍາປີ 2026 ໄດ້ຈັດຂຶ້ນໃນຕອນແລງ ຂອງວັນທີ 31 ມັງກອນ 2026 ໂດຍການໃຫ້ກຽດເຂົ້າຮ່ວມຂອງທ່ານ ສອນໄຊ ສີພັນດອນ, ນາຍົກລັດຖະມົນຕີ ແລະ ທ່ານ ນາງປານີ ຢາທໍ່ຕູ້, ຮອງປະທານປະເທດ; ມີທ່ານ ເລຂາພັກແຂວງຈຳປາສັກ, ບັນດາທ່ານ ລັດຖະມົນຕີ-ຮອງລັດຖະມົນຕີ ກະຊວງ-ອົງການທີ່ກ່ຽວຂ້ອງ, ຜູ້ຕາງໜ້າການນຳບັນດາແຂວງພາກໃຕ້ ແລະ ແຂວງໄຊຍະບູລີ, ແຂກຖືກເຊີນ ທັງພາຍໃນ ແລະ ຕ່າງປະເທດ ຕະຫຼອດຮອດມວນຊົນ ຊາວແຂວງຈຳປາສັກ ເຂົ້າຮ່ວມຢ່່າງຫຼວງຫຼາຍ.
ໃນໂອກາດນີ້, ທ່ານ ສຸກສະຫວັນ ວິໄລວົງ, ປະທານຄະນະກຳມະການປົກຄອງແຂວງຈຳປາສັກ ໄດ້ມີຄຳເຫັນລາຍງານ ໃຫ້ຊາບວ່າ: ງານບຸນນະມັດສະການຜາສາດຫີນວັດພູຈໍາປາສັກປີນີ້ ໄດ້ຈັດຂຶ້ນໃນທ່າມກາງບັນຍາກາດ ທີ່ທົ່ວພັກ-ລັດ ແລະ ປວງຊົນລາວທັງຊາດ ພວມເບີກບານມ່ວນຊື່ນ ແລະ ຊົມເຊີຍຜົນສຳເລັດຂອງກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XII ຂອງພັກ, ທັງກໍາລັງສ້າງຂະບວນການຕ້ອນຮັບການເລືອກຕັ້ງສະມາຊິກແຫ່ງຊາດ ຊຸດທີ X, ສະພາປະຊາຊົນແຂວງຊຸດທີ V ແລະ ສະເຫຼີມສະຫຼອງສະຖານບູຮານວັດພູຈໍາປາສັກ ຖືກຮັບຮອງເປັນມໍລະດົກໂລກ ຄົບຮອບ 25 ປີ. ໃນໄລຍະຜ່ານມາ, ພັກ ແລະ ລັດຖະບານ ກໍຄື ແຂວງຈຳປາສັກ ຍາມໃດກໍໄດ້ໃຫ້ຄວາມສຳຄັນ ແລະ ເອົາໃຈໃສ່ຢ່າງຕັ້ງໜ້າ ໃນການອະນຸລັກປົກປັກຮັກສາ ແລະ ເສີມຂະຫຍາຍວັດທະນະທຳ-ຮີດຄອງປະເພນີ ອັນດີງາມຂອງຊາດ ໂດຍສະເພາະ ວັດທະນະທຳປູສະນີສະຖານຜາສາດຫີນວັດພູຈຳປາສັກ ທີ່ເປັນສະຖານວັດຖຸບູຮານເກົ່າແກ່ ແລະ ມີຊື່ສຽງທາງດ້ານປະຫວັດສາດ ຂອງຊາດລາວເຮົາ, ໂດຍໄດ້ຈັດງານບຸນຂຶ້ນທຸກໆປີ ໃນມື້ຂຶ້ນ 15 ຄໍ່າ ເດືອນ 3 ເພື່ອອະນຸລັກຮັກສາຮີດຄອງປະເພນີອັນດີງາມ ທີ່ສືບທອດກັນມາແຕ່ດົນນານ ໃຫ້ມີຄວາມຍືນຍົງ, ທັງເປັນການສ້າງບັນຍາກາດ ໃຫ້ມີຄວາມເບີກບານມ່ວນຊື່ນ ເພື່ອຍູ້ຂະບວນການສ້າງສາພັດທະນາທ້ອງຖິ່ນ ໂດຍສະເພາະ ການດຶງດູດນັກທ່ອງທ່ຽວ, ການແລກປ່ຽນບົດຮຽນ, ການແລກປ່ຽນ-ຈໍາໜ່າຍສິນຄ້າ, ການສ້າງລາຍຮັບ ໃຫ້ແກ່ປະຊາຊົນ ແລະ ອື່ນໆ; ສະຖານບູຮານວັດພູຈໍາປາສັກ ໄດ້ຖືກສ້າງຂຶ້ນ ໃນສະຕະວັດທີ VII ແລະ ມີການບູລະນະ-ປະຕິສັງຂອນ ເປັນແຕ່ລະໄລຍະ ເພື່ອອະນຸລັກຮັກສາໃຫ້ສົມບູນຄົບຖ້ວນ. ຍ້ອນຄວາມເອົາໃຈໃສ່ ຂອງພັກ-ລັດ ແລະ ຄວາມເປັນເຈົ້າການຂອງປະຊາຊົນລາວບັນດາເຜົ່າ ໃນການອະນຸລັກປົກປັກຮັກສາ ຈຶ່ງເຮັດໃຫ້ຜາສາດຫີນວັດພູຈຳປາສັກ ຖືກຮັບຮອງຈົດເຂົ້າທະບຽນມໍລະດົກໂລກ ໂດຍອົງການຢູເນັດໂກ (UNESCO) ໃນວັນທີ 16 ທັນວາ 2001.
ພາຍໃນງານປີນີ້, ປະກອບມີກິດຈະກຳຕ່າງໆ ຄື: (1) ພິທີເປີດງານທີ່ຍິ່ງໃຫຍ່ ດ້ວຍລະບົບແສງ-ສີ-ສຽງ ເພື່ອສະແດງກ່ຽວກັບປະຫວັດຄວາມເປັນມາ ຂອງຜາສາດຫີນວັດພູ ໂດຍການສະແດງຮູບພາບປະກອບຕ່າງໆ ຈາກໂດຣນ ຈຳນວນ 590 ລໍາ ແລະ ການຍິງພຸໄຟ ຈໍານວນ 250 ລູກ; (2) ການວາງສະແດງ ແລະ ຈໍາໜ່າຍສິນຄ້າ; (3) ການແຂ່ງຂັນກິລາພື້ນເມືອງ; (4) ການສະແດງສິລະປະວັນນະຄະດີ; (5) ການຮັບປະທານອາຫານທ້ອງຖິ່ນ ທີ່ເປັນເອກະລັກຂອງເມືອງຈໍາປາສັກ; (6) ຈັດກອງປະຊຸມສໍາມະນາວິທະຍາສາດ ກ່ຽວກັບການເຂົ້າເປັນມໍລະດົກໂລກ ຂອງວັດພູຈໍາປາສັກ ຄົບຮອບ 25 ປີ; (7) ການກາບໄຫວ້-ບູຊາ ພະພຸດທະຮູບ ແລະ ເຂົ້າຮ່ວມພິທີທາງສາດສະໜາ (ຟັງທໍາມະ, ສູດປະຣິຕະມຸງຄຸນ) ຕະຫຼອດຄືນວັນທີ 01 ກຸມພາ 2026; ແລະ (8) ພິທີຕັກບາດຖວາຍສັງຄະທານ ແດ່ພະສົງຫຼາຍຮ້ອຍອົງ ໃນຕອນເຊົ້າຂອງວັນທີ 02 ກຸມພາ 2026.
ຫຼັງຈາກນັ້ນ, ບັນດາທ່ານ ການນຳຂັ້ນສູງທີ່ເຂົ້າຮ່ວມ ກໍ່ໄດ້ໃຫ້ກຽດກົດປຸ່ມ ເພື່ອເປີດງານບຸນນະມັດສະການຜາສາດຫີນວັດພູຈໍາປາສັກ ປະຈໍາປີ 2026 ຢ່າງເປັນທາງການ ແລະ ສືບຕໍ່ຮັບຊົມການສະແດງຮູບພາບຕ່າງໆດ້ວຍໂດຣນ ເຊິ່ງມີຄວາມສວຍງາມ ແລະ ໄດ້ຮັບຄວາມສົນໃຈ ຈາກຜູ້ເຂົ້າຮ່ວມງານ ເປັນຢ່າງດີ.