ສວນຮ່ວມນໍ້າໃຈຊາວແຂວງຈໍາປາສັກ ເປີດນໍາໃຊ້ແລ້ວ
ວັນທີ 5 ສິງຫາ 2025, ໄດ້ມີພິທີເປີດນໍາໃຊ້ສວນຮ່ວມນໍ້າໃຈຊາວແຂວງຈໍາປາສັກ ຂຶ້ນຢູ່ສູນດັ່ງກ່າວ ໂດຍການໃຫ້ກຽດເຂົ້າຮ່ວມຂອງ ທ່ານ ອາລຸນໄຊ ສູນນະລາດ ກໍາມະການສູນກາງພັກ ເລຂາຄະນະບໍລິຫານພັກແຂວງ ເຈົ້າແຂວງຈໍາປາສັກ, ທ່ານ ແກ້ວລັດຕະນະ ສີຫາວົງ ຄະນະປະຈໍາພັກແຂວງ ຮອງປະທານສານປະຊາຊົນແຂວງ ຄະນະຮັບຜິດຊອບປັບປຸງສວນຮ່ວມນໍ້າໃຈຊາວແຂວງຈໍາປາສັກ. ມີການນໍາຂອງແຂວງ, ການນໍາພະແນກການອ້ອມຂ້າງແຂວງ, ບັນດາທ່ານນັກທຸລະກິດ, ຜູ້ປະກອບການພາຍໃນແຂວງ, ຄະນະຮັບຜິດຊອບປັບປຸງສວນຮ່ວມນໍ້າໃຈຊາວແຂວງຈໍາປາສັກ ແລະ ພາກສ່ວນທີ່ກ່ຽວຂ້ອງ ເຂົ້າຮ່ວມ.
ໃນພິທີ, ທ່ານ ແກ້ວລັດຕະນະ ສີຫາວົງ ຄະນະປະຈໍາພັກແຂວງ ຮອງປະທານສານປະຊາຊົນແຂວງ ຕາງໜ້າຄະນະຮັບຜິດຊອບປັບປຸງ – ສ້ອມແປງ ສວນຮ່ວມນໍ້າໃຈຊາວແຂວງຈໍາປາສັກ ລາຍງານວ່າ: ການປັບປຸງ - ສ້ອມແປງສວນດັ່ງກ່າວ ໄດ້ເລີ່ມຈັດຕັ້ງປະຕິບັດນັບແຕ່ວັນທີ 25 ສິງຫາ 2024 ເປັນຕົ້ນມາ ໃຊ້ເວລາໃນການປັບປຸງ – ສ້ອມແປງ 11 ເດືອນ, ແຫຼ່ງທຶນຮອນ, ວັດຖຸທີ່ນໍາມາໃຊ້ໃນການປັບປຸງ - ສ້ອມແປງ ທັງໝົດ 1,9 ຕື້ກີບ, ໃນນັ້ນ ໄດ້ຈາກການປະກອບສວນຂອງຊັ້ນຄົນຕ່າງໆເຊິ່ງເປັນລູກຫຼານຊາວແຂວງຈໍາປາສັກ ທັງຢູ່ພາຍໃນແຂວງ ແລະ ຕ່າງແຂວງ ລວມມູນຄ່າວັດຖຸປະກອບສວນທັງໝົດ 900 ລ້ານກີບ, ທຶນປະກອບສ່ວນຂອງອົງການປົກຄອງແຂວງ 1 ຕື້ກີບ. ປັດຈຸບັນ ການປັບປຸງ - ສ້ອມແປງໄດ້ສໍາເລັດໂດຍພື້ນຖານ ແລະ ພ້ອມເປີດໃຫ້ມວນຊົນເຂົ້າມາໃຊ້ສໍາລັບພັກຜ່ອນ, ອອກກຳລັງກາຍ ແລະ ສຶກສາຂໍ້ມູນແຫຼ່ງທ່ອງທ່ຽວຕ່າງໆຢູ່ພາຍໃນແຂວງຈໍາປາສັກ ຊຶ່ງໄດ້ອອກແບບເປັນຮູບພາບຕິດໄວ້ໃນພື້ນທີ່ຂອງສວນ ປະກອບມີພາບແຫຼ່ງທ່ອງທ່ຽວ 31 ພາບ, ມີເຄື່ອງອອກກໍາລັງກາຍ 15 ເຄື່ອງ. ສັນຍາລັກຂອງສວນແມ່ນໂລໂກກິລາລາວ, ມີອ່າງນໍ້າພູ ແລະ ສິ່ງອໍານວຍຄວາມສະດວກ ເຊັ່ນ: ຕັ່ງນັ່ງ 62 ໜ່ວຍ, ມີລະບົບໄຟຟ້າ, ນໍ້າປະປາ ເພື່ອເຮັດໃຫ້ສວນດັ່ງກ່າວ.