ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ໃນວັນທີ 28 ຕຸລາ 2021, ທີ່ ກະຊວງການຕ່າງປະເທດ, ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມອຳລາຂອງ ທ່ານ ທາເກວາກະ ເຄໂຊ, ເອກອັກຄະຣາຊະທູດ ແຫ່ງ ຍີ່ປຸ່ນ ປະຈໍາ ສປປ ລາວ, ໃນໂອກາດທີ່ທ່ານ ໄດ້ສໍາເລັດການປະຕິບັດຫນ້າທີ່ການທູດຢູ່ ສປປ ລາວ.
ໃນໂອກາດນີ້, ທ່ານລັດຖະມົນຕີ ສະເຫຼີມໄຊ ກົມມະສິດ ໄດ້ສະແດງຄວາມຊົມເຊີຍຕໍ່ຜົນສຳເລັດການປະຕິບັດຫນ້າທີ່ຂອງ ທ່ານທູດ ທາເກວາກະ ເຄໂຊ, ພ້ອມທັງສະແດງຄວາມຂອບໃຈ ແລະ ຕີລາຄາສູງຕໍ່ການປະກອບສ່ວນຢ່າງຫ້າວຫັນໃນການສືບຕໍ່ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີ ລະຫວ່າງ ສອງປະເທດ ກໍ່ຄືການຜັນຂະຫຍາຍການເປັນຄູ່ຮ່ວມຍຸດທະສາດ ລາວ-ຍີ່ປຸ່ນ ນັບຕັ້ງແຕ່ໄດ້ຍົກລະດັບຄູ່ຮ່ວມມື ໃນປີ 2015 ເປັນຕົ້ນມາ.
ຕະຫຼອດໄລຍະເວລາ 2 ປີ ທີ່ປະຕິບັດຫນ້າທີ່ການທູດຢູ່ ສປປ ລາວ ທ່ານທູດ ໄດ້ປະຕິບັດຫນ້າທີ່ຢ່າງຕັ້ງຫນ້າໃນການຊຸກຍູ້ໃຫ້ມີການພົບປະແລກປ່ຽນຢ້ຽມຢາມຂອງການນຳຂັ້ນສູງຂອງສອງປະເທດ ຢ່າງເປັນປົກກະຕິ, ລະດົມຂົນຂວາຍບັນດາໂຄງການຊ່ວຍເຫຼືອລ້າຈາກລັດຖະບານຍີ່ປຸ່ນ ໃຫ້ແກ່ ສປປ ລາວ ເປັນຕົ້ນແມ່ນ ການພັດທະນາພື້ນຖານໂຄງລ່າງ, ຂະແໜງກະສິກຳ ແລະ ຂະແໜງການສຶກສາ, ຊຶ່ງການຊ່ວຍອັນພົ້ນເດັ່ນແມ່ນ ໂຄງການກໍ່ສ້າງລະບົບຂະຫຍາຍທໍ່ສົ່ງນ້ຳປະປາ ຢູ່ນະຄອນຫຼວງພະບາງ, ໂຄງການຊ່ວຍເຫຼືອລ້າດ້ານອຸປະກອນ ເພື່ອປະກອບເຂົ້າໃນວຽກງານກຽມພ້ອມ ໂຕ້ຕອບ ແລະ ຟື້ນຟູ ຫຼັງໄພພິບັດ, ໂຄງການຊ່ວຍເຫຼືອລ້າລົດເມ, ອາໄຫລ່ ແລະ ອຸປະກອນສຳລັບສ້ອມແປງລົດເມ, ໂຄງການທຶນການສຶກສາ ເພື່ອພັດທະນາຊັບພະຍາກອນມະນຸດ ສົກປີ 2020 ແລະ 2021, ໂຄງການປັບປຸງວິທະຍາໄລສ້າງຄູຢູ່ບັນດາແຂວງຂອງລາວ ແລະ ອື່ນໆ. ພິເສດໃນປີ 2020 ຜ່ານມາ ຖືເປັນການຄົບຮອບ 65 ປີ ແຫ່ງການສ້າງຕັ້ງສາຍພົວພັນການທູດ ລະຫວ່າງ ລາວ-ຍີ່ປຸ່ນ, ການນໍາຂັ້ນສູງຂອງສອງປະເທດ ໄດ້ແລກປ່ຽນໂທລະສານອວຍເຊິ່ງກັນ ແລະ ກັນ, ມີການຈັດປະຖະກະຖາວັນສຳຄັນທາງການທູດ ແລະ ບັນດາກິດຈະກຳຕ່າງໆຮ່ວມກັນ ໂດຍມີຄວາມໝາຍສຳຄັນ ແລະ ມີບັນຍາກາດທີ່ຟົດຟື້ນ. ນອກຈາກນີ້, ທ່ານທູດ ຍັງໄດ້ຊຸກຍູ້ການປະຕິບັດໜ້າທີ່ຂອງ ຫ້ອງການຜູ້ຕາງໜ້າອົງການ JICA ແລະ ອົງການ JETRO ປະຈໍາລາວ ໃນການຈັດຕັ້ງປະຕິບັດໂຄງການຮ່ວມມືຂອງສອງລັດຖະບານ ລາວ-ຍີ່ປຸ່ນ, ການປະຕິບັດໜ້າທີ່ຂອງບັນດາຊ່ຽວຊານ ແລະ ອາສາສະໝັກຍີ່ປຸ່ນຢູ່ ບັນດາຂະແໜງການຕ່າງໆຂອງລາວ; ຂົນຂວາຍ ແລະ ຍາດແຍ່ງເອົາການຊ່ວຍເຫຼືອຂັ້ນພື້ນຖານໃຫ້ແກ່ພາກສ່ວນຕ່າງໆຂອງລາວ ໂດຍສະເພາະ ການຊ່ວຍເຫຼືອຢູ່ເຂດຫ່າງໄກສອກຫຼີກ.
