ໃນວັນທີ 28 ພະຈິກ 2022 ຢູ່ທີ່ກະຊວງແຜນການ ແລະ ການລົງທຶນ, ບໍລິສັດ ຊີໂນ-ອາກຣີ ໂປຕາສ ຈໍາກັດ (ຕໍ່ໄປນີ້“ຊີໂນ-ອາກຣີ ໂປຕາສ”) ແລະ ລັດຖະບານ ແຫ່ງ ສປປ ລາວ ໄດ້ມີການລົງນາມໃນສັນຍາວ່າດ້ວຍການສໍາຫຼວດແຮ່ເກືອໂປຕາສ ຢູ່ເຂດບ້ານໜອງລົ່ມ ເມືອງໜອງບົກ ແຂວງຄໍາມ່ວນ ເນື້ອທີ່ 48.52 ກິໂລຕາແມັດ, ຕາງໜ້າສໍານັກງານນາຍົກລັດຖະມົນຕີ, ການນໍາຂອງກະຊວງແຜນການ ແລະ ການລົງທຶນ, ກະຊວງພະລັງງານ ແລະ ບໍ່ແຮ່, ອໍານາດການປົກຄອງ ແຂວງຄໍາມ່ວນ ແລະພາກສ່ວນກ່ຽວຂ້ອງອື່ນໆ ແມ່ນໄດ້ເຂົ້າຮ່ວມ ແລະ ເປັນສັກຂີພະຍານໃນການເຊັນສັນຍາດັ່ງກ່າວ.
ແຮ່ທາດ ເກືອໂປຕາສ ທີ່ອຸດົມສົມບູນຂອງລາວ ໄດ້ດຶງດູດຈາກນັກລົງທຶນໃນທົ່ວໂລກຢ່າງຫຼວງຫຼາຍ ແລະ ລັດຖະບານ ລາວ ແມ່ນມີຄວາມລະມັດລະວັງຫຼາຍໃນການເລືອກບໍລິສັດມາພັດທະນາ. ລັດຖະບານຈະໃຫ້ບູລິມະສິດ ຫຼື ຈະເລືອກ ບໍລິສັດ ທີ່ມີທຶນຮອນອັນເຂັ້ມແຂງ ແລະ ມີເຕັກໂນໂລຊີຂຸດຄົ້ນບໍ່ແຮ່ໂປຕາສທີ່ດີ, ຈາກການປະເມີນ, ກວດກາ, ທາງລັດຖະບານຈິ່ງເຫັນວ່າ ຊີໂນອາກຣີ ໂປຕາສ ແມ່ນມີຄວາມເໝາະສົມທີ່ສຸດ.
ໂຄງການຜະລິດຝຸ່ນໂປຕາສ ຂະໜາດ 1 ລ້ານໂຕນຕໍ່ປີແຫ່ງທີ 2 ຄາດວ່າຈະເລີ່ມດຳເນີນການທົດລອງໃນທ້າຍປີນີ້, ໄລຍະເວລາການກໍ່ສ້າງຂອງໂຮງງານແມ່ນໃຊ້ເວລາພຽງແຕ່ 10 ເດືອນ, ເປັນສະຖິຕິຄວາມໄວທີ່ລື່ນກາຍສາກົນ. ໂຄງການຜະລິດຝຸ່ນໂປຕາສແຫ່ງທີສາມທີ່ມີກຳລັງການຜະລິດ 1 ລ້ານໂຕນຕໍ່ປີ ໄດ້ເລີ່ມເລັ່ງກໍ່ສ້າງ, ຄາດວ່າທ້າຍປີໜ້າກໍສາມາດທົດລອງຜະລິດ.
