ພິທີໂຮມຊຸມນຸມໃຫ່ຍສະເຫຼີມສະຫຼອງວັນສ້າງຕັ້ງ ສະຫະພັນກໍາມະບານລາວ ວັນທີ 01 ກຸມພາ ຄົບຮອບ 70 ປີ ຈັດຂຶ້ນໃນຕອນເຊົ້າວັນທີ 02 ກຸມພາ 2026 ທີ່ຫໍປະຊຸມແຫ່ງຊາດ ນະຄອນຫຼວງວຽງຈັນ ໂດຍການໃຫ້ກຽດເຂົ້າຮ່ວມຂອງສະຫາຍ ກິແກ້ວ ໄຂຄຳພິທູນ ກໍາມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ, ສະຫາຍ ເລັດ ໄຊຍະພອນ ປະທານຄະນະບໍລິຫານງານສູນກາງສະຫະພັນກຳມະບານລາວ , ພ້ອມດ້ວຍຮອງປະທານ “ສະຫະພັນກຳມະບານ ກະຊວງ, ອົງການ, ນະຄອນຫຼວງ, ແຂວງ, ສະມາຊິກກຳມະບານໃນຂອບເຂດທົ່ວປະເທດ ແລະ ແຂກຮັບເຊີນ
ໃນພິທີ ສະຫາຍ ເລັດ ໄຊຍະພອນ ປະທານຄະນະບໍລິຫານງານສູນກາງສະຫະພັນກໍາມະບານລາວ ໄດ້ລາຍງານຜົນສຳເລັດການເຄື່ອນໄຫວວຽກງານຂອງສະຫະພັນກຳມະບານລາວຕະຫຼອດໄລຍະ 70 ປີວ່າ: ຕະຫຼອດໄລຍະ 70 ປີ ຜ່ານມາ, ສະຫະພັນກໍາມະບານລາວ ໄດ້ເອົາໃຈໃສ່ເຄື່ອນໄຫວຕາມພາລະບົດບາດ, ສິດ ແລະ ໜ້າທີ່ຂອງຕົນ, ໄດ້ຜັນຂະຫຍາຍມະຕິກອງປະຊຸມໃຫຍ່ຂອງພັກ, ແຜນພັດທະນາເສດຖະກິດ-ສັງຄົມແຫ່ງຊາດ ຕິດພັນກັບວຽກງານວິຊາສະເພາະ, ເຮັດໃຫ້ສະຫະພັນກຳມະບານລາວເຕີບໃຫຍ່ຂະຫຍາຍຕົວ ທາງດ້ານປະລິມານ ແລະ ຄຸນນະພາບ ສະແດງອອກໃນການສຳເລັດກອງປະຊຸມໃຫຍ່ຜູ້ແທນກຳມະບານລາວທົ່ວປະເທດມາແລ້ວ 9 ຄັ້ງ ສາມາດຍາດໄດ້ຜົນສໍາເລັດຫຼາຍດ້ານ ເປັນຕົ້ນ: ສະຫະພັນກຳມະບານແຕ່ລະຂັ້ນ ໄດ້ເອົາໃຈໃສ່ຈັດຕັ້ງຜັນຂະຫຍາຍແນວທາງປ່ຽນແປງໃໝ່ຮອບດ້ານທີ່ມີຫຼັກການຂອງພັກ ເຂົ້າສູ່ວຽກງານຕົວຈິງ ຖືເອົາການສຶກສາອົບຮົມການເມືອງ-ແນວຄິດໃຫ້ພະນັກງານ, ສະມາຊິກກຳມະບານ, ກຳມະກອນ ແລະ ຊາວຜູ້ອອກແຮງງານ ເປັນບັນຫາສຳຄັນ, ໂຄສະນາສຶກສາອົບຮົມແນວທາງ ນະໂຍບາຍຂອງພັກ, ແຜນພັດທະນາເສດຖະກິດ-ສັງຄົມ, ກົດໝາຍ, ລະບຽບການຂອງລັດ, ມູນເຊື້ອອັນດີງາມຂອງຊາດ, ຂອງພັກ, ຂອງສາກົນ, ຂອງຊົນຊັ້ນກຳມະກອນລາວ, ສະມາຊິກກຳມະບານໄດ້ຮໍ່າຮຽນຄຸນສົມບັດສິນທຳປະຕິວັດ, ແບບແຜນວິທີເຮັດວຽກ, ນິຕິກຳຕ່າງໆ ຂອງກຳມະບານດ້ວຍຫຼາຍຮູບການ, ຫຼາຍວິທີການ ຜ່ານສື່ຕ່າງໆ ເຮັດໃຫ້ບົດບາດຂອງສະຫະພັນກຳມະບານລາວ ນັບມື້ສູງເດັ່ນຂື້ນຢູ່ທັງພາຍໃນ ແລະ ຕ່າງປະເທດ.