ໃນໂອກາດນີ້, ທ່ານລັດຖະມົນຕີ ສະເຫຼີມໄຊ ກົມມະສິດ ໄດ້ຕາງຫນ້າໃຫ້ ລັດຖະບານ ແລະ ປະຊາຊົນລາວ ສະແດງຄວາມຂອບໃຈ ແລະ ຕີລາຄາສູງຕໍ່ການສະໜັບສະໜູນຊ່ວຍເຫຼືອຂອງລັດຖະບານ ແລະ ປະຊາຊົນຍີ່ປຸ່ນ ຕະຫຼອດໄລຍະຜ່ານມາ, ໂດຍສະເພາະການຊ່ວຍເຫຼືອທາງການເພື່ອການພັດທະນາ (ODA) ທີ່ຈັດຢູ່ໃນອັນດັບຕົ້ນ ຂອງຕ່າງປະເທດ ທີ່ໃຫ້ການຊ່ວຍເຫຼືອ ສປປ ລາວ; ສະແດງຄວາມຂອບໃຈໃນການສະໜອງບັນດາອຸປະກອນການແພດ ແລະ ວັກແຊັງ ໃຫ້ແກ່ ສປປ ລາວ ໃນການຮັບມືກັບການແຜ່ລະບາດຂອງພະຍາດໂຄວິດ-19 ຢ່າງທັນການ, ຊຶ່ງທັງຫມົດນີ້ ໄດ້ປະກອບສ່ວນສຳຄັນເຂົ້າໃນແຜນພັດທະນາເສດຖະກິດ-ສັງຄົມ ຂອງ ສປປ ລາວ ເປັນແຕ່ລະໄລຍະ.
ໃນຕອນທ້າຍ, ທ່ານລັດຖະມົນຕີ ສະເຫຼີມໄຊ ກົມມະສິດ ໄດ້ຕາງໜ້າລັດຖະບານລາວ ປະດັບຫຼຽນໄຊມິດຕະພາບ ໃຫ້ແກ່ ທ່ານທູດ ທາເກວາກະ ເຄໂຊ ເພື່ອສະແດງຄວາມຍ້ອງຍໍຊົມເຊີຍ ແລະ ຈາລຶກເຖິງຜົນງານຄຸນງາມຄວາມດີ ທີ່ທ່ານອຸທິດເຫື່ອແຮງ ແລະ ສະຕິປັນຍາ ເຂົ້າໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີງາມ ລະຫວ່າງສອງປະເທດ ລາວ-ຍີ່ປຸ່ນ ໃຫ້ແໜ້ນແຟ້ນຍິ່ງຂຶ້ນ.
ໃນຂະນະດຽວກັນ, ທ່ານທູດ ທາເກວາກະ ເຄໂຊ ກໍ່ໄດ້ສະແດງຄວາມຂອບໃຈຢ່າງຈິງໃຈມາຍັງ ພັກ-ລັດຖະບານ ແລະ ປະຊາຊົນລາວ ໂດຍສະເພາະ ກະຊວງການຕ່າງປະເທດ ທີ່ໄດ້ອໍານວຍຄວາມສະດວກ ໃຫ້ແກ່ການເຄື່ອນໄຫວໜ້າທີ່ການທູດຂອງຕົນຢູ່ ສປປ ລາວ ຈົນມີຜົນສໍາເລັດຢ່າງຈົບງາມ ແລະ ຢືນຢັນຈະສືບຕໍ່ໃນການເປັນຂົວຕໍ່ ເພື່ອປະກອບສ່ວນເຂົ້າໃນການຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີຂອງສອງປະເທດ ສປປ ລາວ ແລະ ຍີ່ປຸ່ນ ໃຫ້ສືບຕໍ່ມີບາດກ້າວຂະຫຍາຍຕົວອັນໃຫມ່ ແລະ ແໜ້ນແຟ້ນຍິ່ງໆຂຶ້ນໃນອະນາຄົດ.