ວັນທີ 13 ສິງຫາ 2024, ສະຖານທູດລາວ ປະຈຳ ສສ ຫວຽດນາມ ໄດ້ຮ່ວມກັບສະພາແຫ່ງຊາດລາວ ຈັດພິທີ ເຜີຍແຜ່ຜົນສຳເລັດກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດ ຊຸດທີ IX ທີ່ສຳນັກງານສະຖານທູດລາວໃນນະຄອນຫຼວງຮ່າໂນ້ຍ ໂດຍແມ່ນທ່ານ ພົຕ ປອ. ວົງສັກ ພັນທະວົງ ຄະນະປະຈຳສະພາແຫ່ງຊາດ, ປະທານກຳມາທິການປ້ອງກັນຊາດ-ປ້ອງກັນຄວາມສະຫງົບ ຂອງສະພາແຫ່ງຊາດໃຫ້ກຽດເຜີຍແຜ່. ເຂົ້າຮ່ວມເປັນປະທານ ແລະ ຮັບຟັງການເຜີຍແຜ່ມີ ທ່ານ ນາງ ຄຳເພົາ ເອີນທະວັນ ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສປປ ລາວ ປະຈຳ ສສ ຫວຽດນາມ ພ້ອມຄະນະນຳ, ພະນັກງານສະຖານທູດ, ການບິນລາວ ແລະ ບັນດາຜູ້ຕາງໜ້ານັກສຶກສາລາວທີ່ກຳລັງສຶກສາຮ່ຳຮຽນຢູ່ສະຖານບັນການສຶກສາໃນນະຄອນຫຼວງຮ່າໂນ້ຍ ເຂົ້າຮ່ວມຈຳນວນ 50 ຄົນ.
ຈຸດປະສົງຂອງການເຜີຍແຜ່ ຜົນສຳເລັດກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດ ຊຸດທີ IX ໃນຄັ້ງນີ້ ແມ່ນເພື່ອນຳເອົາບັນດາເນື້ອໃນຈິດໃຈ ກໍຄືບັນຫາສຳຄັນຕ່າງໆ ທີ່ກອງປະຊຸມສະພາແຫ່ງຊາດ ໄດ້ພິຈາລະນາ ແລະ ຮັບຮອງເອົາຄັ້ງນີ້ ແຈ້ງໃຫ້ບັນດາຜູ້ທີ່ມີສິດເລືອກຕັ້ງຢູ່ຕ່າງປະເທດ ໂດຍສະເພາະແມ່ນບັນດາຄະນະນຳ, ພະນັກງານ ແລະ ນັກສຶກສາລາວທີ່ກຳລັງເຮັດວຽກ ແລະ ຮ່ຳຮຽນຢູ່ ສສ ຫວຽດນາມ ໄດ້ຮັບຊາບຢ່າງທົ່ວເຖິງ.
