ຕອນເຊົ້າວັນທີ 6 ທັນວາ 2025, ສະຖານທູດລາວ ທີ່ນະຄອນຫຼວງປັກກິ່ງ, ສປ ຈີນ ໄດ້ຈັດພິທີປາຖະກະຖາວັນສະຖາປະນາ ສປປ ລາວ ຄົບຮອບ 50 ປີ (02/12/1975-02/12/2025) ແລະ ວັນເກີດປະທານ ໄກສອນ ພົມວິຫານ ຄົບຮອບ 105 ປີ (13/12/1920-13/12/2025). ໃຫ້ກຽດເຂົ້າຮ່ວມເປັນປະທານ ແລະ ປາຖະກະຖາໂດຍ ທ່ານ ສົມພອນ ສີຈະເລີນ, ເລຂາໜ່ວຍພັກ, ເອກອັກຄະລັດຖະທູດວິສາມັນຜູ້ມີອໍານາດເຕັມແຫ່ງ ສປປ ລາວ ປະຈຳ ສປ ຈີນ. ມີຄະນະພັກ, ຄະນະນຳສະຖານທູດ, ພ້ອມດ້ວຍ ພະນັກງານການທູດລາວ, ນັກສຶກສາລາວທີ່ກໍາລັງສຶກສາຢູນະຄອນຫລວງປັກກິ່ງ ແລະ ເມືອງອ້ອມ ຂ້າງຂົ້າຮ່ວມ.
ໃນໂອກາດນີ້, ທ່ານ ສົມພອນ ສີຈະເລີນ ໄດ້ຍົກໃຫ້ເຫັນມູນເຊື້ອການຕໍ່ສູ້ອັນອົງອາດກ້າຫານຂອງບັນພະບູລຸດລາວ ທີ່ລະອິດລະອ້ຽວ, ຍືດເຍື້ອຍາວນານມາຫຼາຍຮ້ອຍປີສືບທອດກັນມາ ຈົນກ້າວມາເຖິງໄລຍະແຫ່ງການນໍາພາຕໍ່ສູ້ຂອງພັກປະຊາຊົນປະຕິວັດລາວ, ກອງທັບ ແລະ ປະຊາຊົນລາວບັນດາເຜົ່າ ໄດ້ສືບຕໍ່ມູນເຊື້ອອັນອົງອາດກ້າຫານ ຕໍ່ສູ້ຕ້ານກັບການຮຸກຮານ ແລະ ຄອບຄອງຂອງຈັກກະພັດລ່າເມືອງຂຶ້ນແບບເກົ່າ ແລະ ໃໝ່ ຈົນສາມາດປົດປ່ອຍປະເທດຊາດໄດ້ຢ່າງສົມບູນ ແລະ ປະກາດສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ຂຶ້ນຢ່າງສະຫງ່າຜ່າເຜີຍ ໃນວັນທີ 2 ທັນວາ 1975 ຈົນກ້າວມາເຖິງໄລຍະປົກປັກຮັກສາ ແລະ ສ້າງສາພັດທະນາປະເທດ ຊາດ ໂດຍທ່ານໄດ້ຍົກໃຫ້ເຫັນເຖິງຜົນງານໃນດ້ານຕ່າງໆ ຕະຫຼອດໄລຍະ 50 ປີ ຜ່ານມາ. ພາຍໃຕ້ການນຳພາອັນປີຊາສາມາດ ສະຫຼາດສ່ອງໃສ ຂອງ ພັກປະຊາຊົນ ປະຕິວັດລາວ, ປະຊາຊົນລາວບັນດາເຜົ່າ ສາມາດຍາດໄດ້ຜົນສຳເລັດຢ່າງຕໍ່ເນື່ອງໃນການປົກປັກຮັກສາ ແລະ ສ້າງສາພັດທະນາປະເທດຊາດ ເຮັດໃຫ້ໂສມໜ້າປະເທດຊາດ ມີການປ່ຽນແປງໃໝ່ໃຫຍ່ຫຼວງຮອນດ້ານ, ປະເທດຊາດມີສະຖຽນລະພາບດ້ານການເມືອງຢ່າງໜັກແໜ້ນ, ສັງຄົມມີຄວາມປອດໄພ, ສາມັກຄີ, ປອງດອງ, ການພັດທະນາເສດຖະກິດ-ສັງຄົມ ໄດ້ຮັບການຂະຫຍາຍຕົວເປັນກ້າວໆ, ການແກ້ໄຂຄວາມທຸກຍາກຂອງປະຊາຊົນ ຊຶ່ງແມ່ນບຸລິມະສິດຂອງພັກ ແລະ ລັດຖະບານມີຄວາມຄືບໜ້າ ແລະ ຫຼຸດລົງຢ່າງຕໍ່ເນື່ອງ, ຊີວິດການເປັນຢູ່ຂອງປະຊາຊົນບັນດາເຜົ່າໄດ້ຮັບການຍົກສູງຂຶ້ນຢ່າງບໍ່ຢຸດຢັ້ງ,
ໃນໂອກາດດຽວກັນນີ້, ທ່ານ ສົມພອນ ສີຈະເລີນ ຍັງໄດ້ຍົກໃຫ້ເຫັນເຖິງຊີວິດ ແລະ ການເຄື່ອນໄຫວປະຕິວັດຂອງ ປະ ທານ ໄກສອນ ພົມວິຫານ ອະດີດຜູ້ນໍາທີ່ແສນເຄົາລົບຮັກຂອງປວງຊົນລາວທັງຊາດ ເປັນຜູ້ນໍາພາກໍ່ຕັ້ງພັກ ປປ ລາວ, ເປັນວິລະບູລຸດຂອງຊາດລາວ, ເປັນຜູ້ຈັດຕັ້ງນໍາພາ-ພາລະກິດປະຕິວັດອັນຍິ່ງໃຫຍ່ຂອງປະເທດຊາດ ຍາດໄດ້ໄຊຊະນະຢ່າງສະຫງ່າງາມ ແລະ ສະຖາປະນາ ສປປ ລາວ ຂຶ້ນຢ່າງສະຫງ່າຜ່າເຜີຍ. ພ້ອມນີ້, ທ່ານຍັງໄດ້ຍົກໃຫ້ເຫັນຄວາມປີຊາສາມາດໃນການນຳພາ-ຊີ້ນຳ ພາລະກິດປະຕິວັດຕະຫຼອດຊີວິດຂອງເພິ່ນ ແລະ ຍົກໃຫ້ເຫັນແບບຢ່າງຄຸນສົມບັດສິນທຳປະຕິວັດ, ແບບແຜນດຳລົງຊີວິດທີ່ລຽບງ່າຍຂອງປະທານ ໄກສອນ ພົມວິຫານ ທີ່ຍາມໃດກໍເປັນຫ່ວງເປັນໄຍ ຕໍ່ການພັດທະນາປະເທດຊາດ.
ການຈັດປາຖະກະຖາຄັ້ງນີ້ ເພື່ອເປັນທິດທາງ ແລະ ປຸກລະດົມແນວຄິດຈິດໃຈຂອງບັນດາພະນັກງານການທູດລາວ ແລະ ນັກສືກສາລາວ ທີ່ຈະກາຍເປັນກໍາລັງແຮງຂອງຊາດໃນຕໍ່ໜ້າ ໄດ້ຮຽນຮູ້ເອົາມູນເຊື້ອຂອງຊາດ, ຄຸນງາມຄວາມດີ, ຄຸນທາດການເມືອງ, ຄຸນສົມບັດສິນທຳປະຕິວັດ ແລະ ແບບແຜນການດຳລົງຊີວິດອັນດີງາມຂອງປະທານ ໄກສອນ ພົມວິຫານ ເພື່ອໝູນໃຊ້ເຂົ້າໃນການຝຶກຝົນຫຼໍ່ຫຼອມຕົນເອງໃຫ້ກາຍເປັນສະມາຊິກພັກ, ພະນັກງານຜູ້ດີເດັ່ນ ແລະ ເປັນປັນຍາຊົນທີ່ມີຄຸນນະພາບ ເພື່ອສືບຕໍ່ສ້າງສາພັດທະນາປະເທດຊາດໃຫ້ຈະເລີນກ້າວໜ້າຕາມຍຸກສະໄໝ.
ໂດຍ: BT, ວສລ