ທ່ານ ມະໂນທອງ ວົງໄຊ ຮອງລັດຖະມົນຕີກະຊວງອຸດສາຫະກໍາ ແລະ ການຄ້າ (ອຄ), ສປປ ລາວ ພ້ອມຄະນະ ໄດ້ພົບປະກັບ ທ່ານ ນາງ ຊາຣາ ແອວເລີມາ (Sarah Ellerma) ຜູ້ຊ່ວຍຜູ້ຕາງໜ້າການຄ້າ ສ.ອາເມຣິກາ ປະຈຳອາຊີຕາເວັນອອກສ່ຽງໃຕ້ ແລະ ປາຊີຟິກ ພ້ອມດ້ວຍຄະນະ ໃນວັນທີ 18 ກັນຍາ 2024 ທີ່ນະຄອນຫຼວງວຽງຈັນ ໃນໂອກາດທີ່ເດີນທາງມາເຂົ້າຮ່ວມກອງປະຊຸມລັດຖະມົນຕີເສດຖະກິດອາຊຽນ- ສ.ອາເມຣິກາ ແລະ ກອງປະຊຸມປິ່ນອ້ອມຂອງກອງປະຊຸມລັດຖະມົນຕີເສດຖະກິດອາຊຽນ ຄັ້ງທີ 56 ທີ່ ສປປ ລາວ ເປັນເຈົ້າພາບ.
ທ່ານ ມະໂນທອງ ວົງໄຊ ໄດ້ສະແດງຄວາມຊົມເຊີຍ ແລະ ຍິນດີຕ້ອນຮັບ ທ່ານ ນ.ຊາຣາ ແອວເລີມາ ພ້ອມດ້ວຍຄະນະ ໃນການພົບປະສອງຝ່າຍ ແລະ ເຂົ້າຮ່ວມກອງປະຊຸມລັດຖະມົນຕີເສດຖະກິດ ອາຊຽນ-ສະຫະລັດອາເມຣິກາ ທີ່ນະຄອນຫຼວງວຽງຈັນ ສປປ ລາວ. ສ່ວນ ທ່ານນາງ ຊາຣາ ແອວເລີມາ ໄດ້ສະແດງຄວາມຍິນດີ ແລະ ຊົມເຊີຍ ສປປ ລາວ ໃນການເປັນປະທານອາຊຽນ ໃນປີ 2024.
ສອງຝ່າຍ ໄດ້ປຶກສາຫາລືກ່ຽວກັບການຄ້າສອງຝ່າຍ ຊຶ່ງໃນນັ້ນກວມເອົາມາດຕະຖານເຄື່ອງຍົນຂອງ ສ.ອາເມຣິກາ ຊຶ່ງໄລຍະຜ່ານມາໄດ້ໃຫ້ການສະໜັບສະໜູນຊ່ວຍເຫຼືອແກ່ ສປປ ລາວ ຜ່ານໂຄງການທີ່ສໍາຄັນຕ່າງໆ ທັງໃນຂອບຮ່ວມມືສອງຝ່າຍ, ຫຼາຍຝ່າຍ ແລະ ຂອບອາຊຽນ – ສ.ອາເມຣິກາ. ພ້ອມນີ້, ລັດຖະບານ ສ.ອາເມຣິກາ ຍັງສະໜັບສະໜູນ ແລະ ຊ່ວຍເຫຼືອ ສປປ ລາວ ໂດຍສະເພາະ ກະຊວງອຸດສາຫະກຳ ແລະ ການຄ້າ ພາຍໃຕ້ການເປັນປະທານອາຊຽນຂອງ ສປປ ລາວ ໃນປີ 2024.
