ໃນວັນທີ 26 ສິງຫາ 2022, ກົມຈັດຫາງານ, ກະຊວງແຮງງານ ແລະ ສະຫວັດດີການສັງຄົມ ສປປ ລາວ ຮ່ວມກັບ ເມືອງແຮງຊ້ອງ ແຂວງ ກັງວອນ ສ.ເກົາຫຼີ ໄດ້ເຊັນບົດບັນ ທຶກຄວາມເຂົ້າໃຈ ກ່ຽວກັບ ແຜນການຈັດສົ່ງງານແຮງງານຕາມລະດູການ ໂອກາດເຄື່ອນໄຫວຢ້ຽມຢາມແຮງງານທີ່ໄປເຮັດວຽກຢູ່ປະເທດດັ່ງກ່າວ.
ຕາງໜ້າກະຊວງແຮງງານ ແລະ ສະຫວັດດິການສັງຄົມ ຮ່ວມລົງນາມຂອງ ທ່ານນາງ ອານຸສອນ ຄຳສິງສະຫວັດ ຫົວໜ້າກົມການຈັດຫາງານ ກະຊວງ ຮສສ ແລະ ທ່ານ Kim Myung-gi ເຈົ້າເມືອງແຮງຊ້ອງ, ໂດຍມີຄະນະທີ່ກ່ຽວຂ້ອງ ທັງສອງຝ່າຍຮ່ວມເປັນສັກຂີພິຍານ.
ການເຊັນບົດບັນທຶກຄັ້ງນີ້ ແມ່ນເພື່ອສົ່ງເສີມຄວາມເຂົ້າໃຈ ແລະ ການຮ່ວມມືຮ່ວມກັນ ລະຫວ່າງ ທັງສອງຝ່າຍ ແລະ ການຈັດສັນນຳສົ່ງຜູ້ອອກແຮງງານຕາມລະດູການ ເພື່ອເຮັດວຽກໃນຂົງເຂດກະສິກຳ ເປັນໄລຍະ 3-5 ເດືອນ ໃນປະເທດສາທາລະນະລັດເກົາຫລີ ແລະ ການຈັດຕັ້ງປະຕິບັດເນື້ອໃນບົດບັນທຶກຄວາມເຂົ້າໃຈສະບັບນີ້ ແມ່ນມີຄວາມສອດຄ່ອງກັບກົດໝາຍ ແລະ ກົດລະບຽບ ລະຫວ່າງປະເທດຂອງແຕ່ລະປະເທດ. ອີງຕາມ ແຜນງານນຳສົ່ງຜູ້ອອກແຮງງານຕາມລະດູການ ຂອງ ສອງປະເທດ , ແຜນງານນຳສົ່ງຜູ້ອອກແຮງງານຕາມລະດູການ ເພື່ອການຈັດຫາ ແລະ ນຳສົ່ງ ຜູ້ອອກແຮງງານຕາມລະດູການ ຈາກປະເທດ ສປປ ລາວ ໄປທີ່ປະເທດ ສາທາລະນະລັດເກົາຫລີ. ໄລຍະເວລາຂອງແຜນງານຊົ່ວຄາວຄັ້ງນີ້ ແມ່ນກໍານົດພາຍໃນ 90 ວັນເຮັດວຽກ ຫຼື 5 ເດືອນ , ລວມປະມານ 500 ຄົນຕໍ່ປີ.
ໃນບົດບັນທຶກຍັງລະບຸຢ່າງລະອຽດ ກ່ຽວກັບ ມາດຕະການລະເມີດ 1; 2 ແລະ 3. ນອກນັ້ນ ເມືອງ ແຮງຊ້ອງ ຈະຕ້ອງຮັບຜິດຊອບກ່ຽວກັບຂັ້ນຕອນທີ່ຈຳເປັນກ່ຽວຂ້ອງທັງໝົດ ສຳລັບຜູ້ອອກແຮງງານຕາມລະດູການ ຈາກ ສປປ ລາວ ເພື່ອຮັບວີຊາທີ່ອອກອອກແຮງງານ ຢູ່ ສ.ເກົາຫຼີ.
ພ້ອມນັ້ນ ຍັງຈະຕ້ອງນຳສົ່ງແຮງງານ ໃຫ້ແກ່ ນາຍຈ້າງ,ລວມທັງສະໜອງຂໍ້ມູນຂ່າວສານ, ການເຝິກອົບຮົມ, ການແນະນໍາ, ຄໍາປຶກສາ ແລະ ການຊ່ວຍເຫຼືອດ້ານອື່ນໆທີ່ກ່ຽວຂ້ອງ. ເຊິ່ງບົດບັນທຶກຄວາມເຂົ້າໃຈສະບັບນີ້ແມ່ນມີກຳນົດໄລຍະເວລາ 1ປີ ແລະ ມີຜົນບັງຄັບໃຊ້ນັບແຕ່ວັນທີ່ລົງລາຍເຊັນເປັນຕົ້ນໄປ.
ໂດຍ: ບຸນຍັງ