ພາຍຫຼັງເປີດການນໍາໃຊ້ຢ່າງເປັນທາງການແລ້ວ, ອົງການປົກຄອງແຂວງ ໄດ້ມອບພື້ນທີ່ສວນສາທາລະນະ ຮ່ວມນໍ້າໃຈຊາວແຂວງຈໍາປາສັກ ໃຫ້ສະຫະພັນກິລາບານເຕະແຂວງ ເປັນຜູ້ຄຸ້ມຄອງ, ປົກປັກຮັກສາ ເພື່ອຄວາມໃຫ້ມີສະອາດ ແລະ ສວຍງາມ, ຕອບສະໜອງຕາມການມອບໝາຍດັ່ງກ່າວ, ຄະນະຮັບຜິດຊອບກໍໄດ້ສ້າງລະບຽບໃນການຄຸ້ມຄອງ ແລະ ນໍາໃຊ້ມາຕິດໄວ້ ໃນສວນ ເພື່ອໃຫ້ມວນຊົນໄດ້ຮັບຊາບ. ພ້ອມນີ້ ກໍໄດ້ຈ້າງຜູ້ອະນາໄມ, ພະນັກງານປ້ອງກັນ ໂດຍໄດ້ຮັບທຶນສະໜັບສະໜູນຈາກທະນະຄານພັດທະນາລາວ ກຳນົດເວລາ 5 ປີ ປີລະ 50 ລ້ານ ລວມມູນຄ່າ 250 ລ້ານກີບ ເພື່ອນໍາໃຊ້ເຂົ້າໃນການບຳລຸງຮັກສາ.
ທ່ານ ແກ້ວລັດຕະນະ ສີຫາວົງ ກ່າວຕື່ມວ່າ: ຕາງໜ້າໃຫ້ຄະນະຮັບຜິດຊອບການປັບປຸງ, ສ້ອມແປງສລນສາທາລະນະ ຮ່ວມໃຈຊາວແຂວງຈໍາປາສັກ ຂໍສະແດງຄວາມຮູ້ບຸນຄຸນຢ່າງລົ້ນເຫຼືອ ຕໍ່ການປະກອບສວນຂອງພາກສ່ວນຕ່າງໆທີ່ໄດ້ເສຍສະຫຼະທຶນຮອນ ແລະ ຊັບສິນປະກອບສ່ວນເຂົ້າໃນການປັບປຸງ, ສ້ອມແປງ ແລະ ສວນດັ່ງກ່າວນີ້ ຈະກາຍເປັນສັນຍາລັກແຫ່ງຄວາມສາມັກຄີເປັນປຶກແຜນຂອງຊາວແຂວງຈຳປາສັກ ແລະ ກາຍເປັນມູນເຊື້ອ - ມູນມໍລະດົກສຶບທອດໃຫ້ແກ່ຄົນຮູ່ນລູກ, ຮູຸ່ນຫຼານຂອງພວກເຮົາໄດ້ນໍາໃຊ້. ໃນນາມຕາງໜ້າຄະນະຮັບຜິດຊອບຂໍຮຽກຮ້ອງມາຍັງທຸກພາກສ່ວນຈົ່ງໄດ້ເປັນເຈົ້າການໃນການຄຸ້ມຄອງ, ປົກປັກຮັກສາ ໃຫ້ສວນສາທາລະນະແຫ່ງນີ້ ມີຄວາມຍາວນານ ແລະ ຍືນຍົງ. ພ້ອມນີ້ ທ່ານຍັັງຍົກໃຫ້ເຫັນປະຫວັດຄວາມເປັນມາຂອງສວນ ກ່ອນການປັບປຸງ - ສ້ອມແປງ ຕື່ມອີກ.
