ໃນຕອນເຊົ້້າວັນທີ 31 ກໍລະກົດ 2024, ສະຫະພັນແມ່ຍິງກະຊວງການຕ່າງປະເທດ ໄດ້ຈັດພິທີປາຖະກະຖາ ແລະ ເວທີສົນທະນາ ພາຍໃຕ້ຫົວຂໍ້: “ບົດບາດເພດຍິງໃນວຽກງານການຕ່າງປະເທດ” ໃນໂອກາດສະເຫຼີມສະຫຼອງວັນສ້າງຕັ້ງອົງການຈັດ ຕັ້ງສະຫະພັນແມ່ຍິງລາວ ຄົບຮອບ 69 ປີ (20 ກໍລະກົດ 1955-20 ກໍລະກົດ 2024) ທີ່ກະຊວງການຕ່າງປະເທດ, ໂດຍການໃຫ້ກຽດເຂົ້າຮ່ວມຂອງ ທ່ານ ນາງ ທຳມາ ເພັດວິໄຊ, ຮອງເລຂາຄະນະພັກ, ຮອງປະທານຄະນະບໍລິຫານງານສູນກາງສະຫະ ພັນແມ່ຍິງລາວ; ທ່ານ ທອງຜ່ານ ສະຫວັນເພັດ, ຄະນະປະຈຳພັກກະຊວງ, ຮອງລັດຖະມົນຕີກະຊວງການຕ່າງປະເທດ (ຜູ້ຊີ້ນໍາອົງ ການຈັດຕັ້ງມະຫາຊົນ); ທ່ານ ນາງ ອາລຸນີ ກົມມະສິດ, ພັນລະຍາຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ, ປະທານກິດຕິມະສັກສະຫະພັນແມ່ຍິງກະຊວງການຕ່າງປະເທດ; ແລະ ສະມາຊິກສະຫະພັນແມ່ຍິງກະຊວງການຕ່າງປະເທດເຂົ້າ ຮ່ວມ.
ໃນພິທີດັ່ງກ່າວ, ທ່ານ ທອງຜ່ານ ສະຫວັນເພັດ ໄດ້ໃຫ້ກຽດກ່າວເປີດພິທີ ໂດຍໄດ້ສະແດງຄວາມຊົມເຊີຍຕໍ່ວັນສ້າງຕັ້ງອົງ ການຈັດຕັ້ງສະຫະພັນແມ່ຍິງລາວ ແລະ ໄດ້ເໜັ້ນເຖິງຄວາມສຳຄັນຂອງອົງການຈັດຕັ້ງສະຫະພັນແມ່ຍິງລາວ, ຊຶ່ງໄດ້ຮັບການພັດ ທະນາ ແລະ ຂະຫຍາຍຕົວເປັນກ້າວໆມາ ຈົນເຖິງປັດຈຸບັນ. ຈາກນັ້ນ, ທ່ານ ນາງ ທຳມາ ເພັດວິໄຊ, ຮອງປະທານຄະນະບໍລິ ຫານງານສູນກາງສະຫະພັນແມ່ຍິງລາວ ກໍໄດ້ໃຫ້ກຽດບັນຍາຍ ຫົວຂໍ້: ຫວນຄືນມູນເຊື້ອວັນສ້າງຕັ້ງອົງການຈັດຕັ້ງສະຫະພັນ ແມ່ຍິງລາວ ຄົບຮອບ 69 ປີ (20 ກໍລະກົດ 1955 – 20 ກໍລະກົດ 2024)” ເຊິ່ງໄດ້ຍົກໃຫ້ເຫັນບົດບາດຄວາມສໍາຄັນຂອງແມ່ຍິງລາວໃນຂອບເຂດທົ່ວປະເທດ ທີ່ໄດ້ປະກອບສ່ວນເຂົ້າໃນພາລະກິດປະຕິວັດແຫ່ງການປົກປັກຮັກສາ ແລະ ສ້າງສາພັດທະ ນາປະເທດຊາດ, ຊຶ່ງເປັນສ່ວນໜຶ່ງຂອງກຳລັງແຮງອັນສຳຄັນຂອງພັກ ແລະ ລັດຖະບານ ໃນການພັດທະນາເສດຖະກິດ-ສັງຄົມຂອງຊາດ. ນັບຕັ້ງແຕ່ສະຫະພັນແມ່ຍິງລາວ ໄດ້ຮັບການສ້າງຕັ້ງຂຶ້ນ ກໍໄດ້ເຄື່ອນໄຫວ ແລະ ຕັ້ງໜ້າປະຕິບັດຕາມພາລະບົດບາດຂອງຕົນຢ່າງຫ້າວຫັນ ສະແດງອອກໃນການປົກປ້ອງສິດຜົນປະໂຫຍດອັນຊອບທໍາຂອງແມ່ຍິງ, ສົ່ງເສີມຄວາມກ້າວໜ້າຂອງແມ່ຍິງ ແລະ ຮັບປະກັນການປະຕິບັດຄວາມສະເໝີພາບຍິງ-ຊາຍ ທາງດ້ານການເມືອງ, ເສດຖະກິດ, ຊີວິດການເປັນຢູ່ ແລະ ວັດທະນະທຳ- ສັງຄົມ ເທື່ອລະກ້າວ.
ພ້ອມດຽວກັນນັ້ນ, ກໍໄດ້ຈັດເວທີສົນທະນາ ພາຍໃຕ້ຫົວຂໍ້: ບົດບາດເພດຍິງໃນວຽກງານການຕ່າງປະເທດ” ໂດຍມີບັນດາອະດີດທູດອາວຸໂສບຳນານ ແລະ ຕາງໜ້າຈາກສູນກາງສະຫະພັນ ແມ່ຍິງລາວ ທີ່ມີບົດຮຽນ ແລະ ປະສົບການສູງເຂົ້າຮ່ວມສົນທະ ນາ ແລະ ແລກປ່ຽນຄໍາຄິດເຫັນ.
ນອກຈາກການຈັດພິທີປະຖະກະຖາ ແລະ ເວທີສົນທະນາດັ່ງກ່າວແລ້ວ, ສະຫະພັນແມ່ຍິງກະຊວງການຕ່າງປະເທດຍັງຈະຈັດກິດຈະກຳງານຂາຍອາຫານຂຶ້ນ ໃນວັນທີ 02 ສິງຫາ 2024 ເພື່ອສ້າງຄວາມສາມັກຄີ ແລະ ຖືເປັນໂອກາດພົບປະສ້າງສັນມ່ວນຊື່ນກັນໂດຍມີບັນດາແຂກພາຍໃນ ແລະ ພາຍນອກກະຊວງ ລວມທັງອົງການຈັດຕັ້ງມະຫາຊົນຂອງກະຊວງເຂົ້າຮ່ວມຢ່າງເປັນຂະບວນ.
