ລົດໄຟ! ກໍຢ້ານໄຟຄືກັນເດີ ການຈູດໄຟປ່າ ຫຼື ຈູດໄຟໃກ້ແລວເສັ້ນທາງລົດໄຟແມ່ນເປັນອັນຕະລາຍຮ້າຍແຮງຕໍ່ທາງເດີນລົດໄຟ ແລະ ຜິດຕໍ່ກົດໝາຍວ່າດ້ວຍການລົດໄຟ.

ການຈູດໄຟໃກ້ບໍລິເວນທາງລົດໄຟເປັນອັນຕະລາຍຮ້າຍແຮງຫຼາຍກວ່າທີ່ທ່ານຄິດ:

ການຈູດໄຟໃກ້ບໍລິເວນທາງລົດໄຟຈະສົ່ງຜົນກະທົບຕໍ່ຄວາມປອດໄພຂອງການແລ່ນລົດ.

ແປວໄຟຈະເຮັດໃຫ້ອຸນຫະພູມບໍລິເວນແລວທາງລົດໄຟສູງຂຶ້ນ ແລະ ຈະເຮັດໃຫ້ອຸປະກອນສື່ສານ, ສາຍສັນຍານ, ສາຍໄຟຟ້າ ແລະ ອຸປະກອນອື່ນໆທີ່ຢູ່ໃນບໍລິເວນນັ້ນ ຫຼື ອ້ອມຂ້າງເປ່ເພເສຍຫາຍ, ຄວັນໄຟທີ່ເກີດຈາກການຈູດໄຟຈະປົກຄຸມຕາມແລວທາງລົດໄຟ ແລະ ບັງການແນມເຫັນດ້ານໜ້າຂອງຄົນຂັບລົດໄຟ ເຊິ່ງເປັນອັນຕະລາຍທີ່ສຸດຕໍ່ການແລ່ນລົດ ແລະ ຊີວິດຂອງຜູ້ໂດຍສານ.

ການຈູດໄຟໃກ້ບໍລິເວນທາງລົດໄຟອາດຈະເຮັດໃຫ້ແປວໄຟລາມໄປເກີດໄຟໄຫມ້ໃຫຍ່ໄດ້.

ໃນລະດູແລ້ງ ທີ່ສະພາບອາກາດແຫ້ງແລ້ງ ແລະ ມີກະແສລົມແຮງ, ເວລາຈູດໄຟຢູ່ທີ່ໂລ່ງແຈ້ງຕ້ອງມີສະຕິລະວັງຕົວ, ແປວໄຟອາດຈະປິວໄປຕົກໃສ່ບ່ອນອື່ນ, ເຮັດໃຫ້ເກີດໄຟໄຫມ້ໃຫຍ່ໄດ້ ເຊິ່ງອາດຈະເຮັດໃຫ້ລົດໄຟຕ້ອງຢຸດກະທັນຫັນ ແລະ ເກີດການສູນເສຍຢ່າງຫນັກ.

ການຈູດໄຟຍັງຈະເຮັດໃຫ້ເກີດມົນລະພິດທາງອາກາດ.

ການຈູດໄຟເຜົາເຟືອງ, ຫຍ້າ, ຂີ້ເຫຍື້ອ ຫຼື ການຈູດປ່າເຮັດໄຮ່ ຈະເຮັດໃຫ້ເກີດມີຄວັນໄຟຈຳນວນຫຼວງຫຼາຍ ເຊິ່ງຈະກໍ່ໃຫ້ເກີດມົນລະພິດທາງອາກາດ ແລະ ສົ່ງຜົນກະທົບຕໍ່ລະບົບຫາຍໃຈຂອງຄົນເຮົາ.