ທ່ານ ອາຍ ຢົງຈຸນ ຮອງອໍານວຍການ ບໍລິສັດ ຊີໂນ-ອາກຣີ ໂປຕາສ ໄດ້ເວົ້າວ່າ ໃນເດືອນເມສາຂອງປີນີ້ ບໍລິສັດ ໄດ້ເລີ່ມສະເໜີຂໍສໍາປະທານບໍ່ແຮ່ ເກືອໂປຕາສບ້ານໜອງລົ່ມ ເນື້ອທີ່ 48.52km2, ໃນວັນທີ 27 ຕຸລາ ໄດ້ຮັບແຈ້ງການກ່ຽວກັບການເຈລະຈາສັນຍາສໍາຫຼວດຈາກກະຊວງແຜນການ ແລະ ການລົງທຶນ, ໃນວັນທີ 4 ພະຈິກ ໄດ້ສໍາເລັດການເຈລະຈາກັບອໍານາດການປົກຄອງແຂວງຄໍາມ່ວນ. ວັນທີ 25 ເດືອນພະຈິກ ຫຼັງຈາກທີ່ນາຍົກລັດຖະມົນຕີມອບສິດໃຫ້ກະຊວງແຜນການ ແລະ ການລົງທຶນ ເຊັນສັນຍາສໍາຫຼວດ ກັບບໍລິສັດ, ໃນວັນທີ 27 ພະຈິກ ບໍລິສັດ ກໍສໍາເລັດການຊໍາລະຄ່າສໍາປະທານ 10 ລ້ານໂດລາ, ໄດ້ຈ່າຍອາກອນຊັບພະຍາກອນ ແລະ ໄດ້ຈັດຕັ້ງການເຊັນສັນຍາສໍາຫຼວດສໍາເລັດ ແລະ ເລີ່ມການສໍາຫຼວດໃນວັນທີ 28 ພະຈິກ.
ໃນລະຫວ່າງນັ້ນ, ທາງ ຊີໂນ-ອາກຣີ ໂປຕາສ ໄດ້ກໍານົດແຜນການສໍາຫຼວດທີ່ລະອຽດ, ທາງ ຊີໂນ-ອາກຣີ ໂປຕາສ ໄດ້ເພີ່ມຈໍານວນຂຸມເຈາະສໍາຫຼວດທີ່ໄດ້ມາດຕະຖານຕາມຂັ້ນຕອນການຂຸດຄົ້ນ ໂດຍເພີ່ມຂຶ້ນຈາກ 37 ເປັນ 46, ເກີນມາດຕະຖານການຂຸດເຈາະ ໃນພື້ນທີ່ຂຸດຄົ້ນບໍ່ແຮ່ເບື້ອງຕົ້ນໃນໄລຍະການຂຸດຄົ້ນບໍ່ແຮ່. ພ້ອມນັ້ນຍັງໄດ້ມີການກໍານົດເຈດຈໍານົງການສໍາຫຼວດກັບ 2 ບໍລິສັດ, ສາມາດຮວບຮວມເຄື່ອງຂຸດເຈາະໄດ້ 23 ເຄື່ອງ, ຮອດປະຈຸບັນແມ່ນມີ 10 ກວ່າເຄື່ອງ ທີ່ມາຮອດສະໜາມ ແລະ ສາມາດນໍາໃຊ້ໄດ້ແລ້ວ, ສ່ວນທີ່ເຫຼືອແມ່ນກໍາລັງທະຍອຍມາ.
ແຜນການສໍາຫຼວດ ຂອງບໍລິສັດ ໄດ້ຍົກສູງປະສິດທິພາບ ແລະ ຄວາມໄວໃນການສຳຫຼວດ ແລະ ຜະລິດເກືອໂປຕາສ ໃນບ້ານໜອງລົ່ມ. ປັບໄລຍະເວລາການສໍາຫຼວດເດີມ 2 ປີ, ການສຶກສາຄວາມເປັນໄປໄດ້ 1 ປີ ແລະ ການປະເມີນສິ່ງແວດລ້ອມ 1 ປີ, ຫຼັງຈາກດໍາເນີນການຜະລິດເກືອໂປຕາສ, ນອກຈາກຜົນປະໂຫຍດທີ່ໄດ້ມາຈາກການລົງທຶນໃນຊັບສິນຄົງທີ່ໃນໄລຍະການກໍ່ສ້າງ, ທຸກໆການຜະລິດ ເກືອໂປຕາສ 1 ລ້ານໂຕນ ຊຸກຍູ້ໃຫ້ເກີດການຈ້າງງານ ປະມານ 3.000 ຄົນ ແລະ ເສຍພາສີອາກອນປະຈໍາປີໃຫ້ແກ່ລັດຖະບານເປັນເງິນ 30 ລ້ານໂດລາສະຫະລັດ.
