ທ່ານ ນາງ ອາລີ ວົງໜໍ່ບຸນທໍາ ປະທານຄະນະບໍລິຫານງານສູນກາງສະຫະພັນແມ່ຍິງລາວ ໄດ້ສະເໜີຮ່າງກົດໝາຍວ່າດ້ວຍສະຫະພັນແມ່ຍິງລາວ ສະບັບປັບປຸງຕໍ່ກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ IX ໃນວັນທີ 3 ທັນວາ 2024 ເພື່ອໃຫ້ສະມາຊິກສະພາແຫ່ງຊາດໄດ້ຄົ້ນຄວ້າປະກອບຄໍາເຫັນ ເຊິ່ງປະກອບມີ 12 ພາກ, 8 ໝວດ, 58 ມາດຕາ ໃນນັ້ນ, ປັບປຸງທັງໝົດ 47 ມາດຕາ, ສ້າງ ໃໝ່ 7 ມາດຕາ.
ທ່ານ ນາງ ອາລີ ວົງໜໍ່ບຸນທໍາ ໄດ້ສະເໜີຄວາມຈໍາເປັນໃນການສ້າງກົດໝາຍວ່າດ້ວຍສະຫະພັນແມ່ຍິງລາວ ຊຶ່ງມີພາລະບົດບາດເປັນຕົວແທນໃນການພັດທະນາ, ການປົກປ້ອງສິດ ແລະ ຜົນປະໂຫຍດອັນຊອບທຳຂອງສະມາຊິກສະຫະພັນແມ່ຍິງ, ແມ່ຍິງບັນດາເຜົ່າ, ສຶກສາອົບຮົມ, ເຕົ້າໂຮມຄວາມສາມັກຄີ, ເສີມຂະຫຍາຍສິດເປັນເຈົ້າຂອງແມ່ຍິງລາວ ແລະ ສົ່ງເສີມຄວາມສະເໝີພາບຍິງ-ຊາຍ, ຮັກສາ ແລະ ສົ່ງ ເສີມຄຸນລັກສະນະທີ່ເປັນມູນເຊື້ອຂອງແມ່ຍິງລາວບັນດາເຜົ່າ, ປຸກລະດົມແມ່ຍິງລາວ ເຂົ້າຮ່ວມໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ.
ກົດໝາຍວ່າດ້ວຍສະຫະພັນແມ່ຍິງລາວ ໄດ້ຖືກຮັບຮອງໃນກອງປະຊຸມສະໄໝສາ ມັນເທື່ອທີ 5 ຂອງສະພາແຫ່ງຊາດຊຸດທີ VII ຄັ້ງວັນທີ 23 ກໍລະກົດ 2013, ປະ ທານປະເທດໄດ້ອອກລັດຖະດໍາລັດ ສະບັບເລກທີ 170/ປປທ, ລົງວັນທີ 20 ສິງຫາ 2013 ກ່ຽວກັບການປະກາດໃຊ້ກົດໝາຍວ່າດ້ວຍສະຫະພັນແມ່ຍິງລາວຢ່າງເປັນທາງການ ຊຶ່ງປະກອບມີ 11 ພາກ 54 ມາດຕາ.
ໄລຍະຜ່ານມາ, ສະຫະພັນແມ່ຍິງແຕ່ລະຂັ້ນໄດ້ຈັດຕັ້ງເຜີຍແຜ່ ແລະ ນໍາໃຊ້ກົດ ໝາຍສະບັບນີ້ເປັນບ່ອນອີງໃນການຈັດຕັ້ງປະຕິ ບັດໜ້າທີ່ວຽກງານຕາມພາລະບົດ ບາດ, ສິດໜ້າທີ່ຂອງຕົນໄດ້ເປັນຢ່າງດີ; ກົດໝາຍສະບັບນີ້ເປັນເຄື່ອງມື ແລະ ກົນໄກໃຫ້ການຈັດຕັ້ງສະຫະພັນແມ່ຍິງລາວ ຊຶ່ງໄດ້ກຳນົດໄວ້ລະອຽດກ່ຽວກັບຫຼັກການ, ລະ ບຽບການ, ມາດຕະການການຈັດຕັ້ງເຄື່ອນໄຫວ, ຄຸ້ມຄອງ ແລະ ຕິດຕາມກວດກາວຽກງານຂອງສະຫະພັນແມ່ຍິງ; ຮັບປະກັນໄດ້ເຖິງຄຸນນະພາບ, ປະສິດທິພາບ, ການຈັດຕັ້ງມີຄວາມເຂັ້ມແຂງສາມາດປະຕິບັດພາລະບົດບາດ, ສິດ, ໜ້າທີ່, ພັນທະ ແລະ ຄວາມຮັບຜິດຊອບຂອງສະຫະພັນແມ່ຍິງແຕ່ລະຂັ້ນຢ່າງມີປະສິດທິຜົນໃນການພັດ ທະນາ, ປົກປ້ອງສິດ ແລະ ຜົນປະໂຫຍດອັນຊອບທຳຂອງສະມາຊິກສະຫະພັນແມ່ຍິງ ແລະ ແມ່ຍິງລາວບັນດາເຜົ່າໃນທົ່ວປະເທດ, ການປັບປຸງກົດໝາຍວ່າດ້ວຍສະຫະພັນແມ່ຍິງລາວໃນໄລຍະຜ່ານມາ, ອີງຕາມແຜນການສ້າງ, ປັບປຸງກົດໝາຍໄລຍະ 5 ປີ (2021-2025) ປະຈໍາປີ 2024 ສູນກາງສະຫະພັນແມ່ຍິງລາວມີຄວາມຮັບຜິດຊອບໃນການປັບປຸງກົດໝາຍວ່າດ້ວຍສະຫະພັນແມ່ຍິງລາວ ເພື່ອສະເໜີຕໍ່ກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດ, ຄະນະຮັບຜິດຊອບຈຶ່ງໄດ້ຈັດຕັ້ງປະຕິ ບັດຕາມບາດກ້າວທີ່ໄດ້ກຳນົດໄວ້ໃນກົດໝາຍວ່າດ້ວຍການສ້າງນິຕິກຳຮ່າງກົດ ໝາຍວ່າດ້ວຍສະຫະພັນແມ່ຍິງລາວ (ສະບັບປັບປຸງ) ໂດຍໄດ້ຈັດຕັ້ງການຄົ້ນຄວ້າປະເມີນ, ທາບທາມ ແລະ ປະກອບຄໍາເຫັນຕໍ່ຮ່າງກົດໝາຍສະບັບປັບປຸງໃໝ່ມາແລ້ວລວມທັງ ໝົດ 13 ຄັ້ງ, ຈັດກອງປະຊຸມປະເມີນການຈັດຕັ້ງປະຕິບັດກົດໝາຍວ່າດ້ວຍສະຫະພັນແມ່ຍິງລາວຮ່ວມກັບສະຫະພັນແມ່ຍິງບັນດາແຂວງພາກເໜືອ, ພາກກາງ ແລະ ພາກໃຕ້; ຄະນະບໍລິຫານງານສູນກາງສະຫະພັນແມ່ຍິງລາວສະໄໝທີ VIII ແລະ 4 ຂົງເຂດຂັ້ນສູນກາງ ລວມທັງໝົດ 4 ຄັ້ງ.