ການຈູດໄຟປ່າ ຫຼື ຈູດໄຟໃກ້ແລວເສັ້ນທາງລົດໄຟແມ່ນຜິດຕໍ່ກົດໝາຍວ່າດ້ວຍການລົດໄຟ ແລະ ລະບຽບການຄຸ້ມຄອງຄວາມປອດໄພທາງລົດໄຟ ພາກທີ III ໝວດທີ 3 ມາດຕາທີ 22 ວ່າດ້ວຍເຂດສະຫງວນທາງລົດໄຟ ໄດ້ລະບຸໄວ້ຢ່າງຊັດເຈນວ່າ “ ຫ້າມທໍາການຈູດປ່າ, ລ້ຽງສັດ ແລະ ປູກຕົ້ນໄມ້ ທີ່ມີຜົນກະທົບຕໍ່ຄວາມປອດໄພ ຫຼື ກີດຂວາງບັງການແນມເຫັນການສັນຈອນຂອງການແລ່ນລົດໄຟ ຢູ່ໃນເຂດສະຫງວນຄວາມປອດໄພທາງລົດໄຟ ກໍຄືໃນລັດສະໝີ 50 ແມັດຈາກຈຸດໃຈກາງຂອງລາງລົດໄຟອອກໄປ”.

ບໍລິສັດ ທາງລົດໄຟລາວ-ຈີນ ຈໍາກັດ ຂໍຮຽກຮ້ອງໃຫ້ພໍ່ແມ່ປະຊາຊົນໃຫ້ຄວາມຮ່ວມມື, ມີສະຕິລະວັງຕົວ ແລະ ເປັນເຈົ້າການຮ່ວມກັນ, ຫາກພົບເຫັນເຫດການທີ່ເປັນອັນຕະລາຍຕໍ່ການແລ່ນລົດໄຟ ຫຼື ພົບເຫັນຜູ້ກໍາລັງຈະຜິດຄືດັ່ງການຈູດຂີ້ເຫຍື້ອ, ກໍ່ກອງໄຟຢູ່ບໍລິເວນເຂດລົດໄຟ ກໍໃຫ້ຫ້າມ ແລະ ຕັກເຕືອນຊ່ວຍກັນ, ເພື່ອຄວາມປອດໄພຂອງຊີວິດ ແລະ ຊັບສິນ ຂອງຜູ້ໂດຍສານຢູ່ເທິງຂະບວນລົດໄຟ. ບໍລິສັດ ທາງລົດໄຟລາວ-ຈີນ ຈຳກັດ ຂອງພວກເຮົາເອງ ກໍມີມາດຕະການຮັກສາຄວາມປອດໄຟ ແລະ ປ້ອງກັນໄຟປ່າ ບໍ່ວ່າຈະເປັນການສົ່ງເຈົ້າໜ້າທີ່ສະເພາະອອກລາດຕະເວນຕາມແລວເສັ້ນທາງລົດໄຟລາວ-ຈີນ, ການນຳໃຊ້ໂດຣນ （Drone）ບິນກວດກາລາດຕະເວນຕາມພື້ນທີ່ປ່າ ຫຼື ເຂດພູສູງເພື່ອປ້ອງກັນໄຟປ່າ ແລະ ຖ້າຫາກພົບເຫັນໄຟປ່າຈຶ່ງຈະສາມາດດັບໄຟໄດ້ຢ່າງທ່ວງທັນ.

ນອກຈາກນີ້ ໃນງານມາລາທອນຄົບຮອບ 3 ປີເປີດດໍາເນີນງານທາງລົດໄຟລາວ-ຈີນ ທີ່ຜ່ານມາພວກເຮົາຍັງໄດ້ມີການຈັດກິດຈະກຳແຈກຖົງຜ້າ ແລະ ເຄື່ອງຂອງທີ່ລະນຶກເພື່ອປຸກລະດົມໃຫ້ພໍ່ແມ່ປະຊາຊົນ ເປັນເຈົ້າການຮ່ວມກັນ ໃນການປົກປັກຮັກສາທາງລົດໄຟ ອັນເປັນຊັບສົມບັດຂອງຊາດ, ຮ່ວມກັນສະກັດກັ້ນການລັກຂະໂມຍອຸປະກອນທາງລົດໄຟ ແລະ ການກະທຳຜິດກົດໝາຍຕ່າງໆ. ຖ້າຫາກທ່ານພົບເຫັນພຶດຕິກຳທີ່ອາດຈະເປັນອັນຕະລາຍຕໍ່ຄວາມປອດໄຟຂອງທາງລົດໄຟ ກະລຸນາໂທແຈ້ງສາຍດ່ວນຕໍາຫຼວດລົດໄຟ ຫຼື ແຈ້ງເຈົ້າຫນ້າທີ່ດັບເພີງທັນທີ (ເບີໂທ 020 5837666ເບີໂທດັບເພີງ 1190 ).