ເມື່ອບໍ່ດົນມານີ້, ທ່ານ ງາມປະສົງ ເມືອງມະນີ ລັດຖະມົນຕີກະຊວງໂຍທາທິການ ແລະ ຂົນສົ່ງ (ຍທຂ) ພ້ອມຄະນະ ໄດ້ເດີນທາງເຂົ້າຮ່ວມກອງປະຊຸມປະຈໍາປີ ກ່ຽວກັບ ການພັດທະນາອຸດສາຫະກຳການກໍ່ສ້າງ “International Conference on the Development of the Construction Industry”ທີ່ເມືອງເອກາເຕີລິນເບີກ ປະເທດຣັດເຊຍ. ຈຸດປະສົງເພື່ອເປັນການສົ່ງເສີມການຮ່ວມມືສອງຝ່າຍ ແລະ ພັດທະນາການພົວພັນ ລະຫວ່າງ ຣັດເຊຍ-ລາວ ພາຍໃຕ້ກອບການຮ່ວມມື ດ້ານການຄ້າ, ເສດຖະກິດ, ວິທະຍາສາດ ແລະ ເຕັກໂນໂລຊີ ແລະ ຍົກລະດັບຄວາມຮູ້, ຄວາມເຂົ້າໃຈ, ປະສົບການ ແລະ ແລກປ່ຽນບົດຮຽນ ການປະຕິບັດທີ່ດີທີ່ສຸດລະຫວ່າງ ປະ ເທດ ເພື່ອແນໃສ່ເພີ່ມທະວີການຮ່ວມມື ໃນຂົງເຂດການກໍ່ສ້າງ ແລະ ການນໍາໃຊ້ເຕັກໂນໂລຊີຢ່າງມີຫົວຄິດປະດິດສ້າງ, ເພີ່ມທະວີການຮ່ວມມືໃນລະດັບທີ່ສູງຂື້ນ.
ການເຂົ້າຮ່ວມກອງປະຊຸມໃນຄັ້ງນີ້ ເປັນການຮັດແໜ້ນຄວາມສາມັກຄີ ລະຫວ່າງ ຣັດເຊຍ ແລະ ສປປ ລາວ ແລະ ພັດທະນາການພົວພັນໃນຂະແໜງການພາຍໃຕ້ກອບການຮ່ວມມືດ້ານການຄ້າ, ເສດຖະກິດ, ວິທະຍາສາດ ແລະ ເຕັກໂນໂລໂຊີ ລະຫວ່າງ ຣັດເຊຍ-ສປປ ລາວ.
ກອງປະຊຸມໃນຄັ້ງນີ້ ໄດ້ຈັດຕັ້ງເວທີສົນທະນາທີ່ມີລັກສະນະສ້າງສັນ ແລະ ແລກປ່ຽນບົດຮຽນການປະຕິບັດທີ່ດີທີ່ສຸດ ລະຫວ່າງ ບັນດາປະເທດທີ່ເຂົ້າຮ່ວມກອງປະຊຸມ ເພື່ອແນໃສ່ເພີ່ມທະວີການຮ່ວມມືສາກົນ ໃນຂົງເຂດການກໍ່ສ້າງ ແລະ ການນຳໃຊ້ເຕັກໂນໂລຊີຢ່າງມີຫົວຄິດປະດິດສ້າງ, ປັບປຸງການປະຕິບັດຂອງລັດ ແລະ ຫົວໜ່ວຍທຸລະກິດ ໃຫ້ດີຂຶ້ນກວ່າເກົ່າ, ເພີ່ມທະວີການຮ່ວມມືໃນລະດັບສູງຂື້ນ.
ພ້ອມກັນນັ້ນ, ທ່ານ ລັດຖະມົນຕີ ຍັງໄດ້ປະຊຸມພົບປະ 2 ຝ່າຍ ຮ່ວມກັບທ່ານຮອງລັດຖະມົນຕີກະຊວງກໍ່ສ້າງ, ເຄຫາສະຖານ ແລະ ອຸປະໂພກ ປະເທດຣັດເຊຍ.
ກອງປະຊຸມປະຈຳປີຄັ້ງນີ້ ຍັງມີການຈັດງານວາງສະແດງຊິງແຊັມການກໍ່ສ້າງໂລກ ຄັ້ງທີ IV ທີ່ສູນວາງສະແດງສາກົນ ເອກາເຕີລິນເບີກ(Ekaterinburg) ຊຶ່ງໃນງານສັບປະດາການກໍ່ສ້າງສາກົນຄັ້ງນີ້ ແມ່ນເພື່ອເສີມຂະຫຍາຍ ການຮ່ວມມື ລະຫວ່າງ ລັດ ແລະ ບໍລິສັດ ໃນເວທີສາກົນ ໃນຂົງເຂດອຸດສະຫະກຳ ແລະ ການກໍ່ສ້າງໂຍທາທິການ. ຜູ້ເຂົ້າຮ່ວມງານວາງສະແດງດັ່ງກ່າວແມ່ນບັນດາຊ່ຽວຊານດ້ານອຸດສາຫະກຳ ແລະ ຜູ້ບໍລິຫານລະດັບສູງຂອງບໍລິສັດໃຫຍ່ ຈາກ ຣັດເຊຍ ແລະ ສາກົນ ທີ່ຈັດຕັ້ງປະຕິບັດໂຄງການກໍ່ສ້າງ ຢູ່ຣັດເຊຍ ແລະ ຕ່າງປະເທດ. ນອກຈາກນັ້ນ ກໍຍັງມີພະນັກງານຂອງບໍລິສັດ ຈາກບັນດາປະເທດສະມາຊິກ ຂອງ EAEU, CSI, SCO,BRICS, ອາຊຽນ ແລະ ອື່ນໆ.
ຂ່າວ: ຍທຂ