ທາງວິສະວະກອນ ບໍລິສັດ ຊີໂນ-ອາກຣີ ໂປຕາສ ຈໍາກັດ ໃຫ້ຮູ້ຕື່ມວ່າ: ບໍລິສັດ ກໍາລັງກໍ່ສ້າງເຂດນິຄົມອຸດສາຫະກໍາລະດັບປະເທດຢູ່ແຂວງຄໍາມ່ວນ. ອີງໃສ່ຊັບພະຍາກອນບໍ່ແຮ່ທີ່ມີໃນ ປັດຈຸບັນ, 1. ເລັ່ງຂະຫຍາຍກໍາລັງການຜະລິດຂອງຝຸ່ນໂປຕາສ, ສ້າງເຂດນິຄົມອຸດສາຫະກໍາຝຸ່ນໂປຕາສ. ປັດຈຸບັນ, ໂຄງການທີສອງ ແລະ ໂຄງການທີສາມ ໂຄງການຜະລິດຝຸ່ນໂປຕາສ 1 ລ້ານໂຕນ/ປີ ແມ່ນກໍາລັງດໍາເນີນການກໍ່ສ້າງຢ່າງເຕັມທີ່, ສ່ວນໂຄງການທີສີ່ ແລະ ໂຄງການທີຫ້າ ໂຄງການຜະລິດຝຸ່ນໂປຕາສ 1 ລ້ານໂຕນ/ປີ ແມ່ນໄດ້ປະກອບເອກະສານ ແລະ ສະເໜີໄປຫາພາກສ່ວນທີ່ກ່ຽວຂ້ອງຂອງພາກລັດລາວແລ້ວ. ຄາດຄະເນ ປີ 2023 ຈະສາມາດ ເພີ່ມກໍາລັງການຜະລິດປຸ໋ຍໂປຕາສ 3 ລ້ານໂຕນ, ປີ 2025 ເພີ່ມກໍາລັງການຜະລິດ 5 ລ້ານໂຕນ, ແລະຈະພະຍາຍາມສູ້ຊົນເພີ່ມກຳລັງການຜະລິດ ໃນລະດັບ 10 ລ້ານໂຕນ ໃນໄລຍະກາງ ແລະ ໄລຍະຫຼັງ, ກາຍເປັນຖານຜະລິດຝຸ່ນໂປຕາສໃຫຍ່ທີ່ສຸດໃນອັນດັບທີ 4 ຂອງໂລກ; 2. ສົມທົບພັດທະນາຊັບພະຍາກອນທີ່ບໍ່ແມ່ນໂປຕາສ, ສ້າງນິຄົມອຸດສາຫະກໍາອະໂປຕາສ (ບໍ່ມີໂປຕາສ), ນໍາໃຊ້ຊັບພະຍາກອນແຮ່ຕິດພັນຂອງບໍ່ແຮ່ເກືອໂປຕາສ (ໂບຣມິນ, ເກືອນາຕີ ແລະ ອື່ນໆ), ພັດທະນາໂຄງການສານໂບຣມິນ, ອຸດສາຫະກໍາເຄມີ ຄລໍ-ອານຄາໄລ (chlor-alkali), ເກືອບໍລິໂພກ ແລະ ອື່ນໆ, 3. ສ້າງຕົວເມືອງ ອາຊີ-ໂປຕາສຂະໜາດນ້ອຍ, ຊຸກຍູ້ການພັດທະນາແບບຕົວເມືອງ. ຜ່ານການສ້າງຕົວເມືອງຂະໜາດນ້ອຍ, ປັບປຸງສະພາບແວດລ້ອມດໍາລົງຊີວິດຂອງປະຊາຊົນໃນບໍລິເວນອ້ອມຂ້າງ, ດໍາເນີນການເຄື່ອນໄຫວຊ່ວຍເຫຼືອຄວາມທຸກຍາກດ້ວຍກະສິກໍາ ແລະ ສ້າງກອງທຶນການສຶກສາ, ເຮັດໃຫ້ການພັດທະນາສົ່ງຜົນປະໂຫຍດຕົວຈິງຕໍ່ປະຊາຊົນໃນບໍລິເວນອ້ອມຂ້າງ, ຊຸກຍູ້ການພັດທະນາເສດຖະກິດທ້ອງຖິ່ນ ແລະ ການກໍ່ສ້າງຊີວິດສັງຄົມ. ໃນອະນາຄົດ, ບໍລິສັດວາງແຜນຈະນໍາເອົາຮູບແບບການພັດທະນາດັ່ງກ່າວໄປນໍາໃຊ້ໃນເຂດບໍ່ເກືອໂປຕາສ ເນື້ອທີ່ 48.52 ກິໂລຕາແມັດ ຢູ່ບ້ານໜອງລົ່ມ ແລະ ເຮັດໃຫ້ນິຄົມອຸດສາຫະກໍາມີການເຊື່ອມໂຍງກັນ, ສ້າງມູນຄ່າສູງກວ່າເກົ່າ ແລະ ສົ່ງຜົນປະໂຫຍດຕໍ່ປະຊາຊົນຫຼາຍກວ່າເກົ່າ.