ເມື່ອບໍ່ດົນມານີ້ ທີ່ສໍານັກງານໃຫຍ່ອົງການການຄ້າໂລກ (ອຄລ) ທີ່ ເຊີແນວ ປະເທດ ສະວິດ, ໂດຍການມອບໝາຍຈາກລັດຖະບານ ແຫ່ງ ສປປ ລາວ, ທ່ານ ລັດສະໝີ ແກ້ວມະນີ ເອກ ອັກຄະລັດຖະທູດວິສາມັນຜູ້ມີອໍານາດເຕັມ, ຜູ້ຕາງໜ້າຖາວອນ ແຫ່ງ ສປປ ລາວ ປະຈຳ ຫ້ອງການ ສປຊ ແລະ ອົງການຈັດຕັ້ງສາກົນອື່ນໆ ທີ່ເຊີແນວ, ໄດ້ເປັນກຽດມອບເອກະສານສັດຕະຍາບັນສັນຍາວ່າດ້ວຍການຖົມຂຸມການປະມົງ (WTO Fisheries Subsidies Agreement) ຕໍ່ ທ່ານ ນາງ ໂງຊິ ໂອໂກນໂຈ-ໄອເວຍລາ (Ngozi Okonjo-Iweala), ຜູ້ອໍານວຍການໃຫຍ່ ອຄລ.
ໃນພິທີ ມອບ-ຮັບ ເອກະສານດັ່ງກ່າວ, ທ່ານ ຜູ້ອຳນວຍການໃຫຍ່ ອຄລ ໄດ້ຕີລາຄາສູງ ແລະ ຊົມເຊີຍຢ່າງສຸດໃຈຕໍ່ລັດຖະບານ ແຫ່ງ ສປປ ລາວ ທີ່ໄດ້ສຳເລັດ ແລະ ຮັບຮອງເອົາສັນຍາດັ່ງກ່າວໃນຖານະປະເທດດ້ອຍພັດທະນາ ແລະ ບໍ່ມີທາງອອກສູ່ທະເລ, ຊຶ່ງເປັນການປະກອບສ່ວນອັນສຳຄັນເຂົ້າໃນຄວາມພະຍາຍາມລວມຂອງປະຊາຄົມໂລກ ແນໃສ່ແກ້ໄຂບັນຫາການປະມົງເກີນຂະ ໜາດ, ການຄຸ້ມຄອງ-ພັດທະນາການປະມົງແບບຍືນຍົງ, ການຄໍ້າ ປະກັນສະບຽງອາຫານ, ຍົກລະດັບຊີວິດການເປັນຢູ່ຂອງປະຊາ ຊົນ ແລະ ບັນລຸໄດ້ເປົ້າໝາຍການພັດທະນາແບບຍືນຍົງ ສປຊ ໃນປີ 2030.
ໃນພິທີດັ່ງກ່າວ, ທ່ານທູດ ກໍໄດ້ ຕີລາຄາສູງ ແລະ ຊົມເຊີຍ ອຄລ ພາຍໃຕ້ການຊີ້ນໍາ-ນໍາພາ ຂອງ ທ່ານ ຜູ້ອໍານວຍການໃຫຍ່ ທີ່ໄດ້ສຳເລັດ ແລະ ຮັບຮອງເອົາສັນຍາດັ່ງກ່າວໃນກອງປະຊຸມລັດຖະມົນຕີ ອຄລ ຄັ້ງທີ 13 ຜ່ານມາ ຊຶ່ງ ສປປ ລາວ ເຖິງຈະເປັນປະເທດດ້ອຍພັດທະນາ ແລະ ບໍ່ມີທາງອອກສູ່ທະເລ, ແຕ່ກໍມີຄວາມໝາຍໝັ້ນແບບສະເໝີຕົ້ນສະເໜີປາຍໃນການປະຕິບັດພັນທະ ແລະປະກອບສ່ວນອັນສໍາຄັນເຂົ້າໃນຄວາມພະຍາຍາມລວມຂອງປະຊາຄົມໂລກໃນການພັດທະນາແບບຍືນຍົງ ແລະ ແກ້ໄຂສະພາບການປ່ຽນແປງຂອງດິນຟ້າອາກາດ ລວມທັງການຄຸ້ມຄອງ ແລະ ພັດທະນາການປະມົງແບບຢືນຢົງ ແນໃສ່ປົກປັກຮັກສາສິ່ງແວດລ້ອມແລະຊັບພະຍາກອນທໍາມະຊາດ ແລະ ບັນລຸເປົ້າໝາຍການພັດທະນາແບບຢືນຢົງ ສປຊ ໃນປີ 2030. ທ່ານທູດ ໄດ້ຢືນຢັນຕື່ມວ່າ: ສປປ ລາວ ມີຄວາມພ້ອມເຂົ້າໃນການຈັດຕັ້ງປະຕິບັດສັນຍາດັ່ງກ່າວ ໂດຍສະເພາະການພັດທະນາຊັບພະຍາກອນມະນຸດ ແລະການສ້າງຂີດຄວາມສາມາດ. ມາຮອດປັດຈຸບັນ, ສປປ ລາວ ເປັນປະເທດ ອັນດັບທີ 74 ທີ່ໃຫ້ສັດຕະ ຍາບັນສັນຍາວ່າດ້ວຍການຖົມຂຸມການປະມົງ ອຄລ ແລະ ສັນຍາດັ່ງກ່າວຈະມີຜົນສັກສິດໄດ້ກໍຕໍ່ເມື່ອ 2/3 ຂອງປະເທດສະມາຊິກ ອຄລ ໃຫ້ສັດຕະຍາບັນ (ຍັງອີກ 36 ປະເທດ).