ໂອກາດກ່າວເປີດການນໍາໃຊ້ສວນຮ່ວມນໍ້າໃຈຊາວແຂວງຈໍາປາສັກ, ທ່ານ ອາລຸນໄຊ ສູນນະລາດ ເຈົ້າແຂວງຈໍາປາສັກ ມີຄໍາເຫັນວ່າ: ການປັບປຸງ – ສ້ອມແປງ ສວນຮ່ວມນໍ້າໃຈຊາວແຂວງຈໍາປາສັກ ນີ້ ສຸດທີ່ມີຄວາມໝາຍສໍາຄັນ ເພື່ອສ້າງເປັນສວນສາທາລະນະແຫ່ງນີ້ ໃຫ້ສວຍງາມ ແລະ ຍືນຍົງ ທັງເປັນຂອງຂວັນຂໍ່ານັບຮັບຕ້ອນກອງປະຊຸມໃຫຍ່ອົງຄະນະພັກແຂວງຈໍາປາສັກ ຄັ້ງທີ IX, ໂດຍແມ່ນ ລັດ ແລະ ປະຊາຊົນ ຮ່ວມກັນເຮັດ ກໍຄືການມີສ່ວນຮ່ວມຂອງສັງຄົມ, ຜູ້ປະກອບການ ແລະ ຊຸມຊົນ, ຕິດພັນກັບການສ້າງເປັນບ່ອນອອກກໍາລັງກາຍ, ພັກຜ່ອນ ແລະ ຫຼິ້ນກິລາ. ຍ້ອນແນວນັ້ນ, ຂໍໃຫ້ຄະນະຮັບຜິດຊອບສວນ ຈົ່ງເອົາໃຈໃສ່ປະສານກັບຄະນະພັກ - ຄະນະກໍາມະການປົກຄອງບ້ານ ແລະ ພໍ່ແມ່ປະຊາຊົນພາຍໃນບ້ານທີ່ຢູ່ໃນເຂດສວນປະກືບສ່ວນໃນການບູລະນະຮັກສາໃຫ້ສວຍງາມ ແລະ ນໍາໃຊ້ແບບຍືນຍົງ.
ໂອກາດນີ້, ສະມາຄົມຄອບຄົວການນໍາ ກໍໄດ້ມອບເງິນໃຫ້ແກ່ຄະນະຮັບຜິດຊອບສວນ ຈໍານວນ 10 ລ້ານກີບ. ໃນພິທີຍັງໄດ້ມອບໃບຍ້ອງຍໍໃຫ້ແກ່ພາກສ່ວນທີ່ຊ່ວຍອຸປະຖໍາ ຈໍານວນ 27 ພາກສ່ວນ, ໃຫ້ກຽດມອບໂດຍ ທ່ານ ອາລຸນໄຊ ສູນນະລາດ ເຈົ້າແຂວງຈໍາປາສັກ. ຈາກນັ້ນ, ກໍໄດ້ປ່ອຍປຸ່ມເປົ້າເປີດງານຢ່າງເປັນທາງການ.
ຂ່າວ-ພາບ: ທູນທອງໃຈ
