ໃນວັນທີ 26 ກໍລະກົດນີ້, ທ່ານ ເຫຼັກໄຫຼ ສີວິໄລ ລັດຖະມົນຕີກະຊວງໂຍທາທິການ ແລະ ຂົນສົ່ງ (ຍທຂ) ພ້ອມຄະນະໄດ້ລົງຕິດຕາມສະພາບເສັ້ນທາງຫຼວງແຫ່ງຊາດ ເລກທີ 13 ເໜືອ
ທ່ານ ຄຳມອນ ສີສອນສັກ ຫົວໜ້າພະແນກ ຍທຂ ແຂວງວຽງຈັນ ກ່າວວ່າ: ສະເພາະເສັ້ນທາງແຕ່ຈຸດເມືອງກາສີ ຫາ ພູຄູນ ໄລຍະທາງ 34 ກິໂລແມັດ, ມີບ່າທາງເຈື່ອນ 8 ຈຸດ, ດິນເຈື່ອນຖົມທາງ 54 ຈຸດ ມາເຖິງປັດຈຸບັນໄດ້ຮັບການສ້ອມແປງເບື້ອງຕົ້ນເພື່ອໃຫ້ສາມາດສັນຈອນໄດ້, ຕໍ່ກັບສະພາບການດັ່ງກ່າວ ທ່ານ ເຫຼັກໄຫຼ ສີວິໄລ ໄດ້ຊີ້ນໍາໃຫ້ພະແນກ ຍທຂ ແຂວງ ແລະ ຫ້ອງການ ຍທຂ ເມືອງ ແລະ ບໍລິສັດທີ່ຮັບຜິດຊອບເພີ່ມທະວີຄວາມເອົາໃຈໃສ່ເຝົ້າລະວັງ ເພື່ອແກ້ໄຂບັນຫາເສັ້ນທາງເປ່ເພທີ່ເກີດໃນໄລຍະລະດູຝົນ.
ທ່ານ ບຸນໂຮມ ລັດຕະນະວົງ ຮອງຜູ້ອຳນວຍການບຸນໂຮມກໍ່ສ້າງເຄຫາຂົວທາງ ແລະ ຊົນລະປະທານຈຳກັດຜູ້ດຽວ ໄດ້ໃຫ້ຮູ້ວ່າ: ບໍລິສັດໄດ້ຈັດຕັ້ງທີມງານ ແລະ ກຽມຄວາມພ້ອມດ້ານເຄື່ອງກົນຈັກ ເພື່ອຕິດຕາມເຝົ້າລະວັງ ແລະ ແກ້ໄຂບັນຫາດິນເຈື່ອນທັບທາງໃຫ້ເພື່ອເປີດທາງໃຫ້ພາຫະນະສາມາດສັນຈອນໄດ້.