ພາຍຫຼັງປະທານຄະນະບໍລິຫານງານສູນກາງສະຫະພັນກໍາມະບານລາວ ລາຍງານຜົນສຳເລັດການເຄື່ອນໄຫວວຽກງານຂອງສະຫະພັນກຳມະບານລາວ ຕະຫຼອດໄລຍະ 70 ປີ ຜ່ານມາສຳເລັດແລ້ວ ສະຫາຍ ກິແກ້ວ ໄຂຄຳພິທູນ ກໍາມະການກົມການເມືອງສູນກາງພັກ, ປະທານສູນກາງ ແນວລາວສ້າງຊາດ ໄດ້ກ່າວສູນທອນພົດ ໃນພິທີຄັ້ງນີ້ມີບາງຕອນວ່າ: ຕະຫຼອດໄລຍະ 70 ປີຜ່ານມາ ຊົນຊັ້ນກຳມະກອນແມ່ນກຸ່ມຄົນ ທີ່ມີຄວາມຕື່ນຕົວທາງການເມືອງ, ມີມານະຈິດປະຕິວັດສູງ, ມີລະບຽບວິໄນສູງ, ມີສະຕິຕື່ນຕົວ, ເຮັດທຸກສິ່ງຢ່າງເພື່ອຜົນປະໂຫຍດຂອງກຳມະກອນ ແລະ ຊາວຜູ້ອອກແຮງງານ, ເປັນຊົນຊັ້ນທີ່ມີຄວາມເສຍສະຫຼະເພື່ອປະເທດຊາດ ເພື່ອປະຊາຊົນຢ່າງແທ້ຈີງ. ຍ້ອນແນວນັ້ນ ຊົນຊັ້ນກຳມະກອນ ຈິ່ງເປັນຊົນຊັ້ນຫຼັກໜຶ່ງໃນການສ້າງຕັ້ງພັກຄອມມູນິດຢູ່ໃນໂລກ. ສຳລັບຊົນຊັ້ນກຳມະກອນລາວ ຫາກໍ່ຕົວຂຶ້ນ ສ່ວນໃຫຍ່ແມ່ນມາຈາກຊາວໄຮ່ນາ ເຂົາເຈົ້າໄດ້ຍອມເສຍສະລະຊີວິດເຂົ້າຮ່ວມການຕໍ່ສູ້ປະຕິວັດ ແລະ ໄດ້ຮັບການອົບຮົມສັ່ງສອນຈາກພັກ, ຝຶກຝົນຫຼໍ່ຫຼອມຕົນເອງໃຫ້ເຕີບໃຫ່ຍ ກາຍເປັນຄົນທີ່ມີທັດສະນະຊົນຊັ້ນກຳມະກອນຢ່າງແທ້ຈິງ.
ໃນພິທີໂຮມຊຸມໃຫ່ຍຄັ້ງນີ້, ຍັງໄດ້ມອບຫຼຽນໄຊອິດສະຫຼະຊັ້ນ 3 ໃຫ້ສູນກາງສະຫະພັນກໍາມະບານລາວ ທີ່ມີຜົນງານພົ້ນເດັ່ນໃນການເຄືອນໄຫວວຽກງານກຳມະບານ ຕະຫຼອດໄລຍະ 70 ຜ່ານມາ.