ໃນໂອກາດນີ້, ທ່ານ ພົຕ ປອ. ວົງສັກ ພັນທະວົງ ໄດ້ຍົກໃຫ້ເຫັນຫຼາຍບັນຫາສຳຄັນຂອງປະເທດຊາດ ທີ່ກອງປະຊຸມໄດ້ພິຈາລະນາ, ຮັບຮອງເອົາ ເຊັ່ນ: ບົດລາຍ ງານຂອງລັດຖະບານກ່ຽວກັບການຈັດຕັ້ງປະຕິບັດແຜນການພັດທະນາເສດຖະກິດ-ສັງຄົມແຫ່ງຊາດ, ແຜນງົບປະມານແຫ່ງລັດ, ແຜນເງິນຕາ 6 ເດືອນຕົ້ນປີ 2024 ແລະ ແຜນການ 6 ເດືອນທ້າຍປີ 2024; ບົດລາຍງານຂອງອົງການກວດສອບແຫ່ງລັດກ່ຽວກັບການແກ້ໄຂຜົນການກວດສອບ ປະຈຳປີ 2022; ບົດລາຍງານກ່ຽວກັບການເຄື່ອນໄຫວວຽກງານແຕ່ກອງປະຊຸມສະໄໝສາມັນ ເທື່ອທີ 6 ຫາເທື່ອທີ 7 ແລະ ແຜນການຮອດກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ IX; ການພິຈາລະນາ ແລະ ຮັບຮອງເອົາການສ້າງ ແລະ ປັບປຸງກົດໝາຍ ຈຳນວນ 13 ສະບັບ (ສ້າງໃໝ່ 2 ກົດໝາຍ, ປັບປຸງ 11 ກົດໝາຍ). ພ້ອມນີ້, ທ່ານຍັງໄດ້ກ່າວວ່າ, ຜົນສຳເລັດຂອງກອງປະຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດ ຊຸດທີ IX ຄັ້ງນີ້ ເປັນການຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ, ແຜນພັດທະ ນາເສດຖະກິດ-ສັງຄົມແຫ່ງຊາດ 5 ປີຄັ້ງທີ IX ເຂົ້າສູ່ຊີວິດຕົວຈິງ, ແມ່ນໝາກຜົນແຫ່ງການລວມສູນສະຕິປັນຍາ, ສິດປະຊາທິປະໄຕ ກໍຄືການຍົກສູງຄວາມຮັບຜິດ ຊອບທາງການເມືອງຂອງບັນດາທ່ານສະມາຊິກສະພາແຫ່ງຊາດ, ການຕັດສິນໃຈສູງຂອງລັດຖະບານ, ອົງການທີ່ກ່ຽວຂ້ອງໃນການແກ້ໄຂຄວາມຫຍຸ້ງຍາກທາງດ້ານເສດ ຖະກິດ-ການເງິນໃຫ້ຕົກໄປເທື່ອລະກ້າວ ເພື່ອພັດທະນາປະເທດຊາດໃຫ້ມີຄວາມໜັກແໜ້ນຂຶ້ນໄປເລື້ອຍໆ. ທ່ານຍັງໄດ້ຮຽກຮ້ອງໃຫ້ຄະນະພັກ-ຄະນະນຳແຕ່ລະຂັ້ນ, ພະນັກງານ, ທະຫານ, ຕຳຫຼວດ, ປະຊາຊົນທຸກຊັ້ນຄົນໃນສັງຄົມ ເວົ້າລວມ, ເວົ້າສະ ເພາະແມ່ນ ຄະນະພັກ-ຄະນະນຳ, ພະນັກງານສະຖານທູດ, ນັກສຶກສາລາວທີ່ກຳລັງປະຕິບັດໜ້າທີ່ ແລະ ສຶກສາຮ່ຳຮຽນຢູ່ ສສ ຫວຽດນາມ ຈົ່ງນຳເອົາມະຕິຂອງກອງປະຊຸມສະພາແຫ່ງຊາດໃນຄັ້ງນີ້ ໄປຈັດຕັ້ງຜັນຂະຫຍາຍເຂົ້າໃນວຽກງານຕົວຈິງໃນຂອບເຂດຄວາມາຮັບຜິດຊອບຂອງຕົນໃຫ້ໄດ້ເປັນຮູບປະທຳ ແລະ ໄດ້ຮັບຜົນສຳເລັດເປັນຢ່າງດີ.
ໃນໂອກາດດັ່ງກ່າວນີ້, ທ່ານເອກອັກຄະລັດຖະທູດ ກໍໄດ້ລາຍງານສະພາບລວມຂອງສະຖານທູດ ແລະ ຜົນສຳເລັດໂດຍຫຍໍ້ໃນໄລຍະຜ່ານມາໃຫ້ແກ່ຄະນະຜູ້ແທນ ແລະ ຜູ້ເຂົ້າຮ່ວມອີກດ້ວຍ.
ຂ່າວ-ພາບ: ສະຖານທູດລາວທີ່ຮ່າໂນ້ຍ.
